Almatyda QR Ulttyq Banki ókilderi qarjy sarapshylarymen kezdesti dep habarlaıdy Qamshy.kz aqparat agenttigi QR Ulttyq bank baspasóz qyzmetine silteme jasap.
Kezdesý barysynda aqsha-kredıt saıasaty, aqsha jáne valúta naryǵyndaǵy jaǵdaı, sondaı-aq qarjy retteýshisiniń bazalyq mólsherleme deńgeıin 9,75%-dan 9,5%-ǵa deıin tómendetý máseleleri talqylandy.
Ulttyq Banktiń Zertteýler jáne statısıka departamentiniń dırektory Vıtalıı Týtýshkın qatysýshylarǵa jyldyq ınflásıanyń 2018 jylǵa arnalǵan nysanaly dáliz ishinde baıaýlaýy jalǵasatynyn aıtty. Ol ınflásıanyń 2018 jyldyń aqpan aıynan 6,5% bolǵanyn atap ótti.
«Baǵanyń mundaı serpini syrtqy ınflásıa jáne ishki naryqtaǵy jıyntyq usynystyń ósýine negizdeldi. Saýda áriptes elderdegi ınflásıanyń tómen deńgeıi ımporttyq
taýarlar baǵalarynyń tómendeýine yqpal etýde. Budan basqa, halyqtyń naqty aqshalaı tabystarynyń teris serpini saqtalǵan kezde ishki tutynýdyń qalpyna kelýi baıaý
qarqynmen júrip jatyr», - dep túsindirdi V. Týtýshkın.
Ulttyq Banktiń baǵalaýynsha, 2018 jyldyń 4-toqsanynda ınflásıa 5%-dan az (nysanaly dálizdiń tómengi sheginen tómen) bolýy múmkin.
«Ótken jyly taýarlar baǵasy burynǵyǵa qaraǵanda tezirek ósti dep esepteıtin
respondentterdiń úlesi jyl basynan beri 52,1%-dan 47%-ǵa deıin tómendedi, bul halyqtyń ınflásıany qabyldaýynyń jalǵasyp kele jatqan jaqsarýyn kýálandyrady», - dedi V. Týtýshkın jáne aǵymdaǵy jyly ekonomıkalyq belsendilik senimdi ósýin
jalǵastyratynyn atap ótti.
Sózin qorytyndylaı kele qarjy retteýshisiniń ókili ınflásıanyń baıaýlaýy jáne ekonomıkanyń ornyqty ósý baǵytyna birtindep shyǵý aıasynda aqsha-kredıt talaptary
beıtaraptyqqa umtylýyn jalǵastyratynyn atap ketti. «Bazalyq mólsherlemeni odan ári
tómendetý jónindegi saıasat ınflásıanyń bolashaq deńgeıiniń orta merzimdi nysanaly dálizge sáıkestigin jáne 2018 jyly ınflásıanyń barynsha tez tómendeý táýekelderine,
olardyń shekteýli jáne qysqa merzimdi sıpatyna qaramastan 2020 jylǵa qaraı 4%-dyq maqsatqa jetýin qamtamasyz etedi».
Óz kezeginde, QRUB Monetarlyq operasıalar departamentiniń dırektory Álıa
Moldabekova eldiń valúta jáne aqsha naryqtaryndaǵy ahýalǵa túsinikteme berdi.
«İshki valúta naryǵyndaǵy ahýal shetel valútasy suranysy men usynysynyń teńgerimdiligimen sıpattalady. Syrtqy irgeli faktorlardyń serpini jetkilikti túrde jaǵymdy. Aqsha naryǵynda teńge ótimdiliginiń qurylymdyq profısıti saqtalýda».
Tanystyrylymnan keıin Ulttyq Bank ókilderi osyndaı kezdesýlerdi ótkizýdiń
mańyzdylyǵyn atap ótken sarapshylardyń suraqtaryna jaýap berdi.
Qazaqstan Ulttyq Bankiniń sarapshylarmen kezdesýdi turaqty negizde qarjy
retteýshisiniń naryqpen jáne qoǵamdastyqpen belsendi komýnıkasıalary saıasatynyń sheńberinde ótkizetinin eske salamyz.
