Elbasy «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» Qazaqstan halqyna Joldaýynda jańa álem kóshbasshylarynyń qataryna qosylý úshin birneshe mindetter qoıyp otyr. Osy mindetterdiń ishinde adamı kapıtal – jańǵyrý negizi ekendigi aıtylady.

Elbasy «Úzdik densaýlyq saqtaý isi - deni saý ult» baǵyty boıynsha mindetti medısınalyq saqtandyrý júıesi qalaı iske asyrylýy kerektigin atap, naqty tapsyrma berdi.  Elbasy óz Joldaýynda: «Densaýlyq saqtaý salasy halyqtyń, memlekettiń jáne jumys berýshiniń ortaq jaýapkershiligine negizdelgen Mindetti áleýmettik medısınalyq saqtandyrý júıesine kezeń-kezeńmen kóshetin bolady», dep atap kórsetken.

-Elimizde densaýlyq salasynda engizilgen eń úlken ózgeristerdiń biri – mindetti áleýmettik  medısınalyq saqtandyrý júıesi. MÁMS júıesiniń 2020 jylǵa deıin shegerilýiniń belgili sebepteri boldy. Elimizde ózin-ózi qamtıtyn azamattardyń saqtandyrý júıesinen tys qalý qaýpi joǵary bolyp otyrǵandyqtan Elbasymyz densaýlyq saqtaý salasyn reformalaý qadamdaryn qaıta qarap, saqtandyrý medısınasyna azamattardyń barlyq sanattarynyń teń dárejede qatysýyn qamtamasyz etýdi tapsyrǵan bolatyn, - deıdi Astana qalasy boıynsha «MÁMS» KEAQ fılıalynyń dırektory N.Qabdyqaparov.

Qazirgi tańda Medısınalyq saqtandyrý qory osy Joldaýdaǵy tapsyrmalardy oryndaýǵa bet burdy. Elbasynyń Joldaýynda aqparattyq júıelerdi biriktirý, mobıldik sıfrlyq qosymshalardy qoldaný, elektrondyq densaýlyq pasportyn engizý, «qaǵaz qoldanbaıtyn aýrýhanaǵa» kóshý arqyly medısınalyq kómektiń qoljetimdiligi men tıimdiligin arttyrý qajettiligine asa den qoıylǵan. Osyǵan oraı Qor «MSQ: Halyqtyq baqylaý» mobıldi qosymshasyn iske qosqan bolatyn. Atalǵan qosymsha elimizdegi aýrýhanalar men emhanalardyń qyzmetin baǵalaýǵa múmkindik beredi. Qosymshany uıaly telefonǵa júktep, kepildendirilgen tegin medısınalyq kómek sheńberinde qyzmet kórsetetin emhanalar men stasıonarlardyń jumysyna baǵa berýge bolady. Onda dáriger qabyldaýyna kirýge ketken ýaqyt, kórsetilgen qyzmet sapasy, dáriger bergen emniń túsiniktiligi syndy ólshemder esepke alynady.

-Qosymshany paıdalanýshylar kez kelgen medısına uıymy jaıly pikirin erkin túrde jazyp qaldyra alady. Aldaǵy ýaqytta osy pikirler negizinde klınıkalardyń reıtıńi jasalady. Bul azamattarǵa elimizdegi eń úzdik degen emhanalar men klınıkalardy tańdaýǵa septigin tıgizedi, – deıdi Astana qalasy boıynsha «MÁMS» KEAQ fılıalynyń dırektory N.Qabdyqaparov.

Mobıldi qosymsha únemi jańartylyp otyrady. Aldaǵy ýaqytta qosymshany emhanaǵa tirkelý, medısınalyq qyzmet sapasyn baǵalaý, dárigerge jazylý sıaqty fýnksıalarmen tolyqtyrý kózdelip otyr. 

Elbasy kepildendirilgen tegin medısınalyq kómek kólemin ońtaılandyrý qajettiligine basa nazar aýdarady. Osyǵan baılanysty Qor tarapynan usynystar ázirlenip, ókiletti organǵa beriledi. Iaǵnı, kepildendirilgen tegin medısınalyq kómek paketi qaıta qaralady deýge bolady. Osy aradaǵy basty mindet - memleket úshin tıimdiligi tómen ári shyǵyny kóp dıspanserlik júıeden bas tartyp, onyń ornyna qashyqtyqtan dıagnostıka jasaý jáne ambýlatorlyq emdeý tásilderin paıdalaný arqyly sozylmaly syrqattardy emdeý júıesine kóshý.

Aldaǵy eki jylda Qor kepildendirilgen tegin medısınalyq kómek pen áleýmettik medısınalyq saqtandyrý paketterine enetin medısınalyq qyzmetterdi irikteýmen aınalysýdy kózdep otyr. İrikteý barysynda medısınalyq qyzmetterge degen suranys pen olardyń tıimdiligi mindetti túrde eskeriledi.

Stasıonarlyq kómekten profılaktıkaǵa jáne ózge de qyzmet túrlerine kóshý – Qor jumysynyń basym mindetteriniń biri.

Elbasy qazirgi densaýlyq saqtaý isi qymbatqa túsetin stasıonarlyq emge emes, aýrýdyń aldyn alýǵa baǵyttalýǵa tıis ekendigin atap ótti. Elimizde statısıka boıynsha naýqastardyń basym bóligi dárigerge aýrýy ábden asqynǵannan keıin qaralady. Osynyń saldarynan azamattardyń shyǵyny men memleket qazynasynan bólinetin qarajat birneshe ese artady.

Qor bolashaqta stasıonardy almastyratyn qyzmet túrlerin kóbeıtýge baǵyttalǵan is-sharalardy júzege asyrady. 2018 jyldan bastap kepildendirilgen tegin medısınalyq kómekke bólinetin qarajattyń 5 prosenti osy qyzmet túrlerine jumsalatyn bolady. Atalǵan mindetter deni saý ultty qalyptastyrýǵa baǵyttalǵan Qor jumysynyń alǵyshartyna aınalyp otyr. Deni saý ulttyń ǵana bolashaǵy jarqyn bolady.

Gýlzıra Jıbekenova