« ...  Qazirgi densaýlyq saqtaý isi qymbatqa túsetin stasıonarlyq emge emes, negizinen aýrýdyń aldyn alýǵa baǵyttalýǵa tıis».

QR Prezıdenti N. Nazarbaevtyń  «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» Joldaýynan

Oral qalasyndaǵy  «Park  Hotel»  qonaqúı kesheninde «Saý bala – baqytty ana»  atty respýblıkalyq  áleýmettik-medısınalyq  semınar ótti. Atalmysh shara perzentterine ekpe saldyrmaǵan ata-analarǵa ımmýnoprofılaktıkalyq  vaksınanyń  tıimdiligin túsindirý maqsatynda uıymdastyryldy.

Jıynǵa  QR  Densaýlyq saqtaý mınıstrligi  qoǵamdyq densaýlyq saqtaý komıtetiniń bas sarapshysy Nurshaı Ázimbaeva, QR Densaýlyq  saqtaý mınıstrligi SESjM ǴPO  departamentiniń epıdemıolog dárigeri Lena Qasabekova, sondaı-aq  BQO qoǵamdyq densaýlyq saqtaý departamentiniń basshysy  Jaıdar  Qurmanov pen oblystyń ókil ımamy Erkebulan Qaraqulov qatysty.

Sońǵy jyldary vaksınaǵa birqatar ata-analardyń qarsylyq tanytqany málim. Aıta ketsek, oblys boıynsha jalpy 959 bala ekpe almaǵan. Immýnoprofılaktıkalyq vaksınaǵa qarsylyq tanytqan ata-analardyń 76,1%-y dinı sebepterdi jeleý etse,  jeke kózqarastary boıynsha 14,4%, al ekpeniń tıimdiligine 9,4%-y senimsizdik tanytqan. Sala mamandarynyń aıtýynsha, keı ata-analar  ǵalamtordaǵy túrli arandatýshy aqparttarǵa senip, ul-qyzdaryna vaksına saldyrýdan bas tartqan.

• Balalarǵa ekpe jasaý – medısınanyń úzdik jetistikteriniń biri. Ekpe arqyly mıllıondaǵan bala ólimnen, múgedektikten aman qalýda. Alaıda sońǵy kezde ekpege qarsy shyǵatyndardyń qarasy kóbeıdi. Ásirese, Almaty, Aqtóbe, Batys Qazaqstan oblystarynda ekpege qarsy ata-analar kóp.  Bizdiń búgingi maqsatymyz – sol ata-analarmen  arnaıy kezdesip, olardyń ekpe týraly úreıli oılaryn seıiltý, - dedi  QR Densaýlyq saqtaý mınıstrligi qoǵamdyq densaýlyq saqtaý komıtetiniń bas sarapshysy Nurshaı Ázimbaeva.                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                            

Sodan soń BQO   qoǵamdyq  densaýlyq saqtaý departamentiniń basshysy Jaıdar Qurmanov  ekpeniń paıdasyn nasıhattaý týraly  óńirdegi  atqarylǵan jumystarǵa toqtaldy. Onyń aıtýynsha,  2016 jyly oblys boıynsha 160  bala ekpe almasa, byltyr  bul kórsetkish 134-ke azaıǵan.   Sondaı-aq 2015 jyly  oblysta ata-anasy ekpeden bas tartqan tórt jasar búldirshin týberkýlez dertine shaldyqsa, 2017 jyly balalar arasynda eki kókjótel oqıǵasy tirkelgen.

Bir kezderi beleń alǵan  qaýipti indetter ekpeniń nátıjesinde joıylǵandyǵy týraly  QR Densaýlyq saqtaý mınıstrliginiń epıdemıolog dárigeri  Lena Qasabekova  naqty derekter arqyly túsindirdi.

- Ekpeniń nátıjesinde álem boıynsha beleń alǵan sheshek derti joıyldy.  Jalpy, medısınada ekpeniń nátıjesinde kóptegen aýrýlardyń aldyn alýǵa bolatyndyǵy dáleldendi.  Aıta ketsek, 2005-2006 jyldary respýblıkada qyzylsha dertimen naýqastanǵandar sany  1700-1800 bolsa, 2017 jyly bul dertpen eshbir naýqas tirkelmegen. Sondaı-aq qyzamyq  boıynsha da jyl saıyn elimizdegi 2000-3000  turǵyn em alyp júrse, búgingi tańda atalmysh dertpen naýqastanǵandar joq. 1995 jyldary elimizde dıfterıa, ıaǵnı kúl aýrýy jappaı beleń alǵany belgili. Jylyna 1000-nan asa adam qaýipti dertti juqtyratyn. Qazir ol aýrýdan da qutyldyq.  Sońǵy derek  2008 jyly ǵana tirkelgen. Sonymen qosa 1998 jylǵa deıin V vırýsty gepatıtimen jylyna 3500-4000  adam naýqastansa, búginde  eresekter arasynda 90-100  jaǵdaı ǵana tirkelip otyr, - dedi Lena Quralǵazyqyzy.  Al óńirimizdiń ókil ımamy Erkebulan Qaraqulov ekpeniń ıslam sharıǵatyna qaıshy emes ekenin túsindirdi.