Ońtústik astananyń «Almaty Arena»» sport kesheninde ótken halyqaralyq «Eýrazıa Barysy - 2017» týrnıriniń jeńimpazy anyqtaldy. Almaty ákimi Baýyrjan Baıbek birinshi oryndy jeńip alǵan Qazaqstan komandasyna 10 mln. teńge tapsyrdy, dep Qamshy.kz aqparat agenttigi. 

Halyqaralyq týrnırdi ashqan Almaty ákimi qalalyqtardy elimizdiń uly merekesi –  Qazaqstannyń Táýelsizdigi kúnimen quttyqtady.

«Táýelsizdik alǵan kúnnen bastap eldiń rýhyn asqaqtatýǵa, ana tilimiz ben dilimizdi nyǵaıtýǵa, eldik sanany shyńdaýǵa baǵyttalǵan isterge asa úlken mán bergen Memleket basshysy Nursultan Nazarbaevtyń jasampaz saıasaty búginde ult sanasyn jańǵyrtýdy dittegen «Rýhanı Jańǵyrýǵa» ulasty. Elbasy aıtqandaı, Ulttyq kod, ulttyq mádenıet saqtalmasa, eshqandaı jańǵyrý bolmaıdy. Olaı bolsa, biz ulttyq sport túrlerin, qazaqtyń palýandyq ónerin damytýdy jan-jaqty jalǵastyra bermekpiz. Kókpar, alaman báıge, aýdaryspaq, jamby atý, qazaq kúresi sekildi ulttyq sport túrlerin júıeli túrde qoldaý – bul bir jaǵynan, jaýjúrek batyrlar tárbıeleýge, sportshy jastardyń tanymal bolýyna, ómirden óz ornyn alýyna jasalǵan úlken múmkindik bolsa, ekinshi jaǵynan, álemdik órkenıetke elimizdi óz mádenıetimen, óz ónerimen, óz sportymen tanytýdyń quraly», - dedi megapolıs basshysy.

Almaty - búgingi kúni álem moıyndaǵan sporttyq ortalyq, nebir alaman-doda ótkizý dástúrine ıe qala, áıgili sańlaqtardyń otany. Jalpy, Táýelsizdiktiń  altyn besigi – ásem Almatynyń osy isterdegi orny erekshe. İri halyqaralyq sporttyq sharalar, álem birinshilikteri, basqa da biregeı jobalar almatylyqtardyń kúndelikti tirshiliginde myqtap oryn aldy. Tek bir ǵana «Sport meniń aýlamda» jobasynyń ózi bıyl 6000-nan astam  jas sportshyny  qamtydy.

Qala ákimi Almatyda eki jyl qatarynan at sportynan alaman jarystardyń ótkenin aıtty. Eger ótken jyly oǵan 200 jýyq báıgeshiler qatyssa,  bıyl 600 sportshy baq synasty. Al, halyqaralyq   «Eýrazıa barysy» týrnıri  megapolıste osymen 2-shi ret ótti. Halyqaralyq saıysqa álemniń 8 eliniń, ıaǵnı Brazılıa, Kamerýn, Grýzıa, Mońǵolıa, Japonıa, Ózbekstan, Túrkıa jáne Qazaqstannyń 70-ke jýyq palýany qatysýda.

Týrnır   olımpıadalyq shyǵyp qalý júıesi boıynsha «qabyrǵadan qabyrǵaǵa» formatymen ótti. Ulttyq komandalar quramynda tanymal paýlandar boldy. Fınalda Almaty qalasynyń  palýandary  men Qazaqstan komandasy kezdesip, taban tiresken kúres barysynda upaı sany  boıynsha Qazaqstan komandasy birinshi oryndy jeńip aldy.

Álem Kýboginiń jalpy júldelik qory - 20 mln. teńge. Birinshi oryn júldesi - 10 mln. teńge, ekinshi orynǵa kóterilgen Almaty  qalasynyń komandasy 6 mln. teńgeni, úshinshi oryndy enshilegen Ózbekstan komandasy 4 mln.teńgeni utyp aldy.

Uıymdastyrýshylardyń aıtýy boıynsha jarysty 120 mln. kórermen «Qazaqstan», «KAZSport»,  Túrkıanyń «TRTAvaz», Reseıdiń «Mach planeta» telearnalary arqyly tikeleı translásıadan kórgen. Halyqaralyq týrnırge  jınalǵan kórermender aldynda  Mádına Sádýaqasova, «Saltanat» bı ansambli, «Qobyz saryny», «Hazar» etno- fólklorlyq ansámblderi, «Jigitter» kvarteti óner kórsetti.