Elimizdiń kez kelgen qalasynda kózge túrpi, kóringenge kúlki bolyp turǵan kemshilikter kóp-aq. Sondaı soraqylyqtardy sýretke túsirip alyp, kópshilik nazaryna usynýdy dástúrge aınaldyrsaq ıgi. Al tıisti memlekettik mekemeler óz kezeginde mundaıǵa beıjaı qarap otyra bermeýi tıis.
Mysaly, biz Astananyń biraz kóshesinen memlekettik tildi shúldirletip qoıǵan jaıttardy keziktirdik. Abaısha aıtqanda, «betti basyp, qatty sastyq». Biraq, «tura qashqan» joqpyz. Oqyrmandar nazaryna usyný úshin nysanaǵa aldyq. Býrabaı demalys aımaǵynyń haıýanattar baǵyna soqqanda da qorshaý syrtyndaǵy jazýdy oqyp, jaǵa ustaǵanbyz...
Sodan, osynyń bárin ádettegideı qara sózben «túıregenshe», bir-bir shýmaq óleńmen áshkereleıik dep sheshtik.
Telefonnyń satylatyn túr-túri
Myna jerge baryp qaldyq bir kúni...
Aýdarmaǵa shorqaqtardyń osylaı,
Maǵynaǵa mán bermeýi kúlkili!
Namyssyzdar, mynalaryń ne, tipti?!
Usynǵanda, qaı biliksiz bekitti?
Ekeýiniń qazaqshasy kishkentaı,
Al bireýi «zanger» bolyp ketipti.
Avtobýsty tosyp turar saıam-aı,
Ornyńdy kim shúldirletti aıadaı?!
«Kózmergenniń» kózi tiri bolǵanda,
Nysanaǵa alar edi aıamaı!
Tilbuzarda joq uıat ta, óre de!
Úlkenderden almaǵan-aý ónege!
«Erkek kıim» degen eken,
Oý, sonda
Tóstartqyshty «urǵashy» dep bóle me?!
«Eń joǵary»?!. Túspeıtin ese kemge,
Tańsyq boldy myna bir esep elge.
Otyz bes, otyz alty, otyz jeti...
Astarynda suraqtyń neshe teńge?
Oryn berip otyrǵandaı tórden biz,
Qazaqshaǵa «qatty» kóńil bólgenbiz!
Myna jerde «k» ornyna «q»qoısa,
«Kólik júú» degendi de kórgenbiz.
Máńgúrtter shyǵarmaqqa eldiń esin,
Taǵy da kórsetedi endi nesin?!
It-qusqa neke tańǵan myna túrmen,
Adamdy «shaǵylysty» dep júrmesin!
Jáne de qoreqtenbes, qorektener...
Bul aýdarmasymaqqa sendirmesin!
Bankterdiń qazaqshasyn kórseńiz,
«Ekilikke» suranǵandaı ol semiz!
Alaqandaı chektiń ózi soraqy,
Nól bolyp tur, bir sát kóńil bólseńiz!
P.S. Tildiń jaıyn aıta salmaı qaqsap qur,
Túzetelik ulttyq rýhpen asqaq bir!
Basqalarǵa úlgi bolý ornyna,
Bas qalada qazaqshamyz aqsap tur...
Erkeǵalı BOLATULY
