Belgili jýrnalıs Sáýle Ábildahanqyzynyń uly baqılyq bolǵanyna kóp bolmady. Jýyrda aqyn Qalqaman Sarın onyń qaıǵysyn óleń joldary arqyly jetkizgen. Atalǵan óleńdi Sáýle Ábildahanqyzy óziniń ınstagaram paraqshasynda jazdy dep habarlaıdy Qamshy.kz aqparat agenttigi.
Alty alashqa aty málim Sáýle edim,
Qansyradym, qalmaǵandaı saý jerim.
Qaldy-aý, qaldy-aý jetpeı daýa-dármenim,
Soldy-aý, soldy-aý kókteı dáýir-dáýrenim.
Ýa, Táńirim,
Beren qylyp berdiń ul,
Qaıtyp aldyń. Shemen qylyp sher-ǵumyr...
Jatyrymdy jaryp shyqqan jalǵyzdy,
Qushaǵyna alyp ketti jer jumyr.
Alyp ketti jigit bolǵan kezinde,
Arman bolǵan, úmit bolǵan kezinde,
Ultyn súıip ulyq bolǵan kezinde,
Kemeline kúlip tolǵan kezinde.
Kóńil bólip kórkem etip keshimdi,
Kelin kelip jalǵaıdy dep kóshimdi
Júrgenimde, alyp aqyl-esimdi,
Ólim kelip úmitimdi óshirdi!..
Alty alashqa aty málim Sáýle edim,
Baıtaq edim,
Baqshaly edim, baýly edim,
Asqaq edim,
Asqar edim,
Taýly edim!
Alasurdym alasaryp záý kógim.
Ómirdegi jeńilisim, jeńisim,
Bári, bári, bári, bári sen úshin.
Bárin jasap jaqsylyqtyń sen úshin,
Kerek dese, dosty umyttym sen úshin,
Ulym, eshkim baspasyn dep eńseńdi,
Taý qoparyp, tasty úgittim sen úshin.
Keshir, ulym,
Keshir, meni,
Kesh, ULYM,
Táńir,
Taǵdyr eki etpeıdi sheshimin.
Merekemniń shyrqyn buzyp ketti ajal,
Berekemniń buzyp kirip esigin.
Tiri bolyp júrgenimmen... jansyzbyn,
Ótip jatyr maǵynasyz, mánsiz kún.
Sen Anańnyń aıyptama kóz jasyn,
Men ajaldyń aldynda, ulym, álsizbin...
Jalǵyz óziń mysyn basyp myń ezdiń
Júrýshi ediń, meniń kórkem minezdim.
Ana! - deseń jan-júrekti terbeıtin,
Seniń úniń,
Seniń úniń - shyn ózge ún!
Anań boldym, aq sútime razymyn,
Jibereıin, boıyńdy endi jaz, ulym.
Jazymyshty aldym ba eken, jazǵyryp,
Keshir, Alla, bolsa tilden jazyǵym?!
Endi seniń kúlgeniń de qur eles,
Kúlim qaǵyp júrgeniń de qur eles.
Dál osyndaı qasiretti, qaıǵyny,
Eshbir Ana eshbir janǵa tilemes.
Júregimniń lúpilinde qalasyń,
Bolmysymda, bitimimde qalasyń.
"...Jiber" deıdi, jibereıin bara ǵoı,
Qalady artta aza tutyp Anashyń.
Aqyl-oıyń, parasatyń ádemi,
Bári ózińe jarasatyn ádemi.
Tamsandyrǵan tańǵajaıyp álemiń,
Qarsy aldyńnan jol ashatyn ádemi.
Kýá boldym samǵaýyńa, myń shúkir!
Kýá boldym armanyńa, myń shúkir!
Seni kútken asyl, asqaq sezimmen,
Túnderime, tańdaryma, myń shúkir!
Az da bolsa ol da - mura, myń shúkir!
Aınaldyń sen qorǵanyma, myń shúkir!
Meniń ǵana ǵumyryma buıyryp,
Meniń ulym bolǵanyńa, myń shúkir!
(Aqyn Qalqaman Sarın meniń qaıǵy-qasiretimdi osylaı joqtaý óleńmen órnektepti... Qosyp-alarym joq...)
