Almaty ákimi kúndelikti jumys sapary barysynda megapolıstiń kósheleri men aýlalaryn abattandyrý jóninde birqatar tapsyrmalar berdi jáne Bostandyq aýdanyndaǵy Gagarın kóshesiniń jóndelýin tekserdi.

Almatyda bıylǵy jyly uzyndyǵy 155 km bolatyn 157 kósheni jóndeý, sonymen qatar Maqataev, Baıtursynov jáne Jarokov kóshelerindegi tramvaı joldaryn alyp tastaý men olardy abattandyrý josparlanǵan. Almatyny rekonstrýksıalaý aıasynda birqatan negizgi dańǵyldar men kósheler, sonyń ishinde Abaı, Abylaıhan, Dostyq, Nazarbaev dańǵyldary jáne basqalary jańarady, modernızasıalanady.

Gagaırn kóshesin aralaǵan kezde qala basshysyna jyl aıaǵyna deıin Bostandyq aýdanynda 36 kósheniń jóndeletini, 11 qosymsha beket keshenderiniń ornatylatyny baıandaldy. Uzyndyǵy 7,4 km. bolatyn aryq júıesi jańarady. 12 jer asty jáne 7 jer ústi ótpeli joldardy jóndeý josparlanǵan. Aýdan turǵyndarynyń ótinishi boıynsha «Iýjnyı» jáne «Drýjba» saıabaqtary retke keltiriledi.

Gagarın kóshesi boıyndaǵy trotýarlar júrginshiler úshin abattandyrylady, aryq naýalary qoıylyp, qajetsiz konstrýksıalar men qoǵamdyq keńistiktegi zańsyz qurylystar alynady, kósheler jasyldandyrylady.

Sonymen qatar, eger ótken jyly Bostandyq aýdanynda 30 aýla kúrdeli jóndeýden ótse, bıylǵy jazda 130 aýla jańarady.

«Shyndyǵyna kelsek, árqaısymyz úshin qala óz aýlamyzdan bastalady. Kósheler men dańǵyldardy qaıta jańǵyrtyp, almatylyq aýlalardyń qazirgi jaǵdaıyna kóz jumyp qaraı almadyq. Sondyqtan Memleket basshysynyń Joldaýyn jáne «Prezıdenttiń bes áleýmettik bastamasyn» eskere otyryp, biz búdjetti qaıta qarap, oǵan barynsha áleýmettik negiz berdik, ári naqtyly jobalar men nátıjelerge baǵyttadyq. Eger ótken jyly biz 455 aýla alańdaryn abattandyrsaq, bıylǵy jyly qalanyń barlyq aýdandarynda 585 aýla qosymsha jóndeletin bolady», - dedi Baýyrjan Baıbek.

Aıta keterligi, Almaty ákimi buryndary trotýarlardy tekserýden ótkizip, jaıaý júrginshi qozǵalysyn qıyndatatyn zańsyz salynǵan qurylystardan arylýdy tapsyrǵan edi. Stıhıaly turaqtardyń aldyn aalý jáne júrginshi qaýipsizdigin kúsheıtý maqsatynda kósheden kiretin qozǵalysty taryltý jáne trotýrarlardy tıisinshe kórkeıtý josparlanǵan.