Almatyda ıtter men mysyqtardy ustaý jáne serýendetýdiń jańa qaǵıdasy bekitildi. Endi kez kelgen jerde úı janýarlaryn erkin alyp júrýge bolmaıdy. Erejege baǵynbaǵandar jazaǵa tartylyp, aıyppul tóleıdi. Atalmysh qujat «Úı janýarlarynyń ıgiligi 2017-2020» jol kartasy aıasynda ázirlendi.

Jańa qaǵıdaǵa sáıkes, ıtterdiń barlyq tuqymdary baqylanatyn uzyndyqqa deıin júre alady. Al 32 ıttiń túrine ıeleriniń erekshe jaýapkershiligi júktelgen. Erejege sáıkes, janýarlardy úı jaǵdaıynda ustaǵanda tazalyq saqtalmasa, máselen, shý men ıiske kórshilerden shaǵym tússe - sot tártibi arqyly janýarlarǵa tyıym salynýy múmkin.  Itterdi serýendetý úshin qarǵybaý men tumyldyryq taǵyp qoıý mindetti.

«Itterdi serýendetý jáne buzý erejesin buzǵandarǵa Ákimshilik quqyq buzý kodeksiniń 408-babyna sáıkes ákimshilik jaza qoldanylady. Ol birinshiden, eskertý, al ekinshi ret buzsa 3 aılyq AEK», - dedi  Almaty qalalyq Aýylsharýashylyǵy jáne veterınarıa basqarmasynyń bólim basshysy  Nurlan TÁSHİMOV.

Nadejda Krasnoshekovanyń býlterer tuqymdas eki ıti bar. Janýarlardy jaqsy kóretin ol óziniń maqulyqtaryn adamǵa zıany joq, bótenge tis batyrmaıdy deıdi. Itterine tumyldyryq kıgizgendi unatpaıdy eken. Degenmen, tórt aıaqtynyń bári birdeı tilalǵysh emes. Jańa qaǵıda jalpy qoǵam úshin tıimdi, deıdi Nadejda.

«Meniń oıymsha, ıtterdiń tuqymy men onyń kólemine qaramastan barlyǵyn arnaıy oryndarda jattyqtyryp, úıretý kerek. Men eki ıtimdi solaı tárbıeleımin. Itti balalar júretin oryndardy qarǵybaýmen alyp júrý degen durys shyǵar. Jalpy ózimniń ıtterim eshkimdi qappaıdy, sonda da ereje bolǵandyqtan tumyldyryqty umytpaı alyp júremiz», - dedi Nadejda Krasnoshekova.

Jańa qaǵıdaǵa sáıkes tyıym salynǵan belgileri bar balabaqsha men sport alańdarynda, mektepke deıingi jáne mektep mekemelerinde, sondaı-aq medısına oryndarynda ıtterdi serýendetýge tyıym salynady. Ieleri ózderimen birge arnaıy paketterdi alyp júrýge mindetti.

Jańa erejeniń taǵy bir jaǵy - joǵalǵan janýarlardy biryńǵaı esepke alýdy jáne izdeýdi jeńildetý úshin Almaty qalasy aýmaǵyndaǵy barlyq ıtter men mysyqtar biryńǵaı ıdentıfıkasıalyq derekqorda tirkeledi. Máselen, qazir qalada resmı tirkelgen 127 myń ıt bolsa, budan bólek 120 myńdaı qańǵybas ıt bar, deıdi mamandar. Bılik úısiz janýarlardyń sanyn retteý maqsatynda ıtter men mysyqtardy baqylaýsyz ósirýge jol bermeýge shaqyrady. Eger úı janýaryn ıesi ári qaraı asyraýǵa jaǵdaıyńyz bolmasa basqa menshik ıelerine, mamandandyrylǵan kásiporynǵa nemese basqa uıymdarǵa berýge mindetti. Budan basqa, qala aýmaǵynda ıtterdiń jekpe-jekterin ótkizýge jol berilmeıdi.