«Áıel desem ájeme tıedi» degendeı, apa-qaryndastardan keshirim suraı otyryp, Qazanǵap Baıbolulynyń «Tóle bıdiń tarıhy» dastanynan bir epızod bereıinshi...
İlgeride Tós eliniń (Túlkibas pen Qazyǵurt arasy) eki azamaty jolaýshylap júrip, Arystyń Syrǵa quıar saǵasynda otyrǵan Qalyń qońyrattyń bir úıine toqtaıdy. Úı ıesi qazaqy dástúrmen qonaqtardy qushaq jaıa qarsy alady. Qonaqtar úı kóleńkesinde jatqan moınynda qarǵyly baýy bar adamǵa uqsas áldebir janýardy kórip tiksinip qalady. Sonda da syr bermeı úıge kiredi. Qaq tórde taıynshadaı tóbet jatyr. Qonaqtar bir-birine únsiz qarap, dastarhan basyna jaıǵasady. Sýsyndap, jón surasyp bolǵan soń, úı ıesi sóz bastaıdy. 
—Kózderińizden kóńildegi kúdikterińizdi baıqadym. Sony seıilteıin, ári et piskenshe, ýaqyt óltireıik...
Qaı bir jyly el shetine qalmaq tıip, biraz qyz-kelinshekterdi jásir etip atqa óńgerip áketken. Sonyń arasynda meniń de jas kelinshegim ketip edi. Biraz jyldan soń araǵa elshi júrip, el tatýlasty. Tutqyn qyz-kelinshekterdiń erki ózderine qalatyn bolyp sheshildi. Kóppen birge qalmaqqa men de bardym. Barsam, kelinshegimdi bir qalmaq qatyndyqqa alypty. Syr tartyp kórsem, qaıtatyn nıeti joq. 
—Olaı bolsa, qoshtasarda sońǵy sózimdi tyńda, esh bolmasa,-dep keshke qaraı aýyl syrtyna shaqyrdym. Kelgen kezde, atyma óńgerdim de, attyń basyn elge qaraı jiberdim. Bir ýaqyttar bolǵanda, artymnan kele jatqan jalǵyz atty qýǵynshyny baıqadym. Qutqarar túri joq! Amalsyz attan túsip, aıyldy tartyp shaıqasqa ázirlendim. At ústinde bir-birimizdi ala almaı, ekeýmiz de attan aýyp tústik. Qaıratty pále eken! Áıelime kómektes dep ymdasam, onda ún joq. Sileıip tur. 
Bir kezde, qalmaqty shalyp jyǵyp ústine shyǵyp, býyndyra bastadym. Qalmaqtyń boıynan qaırat ketip qyryldaı bastady...Sol sátte kók jelkemnen birdeńe tıdi. Kózim qaraýytyp, esimnen aýyp ketippin. Esimdi jısam, qasymda mynaý ıtim shoqıyp otyr. Qalmaq jaırap jatyr. Áýdem jerde qatyn otyr, eki tizesin qushaqtap...
Jaıylyp júrgen attardy ıtshilep ustap, bireýine ózim, birine qatyndy otyrǵyzyp jetekke alyp, aýylǵa qaıttym. 
Mynaý tóbet sol, meniń qutqarýshym! Áıeldi álginde kórdińder! 
Et pisken kezde, taza tabaqqa salyp, ıttiń sybaǵasyn bergenin kórip otyrmyz. Tamaqtan keıin aıaq jazýǵa syrtqa shyqtyq. Baǵanaǵy qubyjyq, aldyna qoıǵan jýyndyny shalpyldatyp iship otyr eken...

Mynaý tóbetti 7-8 jyl buryn Silbili jaılaýynda bir shopannyń úıinen kórip edim. Iesiniń aıtýynsha, bir qysta birneshe qasqyr alypty. Álde qaıtedi dep seskenip jaqyndaǵan maǵan bir burylyp qarady da jata berdi. Qaıtarda, shopannyń kishkene balalary jatqan ıttiń ústine minip jatqanyn kórdim. Tóbet bylq etpeı jatyr.