Búgin Almatyda Memlekettik qyzmet isteri jáne sybaılas jemqorlyqqa qarsy is-qımyl Agenttiginiń uıymdastyrýmen jáne Almaty qalasy ákimdigi men Ál-Farabı atyndaǵy QazUÝ-niń qoldaýymen ótken joǵary oqý oryndarynyń «Sanaly urpaq- jarqyn bolashaq» atty respýblıkalyq forýmynda bilim salasyndaǵy jemqorlyqqa qarsy is – qımyldyń barynsha aktýaldy máseleleri talqylandy.

Agenttik tóraǵasy Alık Shpekbaev óziniń sózinde elimizde jemqorlyq deńgeıiniń tómendeýine qaramastan, bilim júıesinde jemqorlyq qaýpiniń aıtarlyqtaı beleń alǵandyǵyn aıtty. Bilim jáne ǵylym granttaryn bólý, búdjet qarjysyn ıgerý, basshy quramdy irikteý, bilim berý uıymdary qyzmetkerleriniń kategorıasy men júktemesin anyqtaý máseleleri ashyq júrgizilmeıdi, jemqorlyq qaýpin anyqtaý júıesi men saraptama jasaý joqtyń qasy, jemqorlyqqa jol bergen qyzmetkerleri úshin basshylar jeke jaýapkershilikke tartylmaıdy.

«Búgingi kúni elimizdiń túbegeıli jańarýy jaǵdaıynda adamı kapıtaldy damytý mindeti aldyńǵy orynǵa shyǵýda, óıtkeni ol Qazaqstannyń álemniń básekege qabiletti memleketter qataryna enýinde mańyzdy shart bolyp tabyldy. Memleket basshysynyń qoldaýy arqasynda sońǵy 15 jyl ishinde bilim salasyna jumsalǵan qarjy 10 ese artty. Osy jyldar ishinde Qazaqstan halyqaralyq bilim keńistigine batyl ene tústi. Degenmen, bilim salasy jemqorlyq qaýpiniń beleń alýyna tym beıim. Biz jemqorlyqty joıý sharalary kópshiliktiń, sonyń ishinde bilim salasyndaǵy adamdardyń qoldaýyna ıe bolady degen senimdemiz», - dedi ol.

Óz kezeginde Almaty ákimi Baýyrjan Baıbek memlekettik organdardyń ashyqtyǵy, esep berýi, tazalyǵy barysynda jáne olardyń azamattyq qoǵammen belsendi yntymaqtastyǵy jaǵdaıynda ǵana jemqorlyqqa qarsy sharalardyń tıimdiligi artatynyn atap ótti.

«Qazirgi kezde elemizde jemqorlyqqa qarsy is- qımyldyń barlyq quqyqtyq quraldary jasalǵan. Memleket basshysynyń Jarlyǵymen Qazaqstan Respýblıkasynyń Jemqorlyqqa qarsy strategıasy bekitilgen, «Jemqorlyqqa qarsy is- qımyl týraly», «Qoǵamdyq keńes týraly», «Aqparattyń qoljetimdiligi týraly» mańyzdy zańdar qabyldanǵan. Bizdiń ortaq mindetimiz – jemqorlyqty múldem qabyldamaıtyn ashyq oılaýdy, quqyqtyq jáne qarjylyq mádenıetti qalyptastyrý, turmystyq jemqorlyqty joıý. Memlekettik organdarǵa kelgen árbir jan keıde keleńsizdikke tap bolady. Mundaı jaısyz jaǵdaı bilim, densaýlyq saqtaý mekemeleri nemese quqyq qorǵaý organdarynda kezdesýi múmkin. Sondyqtan bıyl ákimdiktiń barynsha aktýaldy 10 qyzmeti «paper-free» qaǵıdasy boıynsha elektrondy formatqa kóshiriledi», dedi Baýyrjan Baıbek.

Ol óziniń sózinde bala baqsha, mektep jáne turǵyn úı kezegin elektrondy júıege kóshirý azamattardyń memlekettik organdar jumysyn baqylaýǵa, osy máselelerde qyzmetti asyra paıdalanýǵa jol bermeıtindigin atap ótti. Megapolıs basshysy Almatyda «Sıfrly Qazaqstan» baǵdarlamasy boıynsha «qaǵazsyz aýrýhanalar» júıesine tolyq kóshýdiń josparlanǵanyn aıtty.

Aıta keterligi, memlekettik qyzmettiń sapasyn arttyrý jáne jedeldetý maqsatynda ótken jyly ákimdiktiń «Open Almaty» qoaǵmdyq qabyldaýy jumys isteı bastady, quqyqtyq qyzmet kórsetý Ortalyǵy ashyldy, qurylysqa ruqsat alý men komýnaldy júıege qosylý prosesteri elektrondy formatqa kóshirildi.

«Kóleńkeli» ekonomıkamen kúres aıasynda qoǵamdyq kólik pen kóshe turaqtarynda aqysyz tólem engizildi. «OŃAI!» júıesiniń enýi barysynda saladan kóleńkeli tabystyń 50% shettetildi. Aqyly turaqtardyń tıimdiligi artty, búdjet túsimi 5 esege kóbeıdi.

Jergilikti polısıa qyzmeti boıynsha bıylǵy jyly qujattardy elektrondy túrde rásimdeý úshin planshettermen jáne prınterlermen 100% qamtý josparlanǵan.

Dál osy kúni Almaty ákimi Baýyrjan Baıbek pen Memlekettik qyzmet isteri jáne sybaılas jemqorlyqqa qarsy is- qımyl Agenttiginiń tóraǵasy Alık Shpekbaev bilim salasyndaǵy jemqorlyqqa qarsy is-qımyldyń elimizdegi alǵashqy «Sanaly urpaq» atty ofıstik jobasymen tanysty.

Ál- Farabı atyndaǵy QazUÝ-niń bazasynda ashylǵan ofıs jemqorlyqqa qarsy is- qımyl boıynsha arnaıy ádistemeler men baǵdarlamalar shyǵarýdy josparlaǵan. Bulardan ózge, qazirgi kezde joo-nyń, kolejder men mektepterdiń reıtıńin anyqtaıtyn, sonymen qatar akademıalyq shynaıylyǵyn belgileıtin, benchmark júıeler qolǵa alynýdak, oqý ornynyń ár tıpi úshin jemqorlyqqa qarsy mehanızmder engizilýde. Oqý ornynyń ár kategorıasy úshin oqytýshylar qyzmetin baǵalaıtyn júıe jasalýda.