Brıtandyq  Sunday Times basylymy eldiń eń baı adamdarynyń tizimin jarıalady. Ol tizimge Anglıa azamattarynan bólek Birikken koróldikte turaqtap, tabys taýyp júrgen bıznesmender de kirdi. Olardyń arasynda Qazaqstandyq Vladımır Kım bar.

Sunday Times basylymynyń tiziminde qazaqstandyq bıznesmenge 93-oryn buıyrypty. Onyń baılyǵyn brıtandyq basylym 1,9 mlrd dollarǵa (1,4 mlrd fýnt) baǵalady.

Tizimge sáıkes Vladımır Kım patshaıym II Elızavetanyń aldyn orap ketken. Patshaıym 344 orynnan kórindi, al onyń baılyǵyn brıtandyq basylym 370 mln fýntqa baǵalady.

Forbes-tiń 2018 jylǵy eń baı adamdarynyń tiziminde Kımniń baılyǵy 3,1 mlrd dollarǵa baǵalanyp, álemdik reıtıńte 776-orynnan kórindi.

Ol – qymbat metaldar óńdeýmen aınalysatyn «KAZ Minerals» tobynyń prezıdenti ári aksıoneri. KAZ Minerals búgingi tańda Londonda da jumys istep, memlekettik qazynasyna aqsha quıyp otyr.

2010 jyly Vladımır Kım aksıasynyń jarty bóligin satyp, 838 mln fýnt paıda kórdi. 2016 jyly Qazaqstan úkimetimen sátti júrgizilgen kelissózderdiń arqasynda kompanıa oǵan 454 myń fýnt tóledi.

Derekterge súıensek, Londonnyń dál ortalyǵyndaǵy One Hyde Park ǵımaratynda Vladımır Kımniń páteri bar. Ondaǵy eń arzan páterdiń quny – 20 mln fýnt. Bıznesmen keı ýaqyttarda Qazaqstanǵa da kelip turady.

Vladımır Kımnen ózge tizimge TMD elderiniń 15 mıllıoneri kirdi.