Ákimdik qyzmetkerleri neni jasyrǵysy keldi?

Ońtústik Qazaqstan oblysynyń basshysy Janseıit Túımebaev ótken jyly atqarǵan jumystary týraly el aldynda esep berdi. Bul týraly Qamshy.kz aqparat agenttigi ratel.kz-ke silteme berip habarlaıdy. 

Bul kezdesýge Úkimet basshysynyń orynbasary Asqar Jumaǵalıev pen Shymkenttiń eks ákimi, búginde «Nur Otan» partıasynyń hatshysy qyzmetin atqaryp júrgen Ǵabıdolla Ábdirahmanov jáne taǵy da ózge astanalyq qonaqtar qatysty.

Aıtpaqshy, jıyn bastalmaı turyp myna bir jaıtqa kýá boldyq. Ózin Qatıra Ibragımova dep tanystyrǵan keıýana bank aldyndaǵy qaryzyn óteı almaǵan soń úıinen aıyrylǵanyn aıtyp muńyn shaqty. Tipti jıyn bastalmaı jatyp shý shyǵaryp úlgergen ony ákimdik ókilderi sabyrǵa shaqyrǵysy kelgenimen, «kún sýyqta balalarymmen dalada qaldym» degen turǵyn sońǵy úmiti oblys ákiminde ekenin jetkizdi.

Biraq zalǵa Túımebaev myrza kirmeı jatyp ákimdiktegiler álgi áıel azamatynan syrtqa alyp shyǵyp, bir shýdyń aldyn alǵandaı boldy.

Jıyn bastalyp qoıǵan soń zalǵa ene almaǵan turǵyndar jýrnalıserge muńyn jetkizdi. Medısına salasy boıynsha kásibin dóńgeletip otyrǵan Jumagúl Nahypova esimdi kelinshek  emdelýshileriniń ótinishin arqalap, jıynǵa kelgen kórinedi. Alaıda amanatty jetkizý múmkin bolmady. Zalǵa kire almaǵan ol ákimniń atyna úsh ret hat joldap, jaýabyn taǵatsyzdana kútip júr eken.

Reglament boıynsha qyryq mınýt ishinde baıandama jasaýǵa tıis aımaq basshysy minberde turyp bir saǵattaı sóz sóıledi. Atqarǵan jumystaryn baıandaǵan ol bıyl óńirde júzege asatyn jobalardy da málim etti.

Sonyń ishinde jumyssyz halyqty jumyspen qamtý jaıy zalǵa jınalǵan jurtshylyqqa jańa serpilis bergendeı boldy. Túımebaevtyń aıtýynsha, bıyl 90 myńnan astam ońtústikqazaqstandyq turǵyn jumyspen qamtý sharalaryna qatyspaq.

Al «Rýhanı jańǵyrý» baǵdarlamasy aıasynda aımaqta «Qymyzmuryndyq», «Qaýyn Fest", «Agro Fest"  jáne de oblysta buryn-sońdy bolmaǵan gólf jarysy júzege asyrylmaq.

Aımaq basshysynyń baıandamasynan soń jaryssózge kezek berildi. Turǵyndar sabyrlyq tanytyp, ret-retimen saýaldaryn joldady. Bir qyzyǵy, qoıylǵan saýaldarǵa berilgen jaýapty atap ótý kerek. Nege ekeni belgisiz, esep berýshi ákim turǵyndar tarapynan qoıylatyn saýaldardy aldyn ala bilip alǵandaı olarǵa jaýap bererde aldyndaǵy qaǵazyna qaıta-qaıta qarap, quddy bir mektepte «sabaq oqymaı kelgen oqýshynyń kitapqa qaraǵan sátin» eske saldy.

Jaraıdy, saýaldar qoıyldy. Jaýaptar berildi. Solardyń bir ekeýine toqtalsaq.

Shymkenttik kópbalaly ana Gúljan Jolbarysqyzy ózgeler sekildi aýyzsý, jol nemese sol sekildi áleýmettik máselelerden  góri halyq sany úsh mıllıonǵa jaqyndap qalǵan ońtústiktiń úsh mıllıonynshy turǵynyna jergilikti bıliktiń tartý eter syılyǵy alańdatty.

«Úsh mıllıonǵa jetip jatsaq, náresteni dúnıege alyp kelgen anaǵa bir páter berýge daıynbyz» dep qysqa qaıyrdy Janseıit Qanseıituly.

Esepti kezdesýde ákimge saýaldy tek zalǵa jınalǵandar ǵana emes, onlaın baılanys arqyly óńirdiń ózge aýdan, qalalarynan da  tabyldy. Máselen, Sozaq aýdanynyń 27 jastaǵy turǵyny Asqat Esenjanov áli kúnge deıin joǵary bilim almaǵanyn alǵa tartty.

«Qolymnan qolóner buıymdaryn jasaý keledi. Osy isimdi ary qaraı damytyp, qolóner buıymdaryn jasasam deımin. Osyǵan baılanysty memleket tarapynan meniń isimdi damytýǵa múmkinshilik bar ma?» dep saýal qoıdy sozaqtyq jigit.

«Kishkene ókinishti, 27-ge deıin mamandyq joq, sondyqtan kómek beremiz. Qysqa merzimdi kásiptik  oqytý bar jáne uzaq merzimdi. Uzaq merzimdi úsh jyldyq, qysqa merzimdi úsh aılyq. Qaısysy ózińizge unaıdy, sol boıynsha biz kásiptik bilim berýge daıynbyz. Stıpendıa beremiz. Jol júrý aqysyn tóleımiz. Sebebi bizdiń oblysymyz úshin bul óte mańyzdy problema. Iaǵnı, múmkindiginshe bizdiń azamattar mamandyq alsyn deımiz...» degen oblys ákimi búginde óńirde mal sharýashylyǵy mamandary tapshy ekenin sóz etti.

Túımebaevtyń oıynsha, búginde adamǵa qaraǵanda mal baǵý isi qıyn.

«Malǵa qaraý qazir adamǵa qaraýdan qıyn. Adamnan úlken jaýapkershilikti qajet etedi. Sý bermeı kórińiz, jem bermeı kórińiz. Sespeı qatady. Iaǵnı, kútý kerek, baǵý kerek, qaraý kerek» degen aımaq basshysy adam jumyssyz júrse «sespeı qatanynyn» da aıtyp, jurtty tań qaldyrdy.

«Qazir qansha adam bar qoıshy, qorashy, jylqyshy taba almaıdy. Birden aılyǵy kóp jumys izdeıdi. Eshbir memlekette ondaı nárse joq. Eger jumys istemeńiz, sespeı qatasyz. Ólip qalasyz. Búkil shetelde sondaı» dep sózin túıdi aımaq basshysy.

Jaryssóz toqtaǵan soń ákimniń esebi týraly pikir bildirmek bolyp arnaıy tizimge jazylǵan azamattarǵa sóz berilgeni sol edi, zaldan shý shyqty.

Smırnova Natalá esimdi turǵyn saýalyn qoıýǵa ruqsat bermegeni úshin mıkrofon surap, aıqaıǵa basty.

Birneshe mınýt boıy zaldy ózine qaratqan kelinshekti tyńdaý úshin zal ishinde otyrǵan Janseıit Túımebaevtyń ózi qasyna jaqyndap, qolastyndaǵylarǵa «Berseıshi mıkrofondy» dep tapsyrma berdi de, ózi minberge shyǵyp ketti.

Qysqasy, bul daýǵa ákimniń qabyldaýymen núkte qoıylatyn boldy. Dúısenbi kúni tańǵy saǵat toǵyzda ákim turǵyndy arnaıy qabyldamaq. Tek qana bul turǵyndy emes, ózge de narazylyq bildirýshilerdi Túımebaev myrza qabyldaýyna shaqyrdy.

Esep sońynda Shymkenttiń eks ákimi, búginde «Nur Otan» partıasynyń hatshysy qyzmetin atqaryp júrgen Ǵabıdolla Ábdirahymovtan Túımebaevtyń esebi týraly pikir bildirýin ótindik.

«Jalpy oblysta jumystar júrgizilip jatyr. Jańa ákim de aıtty ǵoı jobalardy. Oılaımyn, onyń barlyǵy iske asady. Endi múmkin biraz halyqpen tyǵyzyraq bolý kerek shyǵar dep oılaımyn» degen Ábdirahymovtan narazy bolǵan halyqqa qatysty pikirin bilmek bolǵanymyzda burynǵy basshysynyń jumysyna kedergisin tıgizbeıin dedi me, áıteýir «bez kommentarıev» dep qysqa qaıyrdy.