Áleýmettik jelide Aqqalı esimdi balanyń Allaǵa jazǵan haty taralyp jatyr, dep habarlaıdy Qamshy.kz aqparat agenttigi. 

Alǵashynda balanyń meshitke jazyp qaldyrǵan hatyn Mańǵystaý oblysynyń bas ımamy Smaıl Seıtbekov jeke paraqshasyna jarıalap, jurtshylyqpen bólisken. 

Bala hatynda ózimizdiń úıimiz bolsa eken degen tilegin aıtady. 

"Ózimizdiń úıimiz bolsa eken. Ákem tez jumysqa ornalassa eken. Anam tez aılyq alsa eken. Men besinshi synypqa ótsem eken. Ápkem testten júz bal alyp, teh mektepti bitirse eken. Álemdegi eń baqytty otbasy bolyp keteıik. Anamnyń qursaǵyndaǵy sábı táýir bolyp dúnıege kelse eken", - dep tilek jazylǵan taralǵan hatta.

Atalmysh hatty óziniń Instagram paraqshasynda bólisken belgili IT mamany Tımýr Bektur: "Tórtinshi synyp oqıtyn balanyń oıynda qanshama dúnıe, qanshama tilek, qanshama psıhologıalyq kúızelis, qansha oı jatyr... Meniń oıymsha, bul bala áli talaı jerdi jerdi jaryp shyǵady. Sebebi, kóp bala mundaı deńgeıde oılamaıdy, oılasa da jaza almaıdy, jazsa da álemderdiń Rabbysy Jaratqanǵa adresattaý oıyna kele bermeıdi. Sondyqtan, Allah Taǵala osy bir balapannyń tilegin qabyl etsinshi, otbasynda bereke ornasynshy degim keledi. Ámın",-dep pikir bildirdi. 

Jeli qoldanýshylary Aqqalıdiń júreginen shyqqan tilegine tánti bolyp, jandary ashysa, endi biri kómek qolyn sozýǵa daıyn ekenin jazǵan.

"Janym-aý, tilegiń qabyl bolsyn, perishtem!", "Balalar baqytty bolý úshin jaralǵan. Balanyń baqytyn urladym aý dep oılanbas pa eken osy balanyń ákesi",-dep qoldanýshylar pikir qaldyrǵan. Sondaı-aq, pikir bildirýshilerdiń birazy búgin, 15-mamyr Halyqaralyq otbasy kúni ekenin eske salady.