Qamshy.kz aqparat agenttiginiń hat qorjynyna  halyq aqyny Áselhan Qalybekovanyń Júrsin Ermanǵa arnaýy kelip tústi. Portalymyzdyń poshtasyna kelip túsken aqparattar redaksıamyzdyń kózqarasyn bildirmeıdi. 

Jalǵan degen jyn urǵan,

Jańyldyrdy halyqty.

Bórenedeı ǵumyrdan,

Bódenedeı qalypty.

Ýaqyt bárin tezdetti,

Ne bar endi qoımaıtyn.

Aıtys emes kez jetti,

Aqyretti oılaıtyn.

Kókireginen Mán ketse,

Jelmaıa da jelmeıdi.

Siz ben bizder ólsek te,

Aıtys endi ólmeıdi.

Dánin egip baldarǵa,

Qanaǵat pen aqyldyń.

Aıtys degen ormanǵa,

Shybyq shanshyp jatyrmyn.

Bolady olar jan-jaqty,

Rýhanı tulǵa samǵaıtyn.

Aqsha degen albasty,

Aınaldyra almaıtyn.

Nápsi degen buzyqty,

Syndyratyn syzǵyshtaı.

Qumarlyq pen qyzyqty,

Qorymaıtyn qyzǵyshtaı.

Ar-namysyn tulǵanyń,

Aıaq-asty etpeıtin.

Tary shashqan myrzanyń,

Taýyǵy bop ketpeıtin.

Tapsań da attyń basyndaı,

Altynǵa jerik bul jalǵan.

Baıymapty aqyn Shashýbaı,

Júzdi berip myńdy alǵan.

Álemge ashyp tereze,

Shyn juldyzdar janady.

Shen shekpen, baılyq dáreje,

Ózderi izdep tabady.

Jolyn baılap qasań saz,

Turmaıdy olar syı tilep.

Áýelden-aq jasampaz,

Jan azyǵy hıkmet.

Shákirtterim erjetip,

Qaıratty taza rýhty.

Dombyramen terbetip,

Ulyqtaıdy ultty.

Alma aǵashtaı gúli kóp,

Men solarmen birgemin.

Kók tıyndyq quny joq,

Úlde menen búldeniń.

Aı Júrsin-aı, Júrsin-aı,

Bir kezdegi dosymnyń.

Daý-damaıdy tynshymaı,

Qoldan jasap otyrsyń.

-Aıt, aıt deseń úretin,

Qaıt, qaıt deseń qaıtatyn.

Menshigińe kiretin,

Myqtylarǵa aıt aqyl.

Ózgerdi ómir jaı tústen,

Ótkenniń bási tólengen.

Qoshtassań da aıtyspen,

Qoshtaspaısyń óleńmen!

Áselhan Qalybekova

Qazaqstannyń halyq aqyny