Jýyrda Batys Qazaqstan  oblysy ákimi Altaı Kólginovtiń tóraǵalyǵymen BQO-ǵa  ınvestısıa tartý jáne ınvestısıalyq ahýaldy jaqsartý jónindegi óńirlik keńes otyrysy ótti. Jıynda eki ınvestısıalyq joba talqylanyp, maquldandy.

Aldymen Oral qalasynda qatty turmystyq qaldyqtardy basqarý júıesi boıynsha  keshen qurylysy jobasy tanystyryldy. Jobany iske asyrýdy qolǵa alǵan «Baltic tade hose» basqarmasynyń múshesi, «Green Servise Company» JSHS-nyń ókili, Fınlándıa Respýblıkasynyń azamaty Kalver Kapperdiń aıtýynsha, osy kóktemde qaldyqtardy irikteıtin jeli qurylysy bastalady. Onda 80 adamǵa jumys beriledi. Oral qalasynyń bir turǵyny jylyna 300 keli shamasynda qaldyq tastaıdy. Bul joba boıynsha qaldyqtardyń 60 paıyzyn óńdep, kádege jaratýǵa bolady. Qazir qoqys  polıgonynyń paıdalaný merzimin 15 jylǵa uzartý maqsatynda elektr jáne jylý qýatyn óndiretin bıogaz stansasynyń qurylysy jobalanýda. Qaldyqtardy irikteý jelisinen shyqqan qaldyq túrleri odan ári óńdeledi. Qaǵazdan qaptama materıaldar, jumyrtqaǵa uıashyq qaǵaz, ájethana qaǵazy, plasıkten plasık túıirshikteri, halyq tutynatyn taýarlar, paketter jasalady. «Qazir jergilikti bılik oryndarymen úılesimdi baılanys ornatyp, turǵyndardyń, ásirese, mekteptegi balalar arasynda aqparattyq-túsindirý jumystaryn júrgizýimiz kerek. Qaldyqtardy irikteý jelisi qýatty, sondyqtan qalanyń qaldyqtary bizge azdyq etedi. Aýyl-aımaqtan da turmystyq qaldyqtardy qabyldaımyz», –degen Kalver Kapper jer telimi bólinse, atalmysh jeliniń bıyl salynatynyn jetkizdi. Onyń sózine súıensek, Fınlándıada turmystyq qaldyqtardyń 98 paıyzy óńdeledi, sondyqtan qaldyqtar polıgony bul elde joq. Tipti qoqys qaldyqtary jetpegendikten, ony ózge elderden satyp alady. – Birinshi kezeńde polıgon-daǵy ınfraqurylymdy jaqsartamyz. Qazir onda ınfraqurylym atymen joq. Qaldyqtardy irikteý jelisin salamyz. Ekinshi kezeńde qaldyqtar óńdeledi. Al úshinshi kezeń - bıogaz stansasyn (qýattylyǵy 1MVt) salý. Munyń barlyǵyn úsh jyl ishinde salyp, iske qosamyz. Polıgondy zerttedik, onda bıogaz janyp ketken. Sondyqtan mamandarymyz gaz jınalǵansha ony jaýyp qoıady,– dedi Kalver Kapper oblys ákiminiń bıogaz stansasy qurylysyna qatysty qoıǵan saýalyna oraı.

Jobany júzege asyrýshylar qaldyqtardy irikteý jelisine 1,5 mln. eýro, bıogaz stansasy qurylysyna 3 mln. eýro ınvestısıa quımaq. Keńes otyrysynda qaralǵan ekinshi joba – Oral qa- lasyndaǵy Qurmanǵazy kóshesi 84 mekenjaıynda halyqaralyq franshıza boıynsha qonaqúı qurylysy. Jobamen «Grand Hotel Service» JSHS-nyń dırektory Jaqsylyq Samatov tanystyrdy. Onyń aıtýynsha, atalmysh kompanıa Oraldaǵy «Eldivino» oıyn-saýyq ortalyǵyn jáne Aqsaıda «Marko Polo» qonaq-úıi jobalaryn júzege asyrǵan. Endi «Aqjaıyq» qonaqúıiniń ornyna eki jyl ishinde jańa halyqaralyq deńgeıdegi 8200 sharshy metrlik qonaqúı boı kótermek. Onyń janynda aýdany 4200 sharshy metr bıznes ortalyǵy ǵımaraty bolady. Jańa qonaqúı halyqaralyq franshıza boıynsha iske qosylmaq. Qazir qonaqúı bıznesi boıynsha álemdik franshıza ókilderimen kelissózder júrgizilýde. Halyqaralyq  franshıza boıynsha ashylatyn qonaqúı ondaǵy kórsetiletin qyzmet sapasynyń turaqty jáne qatań baqylaýda bolatyndyǵymen, servıstiń joǵary deńgeıimen, qala jáne oblys mártebesin kóterýimen, bólmelerdiń álemdik standartqa saı bolýymen erekshelenedi.

  Sheteldik mamandarmen qonaqúı qyzmetkerlerin oqytý josparlanǵan. Qonaqúıde 125 bólme, onyń ishinde 92 standartty, 10 lúks klass, bir prezıdenttik, 20 apartament jáne eki múmkindigi shekteýli jandarǵa arnalǵan bólme bolady. Ǵımarat segiz qabatty. Onda 70 oryndyq meıramhana, úsh konferens-zaly, kofe-breık zaly, orys monshasy, túrik hamamy, fıtneszal, eki qaýyz djakýzı jáne ózge de qajetti qyzmet kórsetý oryndary bolmaq. Sondaı-aq jer asty 40, jer ústi 20 kólikke arnalǵan parkıng salynady.

Ǵımarattyń tóbe shatyryna rýf-meıramhana jáne jazdyq terasa ornalaspaq.