2 aqpanda Almatyda Qazaqstan Respýblıkasynyń Prezıdenti Nursultan Nazarbaevtyń bastaýymen «Jahandaný dáýirindegi sıfrlyq kún tártibi» atty halyqaralyq forým bastaldy, dep habarlaıdy Qamshy.kz aqparat agenttigi.

Alqaly jıynǵa Armenıa, Belarýs, Qazaqstan, Qyrǵyzstan, Reseı, Ózbekstan jáne Tájikstan premer-mınıstrleri, sondaı-aq halyqaralyq IT kompanıalardyń ókilderi qatysty.

Forým barysynda Baqytjan Saǵyntaev Elbasy Nursultan Nazarbaevtyń forýmǵa qatysýshylarǵa arnalǵan hatyn oqyp berdi.

– Qurmetti qatysýshylar, forýmǵa qosh keldińizder. Álem túbegeıli ózgerister zamanynda ómir súrip otyr. Strategıalyq uıymdar sıfrlandyrýǵa mán berip otyr. Búgingi forýmda Eýrazıalyq ekonomıkalyq odaq ekonomıkasyn sıfrlandyrý barysyn talqylaıtyn bolamyz. Sıfrlandyrýdyń kún tártibindegi máselelerdi túbegeıli sheshemiz dep oılaımyn.

Ortaq naryqtyń bolýy sıfrlandyrý máselelerinde birlesken tásilder men sharalardy ázirleýdi talap etedi. Kúshterdi jumyldyrý EAEQ-tyń tutastaı jáne ár eldiń jekeleı damýy úshin sınergetıkalyq tıimdilikti qamtamasyz etedi. Bul is-shara qajetti sheshimderdi ázirleýge jáne yntymaqtastyqty nyǵaıtýǵa yqpal etetinine senimdimin. Forýmnyń barlyq qatysýshysyna jemisti eńbek jáne alǵa qoıylǵan maqsattaryna qol jetkizýdi tileımin, – dedi Saǵyntaev.

Forýmnyń basty maqsaty - sıfrlyq ekonomıkanyń básekege qabilettigin arttyra otyryp, ony damytýdy jedeldetetin birlesken sharalar ázirleý jáne óńirlik ıntegrasıalyq transformasıalaý negizinde kelesi dıvıdentterdi alý joldaryn ázirleý.

«Sıfrlyq Qazaqstan» baǵdarlamasyn júzege asyrýdy qolǵa alǵan elimiz úshin bul sharanyń mańyzy zor. Memleket basshysy byltyrǵy Joldaýynda ǵalamdyq tehnologıalardyń kóshine ilesý memlekettik meje ekenin atap ótken.

Qazaqstan TMD elderiniń ishinde alǵashqy bolyp elektrondyq sıfrlyq qoltańbany qoldanýdy, memlekettik qyzmetterdi elektrondyq formatqa kóshirýdi qolǵa alǵan. Búginde Qazaqstanda eldiń sıfrlyq ekonomıkasyn damytý maqsatyndaǵy josparlar negizi daıyn. «Sıfrlyq Qazaqstan» ekonomıkasyn jedel tehnologıalyq jańǵyrtýdy qamtamasyz etý baǵytynda  sıfrlyq transformasıalaý boıynsha keshendi baǵdarlama qabyldandy. Baǵdarlamada 2 negizgi maqsat aıqyndalǵan. Birinshi, ekonomıka salalaryn sıfrlandyrý, sıfrlyq memleketke ótý jáne «Sıfrlyq Jibek jolyn» damytý arqyly ekonomıkany damytý jáne halyqtyń turmys sapasyn jaqsartý qarqynyn aıtarlyqtaı údetý. Ekinshi, adam kapıtalyn damytý jáne uzaq merzimdi perspektıvada ınovasıalyq ekojúıeni qurý arqyly Qazaqstan ekonomıkasynyń jańa damý traektorıasyna ótý mindeti tur.