Búginde Qazaqstan aldynda aýyl sharýashylyǵy salasyn damytý boıynsha aýqymdy mindetterge oraı FAO-men usynylatyn tehnıkalyq jáne keńestik qoldaý, aqparattyq resýrstardy qoldaný múmkindigi úlken mańyzǵa ıe. 

Birikken Ulttar Uıymynyń Azyq-túlik jáne aýylsharýashylyq uıymy (FAO) Óńirlik konferensıasynyń 31-shi sesıasy bolyp ótti. Atalǵan is-shara barysynda FAO Bas dırektory Joze Grasıano de Sılva men Qazaqstan Respýblıkasynyń Aýyl sharýashylyǵy vıse-mınıstri G.Isaeva kezdesti, dep habarlaıdy Qamshy.kz aqparat agenttigi. 

Taraptar Qazaqstandaǵy etti mal sharýashylyǵyn damytý baǵdarlamasyn talqylady.

FAO-nyń Bas dırektory Aýyl sharýashylyǵy mınıstrliginiń atalǵan maqsattaǵy pozısıasyn qoldady jáne osy maqsattarǵa qol jetkizý úshin Qazaqstannyń agrarlyq ǵylymy men bilimin damytý qajet dep atap ótti.

Qazaqstan men FAO arasyndaǵy yntymaqtastyq keńeıýde jáne jańa deńgeıge kóterilýde. Mysaly, FAO Qazaqstandaǵy birneshe jobalardy iske asyrady, olar: organıkalyq aýyl sharýashylyǵyn damytý, jaıylymdardy basqarý, shegirtkemen kúres, turaqty damý maqsattaryn ulttandyrý, azyq-túlik tizbekteriniń damýyn qoldaý jáne eksport, sıfrlandyrý jáne aqparattyq-kommýnıkasıalyq tehnologıalardy engizý.

 2015 jyldyń sońynda óndiristi damytýǵa jaǵdaı jasaıtyn jáne organıkalyq ónimderdiń eksportyn ulǵaıtatyn «Organıkalyq ónimderdi óndirý týraly» zań qabyldandy. Qytaı men eýropalyq elder qazirdiń ózinde qazaqstandyq organıkalyq ónimderge qyzyǵýshylyq tanytýda.

FAO usynatyn aqparattyq resýrstardy paıdalaný, tehnıkalyq jáne konsýltasıalyq qoldaý, Qazaqstannyń agroónerkásip kesheni salasyn damytýda óte mańyzdy oryn alady.
Qazirgi ýaqytta Qazaqstan men FAO arasyndaǵy seriktestik baǵdarlamasy ázirlenýde.

Aıta keteıik, Birikken Ulttar Uıymynyń Azyq-túlik jáne aýylsharýashylyq uıymy (FAO) BUU júıesiniń múshesi bolyp tabylady jáne halyqaralyq azyq-túlik qaýipsizdigi men aýyl sharýashylyǵyn damytý máselelerimen aınalysady. FAO tamaqtaný, azyq-túlik jáne aýyl sharýashylyǵy týraly aqparatty jınaıdy, taldaıdy, túsindiredi jáne taratady. Uıymnyń fýnksıasyna múshe elderge tehnıkalyq kómek kórsetý kiredi. Qazirgi ýaqytta FAO-nyń quramyna 197 memleket kiredi.

Eske sala ketetin bolsaq, Qazaqstanda BUU-nyń Azyq-túlik jáne aýyl sharýashylyǵy uıymynyń (FAO) ofısi 2 jyl buryn, 2016 jyly sáýirde ashylǵan bolatyn.