Qazaqstan Birikken Ulttar Uıymy Qaýipsizdik Keńesiniń Tóraǵasy retinde óz jumysyn aıaqtady, dep habarlaıdy Qamshy.kz aqparat agenttigi QR SİM baspasóz qyzmetine silteme jasaı otyryp.

Ústimizdegi jyldyń 1 qańtarynan bastap qazaqstandyq delegasıa Qazaqstan Respýblıkasynyń Prezıdenti Nursultan Nazarbaevtyń «Qaýipsiz, ádil jáne órkendegen álem qurý úshin jahandyq áriptestikti nyǵaıtýǵa qazaqstandyq tujyrymdamalyq kózqaras» atty saıası úndeýin, sondaı-aq pragmatıkalyq prınsıpterge negizdelgen óz ulttyq múddelerin basshylyqqa alyp, BUU-nyń negizgi organynyń jumysyna tóraǵalyq etti.

Qazaqstan BUU Qaýipsizdik Keńesiniń Tóraǵasy retinde BUU Hatshylyǵynyń kómegimen Qaýipsizdik Keńesiniń úzdiksiz kúndelikti jumysyn qamtamasyz etti jáne mandatqa sáıkes júktelgen fýnksıalardy oryndady.

Qazaqstannyń tóraǵalyǵy barysynda konsýltasıalar, brıfıńter jáne pikirtalastar formatynda 30-ǵa jýyq otyrys ótkizildi jáne olardyń qorytyndylary boıynsha Keńes Tóraǵasynyń buqaralyq aqparat quraldary úshin qararlar men málimdemeler qabyldandy.

18 qańtarda Qazaqstan Respýblıkasynyń Prezıdenti Nursultan Nazarbaevtyń tóraǵalyq etýimen ótken «Jappaı qyryp-joıý qarýyn taratpaý: senim sharalary» taqyrybyndaǵy joǵary deńgeıdegi taqyryptyq brıfıńQazaqstannyń BUU Qaýipsizdik Keńesinde tóraǵalyq etýiniń basty is-sharasy boldy. Otyrys senimdi nyǵaıtý sharalary, sondaı-aq preventıvti dıplomatıa quraldaryn nyǵaıtý álemdik derjavalar arasyndaǵy saıası konúnktýra nátıjesinde ýaqytyly sheshilmeıtin kóptegen mańyzdy máseleler boıynsha progreske qol jetkizýdiń negizi bola alatyndyǵyn kórsetti.

Otyrys qorytyndysy boıynsha BUU Qaýipsizdik Keńesiniń Tóraǵasynyń № S/PRST/2018/1 málimdemesi (Presidential statement) janjaldardyń aldyn alý keshendi strategıasyna arnalǵan. Atalǵan qujatta preventıvti óristetý, aldyn-alý, tatýlastyrýshylyq, bitimgershilik, janjaldan keıingi beıbitshilikti jáne esep berý mindettiligi sharalaryn nyǵaıtýmen qatar alǵash ret jappaı qyryp-joıý qarýyn taratpaý máselesi qamtyldy. Bul qabyldanǵan qujattyń biregeıligi bolyp tabylady.

Qazaqstan BUU Qaýipsizdik Keńesine saılanǵan Ortalyq Azıadaǵy birinshi memleket retinde tóraǵalyǵy barysynda aımaqtaǵy barlyq memleketteriniń múddelerin ilgeriletý boıynsha belsendi jumysyn jalǵastyrdy.

BUU Qaýipsizdik Keńesiniń QR Syrtqy ister mınıstri Qaırat Ábdirahmanovtyń tóraǵalyǵymen 19 qańtarda ótken «Qaýipsizdik pen damýdyń ózara táýeldiliginiń úlgisi retinde Aýǵanstan men Ortalyq Azıadaǵy aımaqtyq seriktestikti qurý» taqyrybynda ótken mınıstrler deńgeıindegi taqyryptyq pikirtalastary negizgi is-sharalardyń biri boldy.

Otyrysqa Kýveıt, Reseı, Polsha, Qyrǵyzstan, Tájikstan jáne Ózbekstannyń Syrtqy ister mınıstrleri, Ulybrıtanıa, Nıderland, AQSH, Ekvatorlyq Gvıneıa jáne Aýǵanstannyń syrtqy saıası vedomstvo basshylarynyń orynbasarlary, sondaı-aq BUU Qaýipsizdik Keńesiniń jáne Eýropalyq Odaqtyń múshe memleketteriniń delegasıalary qatysty. Baıandamashy retinde BUU Bas hatshysy Antonıý Gýterrısh sóz sóıledi.

Otyrys qorytyndysy boıynsha BUU Qaýipsizdik Keńesiniń Tóraǵasynyń № S/PRST/2018/2 málimdemesi (Presidential statement) qabyldandy. Qujatta Aýǵanstan men Ortalyq Azıadaǵy uzaq merzimdi beıbitshilikti, turaqtylyqty jáne turaqty damýdy qamtamasyz etý úshin óńirlik, aımaqaralyq jáne halyqaralyq yntymaqtastyqty damytýdyń mańyzdylyǵy atap kórsetilgen jáne óńir elderiniń beıbitshilik, órkendeý jáne yntymaqtastyq aımaǵyn keńeıtýge baǵyttalǵan birlesken kúshterine qoldaý bildirilgen.

12-15 qańtarda uıymdastyrylǵan BUU Qaýipsizdik Keńesi delegasıasynyń Kabýlǵa sapary Qazaqstan tóraǵalyǵynyń mańyzdy is-sharasy boldy. İs-shara barysynda el basshylyǵy, saıası partıalar men azamattyq qoǵam ókilderimen kezdesýler ótkizildi. Sapar aıasynda Aýǵanstan Úkimetiniń keń aýqymdy ózara baılanysty máselelerdi sheshý jónindegi kúshteri qarastyryldy sondaı-aq Qaýipsizdik Keńesiniń jergilikti kúshterge qosymsha járdemdesý joldary anyqtaldy.

Kabýldaǵy dalalyq mısıa 2010 jyldan beri Qaýipsizdik Keńesiniń Aýǵanstanǵa alǵashqy sapary boldy jáne ol eldegi aǵymdaǵy jaǵdaıdy qarastyrýǵa, sondaı-aq memleket jáne onyń azamattarynyń múddeleri men basymdyqtaryn obektıvti túsinýge múmkindik berdi.

18 qańtarda Qazaqstan BUU aıasynda Terorızmsiz álemge qol jetkizý jónindegi áreket etý kodeksiniń jobasyn júzege asyrý úshin joǵary deńgeıdegi arnaıy is-shara ótkizdi. Atalǵan qujattyń negizgi maqsaty - 2045 jylǵa deıin terorızmsiz álem jáne seriktes elderdiń halyqaralyq koalısıasyn qurý. BUU basshylyǵy men Qaýipsizdik Keńesiniń terorızmge qarsy bólimsheleri, múshe-memleketterdiń júzden astam delegasıalarynyń ókilderi Kodekstiń ózektiligi men mańyzdylyǵyn qoldady.

Tóraǵalyq aıasynda Taıaý Shyǵys pen Kıpr, Kongo Demokratıalyq Respýblıkasy, Kolýmbıa, Darfýr (Sýdan), Batys Afrıka jáne Sahel, Lıvıa, Malı, Somalı jáne Ońtústik Sýdandaǵy jaǵdaı jáne BUU Ortalyq Azıadaǵy Preventıvti dıplomatıa jónindegi óńirlik ortalyǵynyń qyzmeti boıynsha josparlanǵan is-sharalary (brıfıńter men konsýltasıalar) sondaı-aq BUU Qaýipsizdik Keńesi músheleriniń AQSH basshylyǵymen kezdesý úshin Vashıngtonǵa sapary ótkizildi.

2 qańtarda ótkizilgen saltanatty túrde BUU Qaýipsizdik Keńesi zalynyń aldynda ózderiniń ulttyq týlaryn ornatqan alty múshe memleketter – Kot-d'Ivýar, Kýveıt, Nıderland, Perý, Polsha, Ekvatorlyq Gvıneıa BUU Qaýipsizdik Keńesine resmı qosylý rásimi Qazaqstannyń tóraǵalyǵynyń erekshiligi boldy.

Qazaqstan BUU Qaýipsizdik Keńesinde praktıkalyq nátıjelerge qol jetkizýge jáne kún tártibinde qarastyrylǵan barlyq máseleler boıynsha Keńestiń jumysyna konstrýktıvti úles qosýǵa umtyla otyryp, beıtarap, ashyq jáne transparentti tóraǵalyq etti.

Kóptegen jahandyq jáne óńirlik prosesterge qatysýyn, medıasıa men senimdilikti nyǵaıtýdaǵy belsendi ustanymyn eskere otyryp, Qazaqstan kópjaqty dıplomatıa aıasynda barlyq halyqaralyq uıymdar men memleketterge beıtaraptylyǵy men tıimdi teńdestirilgen tásilimen belgili adal kelistirýshi retinde áreket etýdi jalǵastyrady.

Qazaqstan Respýblıkasy men Prezıdentimizdiń bedeliniń joǵary bolýyna baılanysty qazaqstandyq delegasıa bastamashylyq etken is-sharalardyń tabysty ótkizilýi jáne olardyń nátıjeleri boıynsha qorytyndy qujattardyń qabyldanýy elimizdiń kelisimsharttyq áleýeti men bitimgerlik áleýetiniń ózektiligin, sondaı-aq qazirgi zamanǵy álemniń eń ózekti máselelerin sheshýge qatysty tıimdi tásilderin kórsetti.