Elimizdiń táýelsizdik týy jelbiregenine 27 jyl. Osy aralyqtar kóptegen ózgerister oryn aldy. Qazirgi tańda jańa tehnologıalarmen oqytý júıeli jolǵa qoıylyp keledi. Iaǵnı bilim berýdi jańǵyrtý – búgingi zamannyń talaby. Elbasynyń jyl saıynǵy Joldaýynda da bilim salasy qalys qalyp kórgen emes. Batys Qazaqstan  oblysyndaǵy bilim salasy jańashyldyqqa umtylýda ınjenerlik oqytý, ınovasıalyq zertteýlerdi jetildirý sekildi tyń bastamalardy qolǵa alýda. Ásirese bilim salasy sıfrlandyrý boıynsha ońdy kórsetkishterge qol jetkize bastady. BQO-daǵy 380 mektep «Bilimland» bilim berý portalyna jáne 143 mektep «Kúndelik» elektrondy jýrnalyna qosyldy.

Osy oraıda Batys Qazaqstan  oblystyq bilim basqarmasynyń basshysy Sholpan Qadyrova oblystaǵy bilim salasyna jańa portal engizilgeli jatyrǵanyn aıtty. Onyń málimetinshe, qaladaǵy jáne aýdan ortalyqtaryndaǵy mektepterge  qyrkúıek aıyna deıin «Bilimland» portaly qosylmaq. Sondaı-aq oblys boıynsha mektep kabınetterindegi 14 073 kompúterdiń  7718-i ábden tozyǵy jetken eken. Bıyl sol olqylyqty túzeý úshin 220 720,0 mln. teńgege kompúter, ekran, proektor sekildi mýltımedıalyq jabdyqtar satyp alynady eken. Tipti 567 Bilimbook transformer-kompúteri qoldanysqa berilmek. Barlyq mektepke keń jolaqty ǵalamtor engizý úshin 145 258 myń teńge qarastyrylǵan. Sonymen birge ózge de birqatar jańa jobalar iske asyrylatyn bolady.

Hákim Abaıdyń  «Balań bilimdi, parasatty bolsyn  deseń malyńdy aıama» degen keremet sózi bar. Sondyqtan bilimdi urpaq tárbıeleý úshin  bilim salasyna jyl saıyn  qyrýar qarjy qarastyrylyp keledi.Bolashaq mamandardyń  saýatty da bilim bolýy bilim oshaqtaryndaǵy durys oqytýdyń nátıjesine baılanysty. Búgingi oqýshy – erteńgi maman. Saýatsyz, jańa tehnologıany meńgermegen oqýshydan erteńgi jaqsy maman shyqpaıtyny belgili.  Sondyqtan óńirdegi bilim salassyna jasalyp jatyrǵan jańa bastamalar jalǵasyn taba bermek.

          Sondaı-aq sybaılas jemqorlyqtyń bilim salasyn da aınalyp ótpegeni anyqtaldy. QR Sybaılas jemqorlyqqa qarsy is-qımyl ulttyq búrosynyń

BQO boıynsha departamentiniń basqarma basshysy Arnur Axanovtyń aıtýynsha, 2016 jyldyń basynan búginge deıin departamentte bilim salasynda oryn alǵan 17 jemqorlyq áreketi tirkelgen. Nátıjesinde 15 azamattyń ústinen is qozǵalyp, onyń altaýy bas bostandyǵynan aıyrylǵan.

-Mysaly  Oral qalasyndaǵy daryndy balalarǵa arnalǵan mamandandyrylǵan S. Seıfýllın atyndaǵy №11 oblystyq qazaq mektep- ınternat kesheninde esepshi qyzmetin atqarǵan Orazbaeva men Álimova jeke shottaryna zańsyz aqsha aýdaryp, 74 mln.  teńge jymqyrǵany úshin 3,5 jylǵa abaqtyǵa qamaldy. Sonymen qatar №45 orta mekteptiń burynǵy dırektory Daýmovaǵa turmystyq jaǵdaıy tómen otbasy balalarynyń tamaqtanýyna qatysty jalǵan qujattarǵa qol qoıyp, para alǵany úshin 3,6 mln.teńge kóleminde aıyppul salyndy. Bilim salasy memleket tarapynan úlken qoldaý taýyp otyr. Ótken jyldyń ózinde atalǵan salaǵa 65,5 mlrd. teńge bólindi. Qarjynyń tıisti jerge jumsalýyn qadaǵalap, ekijaqty birigip jumys isteýimiz kerek, – dedi Arnur Qýanyshuly.