Aýyldyq medısınalyq uıymdar aldaǵy úsh jyl ishinde, ıaǵnı 2021 jylǵa deıin kezeń-kezeńmen qaǵazsyz jumys formatyna kóshiriledi. Bul týraly búgin Úkimet otyrysynyń qorytyndysy boıynsha ótken brıfıńte densaýlyq saqtaý mınıstri Eljan Birtanov málim etti, dep habarlaıdy Qamshy.kz aqparat agenttigi. 

El halqynyń densaýlyǵy máselelerin retteıtin sala basshynyń aıtýynsha, óńirlerdegi medısınalyq uıymdardy qaǵazsyz júıege aýystyrý maqsatynda jergilikti atqarýshy organdarmen birlesip arnaıy is-sharalar jospary engizilip jatyr. Eń aldymen, ol úshin aýdandyq jáne oblystyq deńgeılerdegi medısınalyq mekemelerdi ınternet jelisine qosý qajet.

«Sonymen qatar, dárigerler men meıirbıkelerdiń jumysyn kompúterlik tehnıkamen qamtamasyz etý jáne oǵan arnaıy medısınalyq baǵdarlamalar men aqparattyq júıelerdi engizý kerek. Qazir ınternet jelisine qosý úshin tehnıkalyq jáne geografıalyq máselelerge baılanysty qıyndyqtar týyndap jatyr», — dedi mınıstr.

Elimiz boıynsha aýdan ortalyqtaryndaǵy barlyq medısınalyq uıymdar ǵalamtorǵa qosylǵan.

«Aýyldardaǵy medısınalyq uıymdar men pýnktterge kelsek, olardyń barlyǵyn 2021 jylǵa deıin, úsh jyl boıy kezeń-kezeńmen sıfrlyq jumys formatyna kóshirý kózdelgen. Iaǵnı, osy jyldar ishinde aýyldardy ınternetke qosýdy jáne qaǵasyz júıege kóshirýdi 100 prosentke jetkizý josparlanyp otyr», — dedi mınıstr E. Birtanov.

E. Birtanov mınıstrliktiń medısınalyq saqtandyrýdy engizýdi pysyqtap, ony engizý úshin qarqyndy daıyndyq jumystaryn júrgizip jatqanyn baıandady. Medısınalyq uıymdardy medısınalyq saqtandyrýdy engizýge ázirleý úshin qaǵazsyz jumys formatyna kóshirý jumystaryn bıylǵy jyldyń sońyna deıin aıaqtaý kózdelgen. Qazirgi kezge deıin bul tórt óńirde engizile bastaǵan, olar: Qaraǵandy, Aqmola, Qostanaı jáne Batys Qazaqstan oblystary. Osy joba aıasynda buryn normatıvtik aktilermen talap etilgen 120-dan astam qaǵaz formalary joıylady.

«Birinshi kezekte, ol – aýrýhanalardaǵy emdelýshilerdiń syrqatnamalary men emhanalardaǵy ambýlatorıalyq kartalardaǵy jazbalar», — dep naqtylady mınıstr. 

Sondaı-aq joǵaryda atalǵan alǵashqy tórt óńirdiń tájirıbesin eskerýmen, 1 sáýirden bastap elimizdiń taǵy 4 óńirin osy jobaǵa tartý uıǵarylǵan, al 1 shildeden bastap taǵy tórt óńir qamtylmaq. Al tórtinshi toqsanda qalǵan 4 óńir qosylady.

«Osylaısha, bıylǵy jyldyń sońyna deıin barlyq óńirler negizgi medısınalyq qujattamalar boıynsha qaǵazsyz format júıesine kóshiriledi. Ol úshin qazir óńirlerde tıisti tehnıkalyq jáne baǵdarlamalyq qamtamasyz etý jumystary júrgizilip jatyr», — dedi E. Birtanov.

Sonymen qatar ol qazir barlyq óńirlerdegi aýdandyq ortalyq aýrýhanalar men emhanalar bul júıege qosylǵanyn jetkizdi. Budan ózge, mınıstr qazirgi tańda medısınalyq saqtandyrýdy engizýge qatysty jumystardyń júrgizilý barysyna naqty toqtaldy. Eske salaıyq, ótken jyly ózin-ózi jumyspen qamtyǵan halyq sanynyń joǵary bolýyna baılanysty mindetti áleýmettik medısınalyq saqtandyrýdy engizý merzimderi keıinge qaldyrylǵan bolatyn.

«Biz óz tarapymyzdan medısınalyq saqtandyrýdyń negizgi elementterin engizdik. Aqshalaı qarajattyń qorǵa túsýi búgingi tańda júzege asty, jumys isteıtin 5 mln astam azamattan 5 mlrd teńgege jýyq qarajat tústi. Bul qarajat 2019 jyly MÁMS engizilgen sátten bastap saqtandyrylǵan azamattarǵa jańa medısınalyq qyzmetterdi kórsetýge jumsalady», — dep túıindedi mınıstr.

Aıta keteıik, Qazirgi tańda densaýlyq saqtaýdy sıfrlyq jańartý maqsatynda 4 óńirde medısınalyq qujattardy pılottyq qaǵazsyz júrgizý iske qosyldy, medısınalyq uıymdardy aqparattyq júıelermen qamtý 75,5% qurady, kompúterlermen jaraqtandyrý 2,5 ese artty. Medısınalyq uıymdardyń 56% úshin ınternet qoljetimdi.