Astananyń ishki ister departamenti 23 jastaǵy boıjetkendi seksýaldy quldyq úshin 80 myń teńgege satyp jibergen 33 jastaǵy er adamdy ustady, dep jazady Qamshy.kz aqparat agenttigi İİM baspasóz qyzmetine silteme jasaı otyryp.

33 jastaǵy er adam 1994 jylǵy sybaılasymen birigip, 23 jastaǵy qyzdy seksýaldy quldyq úshin 80 000 teńgege satyp jibergen. Atalǵan fakti QR QK 128-baby (adam saýdasy) boıynsha sotqa deıingi tergeýdiń biryńǵaı tizimine tirkeldi. 

Sondaı-aq, İİM aqparatynsha, Almaty qalasynda qyzdardy aldap, seksýaldy quldyq úshin basqa oblystarǵa jiberýmen aınalysqan bir top adam ustaldy. Kúdiktiler 26 men 45 jas aralyǵynda. QK-niń 128-baby (adam saýdasy) boıynsha qylmystyq is qozǵaldy.

İshki ister organdarynyń arnaıy mekemelerine jeke basyn anyqtaý úshin 20 adam (QR azamattary – 11, TMD elderiniń azamattary – 9) jetkizildi.

İshki ister mınıstrligi 14-16 naýryz aralyǵynda rsepýblıka aýmaǵynda adam saýdasyna baılanysty qylmystardyń aldyn alýǵa, jolyn kesýge, anyqtaýǵa jáne ashýǵa baǵyttalǵan «STOP trafık» jedel-profılaktıkalyq is-sharasy ótkenin habarlady.

 Shara barysynda 51 qylmystyq zań buzýshylyq anyqtaldy, onyń ishinde:

— 1 – qanaý maqsatynda zańsyz bas bostandyǵynan aıyrý (QK-niń 126-baby);

—  4 – adam saýdasy (QK-niń 128-baby);  

—  1 – kámeletke tolmaǵandy saýdalaý (QK-niń 135-baby);  

—  6 – jezókshelikpen aınalysýǵa tartý (QK-niń 308-baby);  

— 39 – jezókshelikpen aınalysý úshin prıton uıymdastyrý nemese ustaý jáne jeńgetaılyq úshin (QK-niń 309-baby).   

Sondaı-aq qoǵamdyq oryndarda tıisý boıynsha (ÁQBtK-niń 449-baby) 81,  jezókshelikpen aınalysý jáne jeńgetaılyq úshin úı-jaılar usyný boıynsha (ÁQBtK-niń 450-baby) 16 ákimshilik quqyq buzýshylyq tirkeldi.