Kúndelikti jumys apary barysynda Almaty ákimi Baýyrjan Baıbek halyqaralyq «Saıran» avtovokzalynyń ǵımaraty men onyń aınalasyn jáne «Saıahat» avtobeketin aralap kórdi. Megapolıs basshysy «Saıran» avtovokzalynyń kópten beri halyqaralyq deńgeıge saı emestigin, sondyqtan qaıta jóndep, menedjment modelin qarastyrý qajettigin atap ótti.

Almatyda «Týrızmdi damytýdyń 100 qadamy» jol kartasy aıasynda qala servısi men onyń ınfraqurylymyn jaqsartý boıynsha jumys odan ári jalǵasýda. Osydan birneshe kún buryn ǵana «QTJ» UK» AQ-men birge «Almaty-1» jáne «Almaty-2» vokzaldaryn rekonstrýksıalaý men qyzmet sapasyn jaqsartý barysynda birikken jospar qabyldanǵan edi. Degenmen, megapolıstiń avtomobıl vokzaldarynyń jaǵdaılary qanaǵattanǵysyz bolǵandyqtan jańartýdy qajet etedi.

Búgingi kúni «Saırannyń» vokzal aldy aınalasynda birqatar qurylystar bar, keńestik modernızm stılinde salynǵan ishki árleýdiń elementteri men ǵımarattyń syrtqy kelbeti burynǵy beınesinen birshama aırylǵan, sonyń saldarynan arhıtektýralyq biregeıligin joıý qaýpi bar.

İshki týrızm áleýetin damytýdy eskerip Baýyrjan Baıbek kún saıynǵy jolaýshy legi 1200 adamdy quraıtyn avtovokzal aınalasyn retke keltirýdi jáne onyń ǵımaratyn jóndeýdi tapsyrdy. Zańnamaǵa sáıkes nysandy jergilikti mańyzy bar tarıhı esekrtkishter tizimine engizý máselesi qarastyrylady. Aıta keterligi, buryndary megapolıs basshylyǵy quny 20,2 mlrd. teńgeni quraıtyn «Batys» avtovokzalyn salý jónindegi jobany bekitpegen edi.

«Ótken jyly bastalǵan qalany qaıta jańǵyrtý aıasynda biz Almatyǵa burynǵy tarıhı kelbetin qaıtarýdamyz. Eń aldymen, nysandardy alǵashqy beınelerin saqtaý qadjet. Sarapshylardy tarta otyryp, jolaýshylar leginiń logıstıkasyn tolyq qaıta qaraǵan jón. Iaǵnı biz tarıhı nysandy qalpyna keltirip, vokzaldyń barsha qyzmetin jańasha júrgizip, ony qalanyń kólik habyna aınaldyramyz», - dedi Baýyrjan Baıbek.

Qazirgi kezde avtovokzal aınalasynda zańsyz salynǵan qurylystar alynýda. Avtovokzal aınalasynda buryndary saýdamen aınalysqan kásikerlerge aýdannyń saýda oryndary men bazarlarynann jeńildetilgen oryndar usynylady.

Almaty ákimi jumys sapary barysynda qala mańyndaǵy eldi mekenderge qyzmet kórsetetin «Saıahat» avtobeketi men onyń aınalasyn aralap kórdi. Jer ýchaskesiniń ıeleri onyń aınalasyn abattandyrý boıynsha tıisti jumystardy bastaýǵa jáne odan ári damytý jónindegi naqtyly jospardy qysqa merzimde usynýǵa mindettendi.