26 naýryz kúni EO Joǵarǵy Ókili Vıse-prezıdent Federıka Mogerını "Beıbitshilik úderisi, qaýipsizdikti qamtamasyz etý jáne aımaqtyq yntymaqtastyq" atty Aýǵanstan jónindegi Tashkent konferensıasy qarsańynda Qazaqstan, Qyrǵyzstan, Tájikstan jáne Ózbekstan syrtqy ister mınıstrleri men Túrikmenstan Syrtqy ister mınıstriniń orynbasarymen kezdesti.
Atalǵan basqosý 2017 jyly qarashada Samarqan qalasynda ótken EO jáne Ortalyq Azıa syrtqy ister mınıstrleriniń resmı kezdesýinen keıin tórt aı, jáne Astanada Ortalyq Azıa memleketteri basshylarynyń tuńǵysh beıresmı kezdesýinen keıin eki apta aralyǵynda oryn alýda.
Tashkenttegi kezdesý EO jáne Ortalyq Azıa arasyndaǵy qarym-qatynastardyń oń úrdisterin talqylaý, sondaı-aq EO tarapynan aımaqtyq turaqtylyq pen gúldenýge, ári ózara tyǵyz aımaqaralyq baılanystardy damytýǵa baǵyttalǵan joǵary mańyzdylyǵyn kórsetýge múmkindik berdi. Eýropalyq Odaq aımaq elderiniń damý máseleleri, qaýipsizdik, terorızmge qarsy kúres jáne qorshaǵan ortany qorǵaý máseleleri boıynsha mańyzdy áriptesi bolǵandyqtan Federıka Mogerını jáne mınıstrler ózara yntymaqtastyq bolashaǵyn talqylady.
Bul kezdesý sondaı-aq mınıstrlerge Ortalyq Azıa úshin jańa EO strategıasy boıynsha qosymsha pikir almasýǵa múmkindik berdi. Federıka Mogerını jáne mınıstrler jańartylǵan strategıada turaqty damý, reformalaý jáne modernızasıa, adam quqyqtary, zań ústemdigi men tıimdi basqarý, bıznes, qaýipsizdik, aımaqtyq yntymaqtastyq jáne ózara árekettestik sekildi basymdyqtar qalaısha kórinis tabatynyn talqylady. Sonymen qatar Eýropalyq Odaqtyń Joǵarǵy Ókili mınıstrlerge Eýropa men Azıa arasyndaǵy ózara is-qımyl jónindegi jańa Strategıany daıyndaý boıynsha jumys jáne onyń Ortalyq Azıa elderi úshin ózektiligi týraly habardar etti.
Aýǵanstan boıynsha Tashkent konferensıasynyń qarsańynda Federıka Mogerını Aýǵanstanda beıbitshilik pen gúldenýdi nyǵaıtýǵa óz mindettemelerin qamtamasyz etý úshin óńirlik seriktester, sonyń ishinde halyqaralyq qoǵamdastyq mańyzdylyǵyn atap ótti. Temir jol jáne qubyr joldaryn salý, áýe baılanysyn damytý, sondaı-aq osy baǵyttaǵy mańyzdy qadamdar sekildi Aýǵanstanmen qarym-qatynasty nyǵaıtý úshin Ortalyq Azıa elderiniń qatysýymen naqty aımaqtyq jobalarǵa qoldaý bildiriledi. Kezdesý qatysýshylary Aýǵanstandaǵy qaqtyǵystyń tek beıbit sheshý joly bar, ári bul múmkindikti «Talıban» qozǵalysy qoldanýǵa tıis ekenine kelisti.
Joǵarǵy Ókil Mogerını jáne mınıstrler Túrikmenstanda ótetin EO-Ortalyq Azıa Saıasat jáne qaýipsizdik máseleleri jónindegi joǵary deńgeıdegi dıalogtyń kezekti basqosýy, Ózbekstandaǵy Ortalyqazıalyq ekologıalyq forýmy, jáne de Terorızmmen kúres pen kúshteý ekstremızmdi aldyn alý boıynsha aımaqtyq konferensıa men Sý resýrstary boıynsha halyqaralyq konferensıa barysynda aldaǵy eki aı ishinde joǵary deńgeıdegi baılanystardy jalǵastyrýǵa nıet bildirdi. Sońǵy eki is-shara 2018 jyly Brússelde EO men Ortalyq Azıa syrtqy ister mınıstrleriniń kezekti resmı kezdesýine deıin Tájikstanda ótedi.
