Qazaqstan Respýblıkasy Táýelsizdik kúni qarsańynda «UOS ardagerleri, tyl eńbekkerleri jáne soǵys balalary keńesi» qorynyń uıymdastyraýymen UOS ardagerleriniń arasynda bılárdtan týrnır ótti.

90-nan asqan jastaryn elemeı, bizdiń batyr ardagerlerimiz boılaryndaǵy sergettikterin joǵaltqan emes. Osy jyly uıymdastyrylǵan «Altyn kúz» balynda olar shyr aınalyp bılep, tebirene án aıtyp, óskeleń urpaqqa úlgi-ónege kórsetti. Bılárdtan ótken týrnır de ardagerlerimiz ózderin tek Jeńis kúninde ǵana emes, basqa ýaqytta da ózderin baqytty sezinýge múmkindik berý maqsatynda uıymdastyrylǵan bolatyn.

Týrnır «Hit Target» bılárd klýbynyń demeýshiligimen joǵary deńgeıde ótti. Aldy toqsandy alqymdaǵan ardagerler kategorıasynda birinshi oryndy tyl eńbekkeri, Qazaqstannyń mádenıet qaıratkeri İzbasar Óteshuly, ekinshi oryndy soǵys jyldary Qazaqstanǵa qonys aýdarǵan koreı ultynyń ókili Maı Ýndeeı Hvan, úshinshi oryndy tyl eńbekkeri Omarbekov Nesipbaı ıemdendi. Al seksennen tómen ardagerler arasynda birinshi oryndy tyl eńbekkeri Bıjanov Tóken, ekinshi oryndy jazýshy Hasenuly Igen, úshinshi oryndy Ábikeev Tórehan ıemdendi. Sonymen qatar, týrnırdi baǵalaý úshin arnaıy qonaq retinde soǵys ardagerleri Japarhanov Slámhan, Kolesnıkov Aleksandr, Abdýlov Ivan, Maksımova Tamara, Kolesnıkova Lúdmıla shaqyryldy.

Ardagerler oıyn oınap, áńgime aıtyp, sher tarqatty. Bizdiń eldiń bas merekesi Táýelsizdik kúnin qadirleýdiń, osy beıbit ómirdiń ár kúnine shúkirshilik aıtýdyń qanshalyqty mańyzdy ekendigin jetkizdi.

Aqnıet Amanjolqyzy