Ulttyq bank basshysy Danıar Aqyshev teńge baǵamynyń qubylýyna qatysty túsinikteme berdi, dep habarlaıdy Qamshy.kz aqparat agenttigi.

Danıar Aqyshev Ulttyq bank 2015 jyldan beri teńge baǵamyn rettemeıtinin eske saldy. Osydan úsh jyl buryn Qazaqstanda teńgeniń erkin aıyrbas baǵamy rejımi engizilgen edi. Tıisinshe, baǵam suranys pen usynys negizinde qalyptasady. 

"Qazirgi bolyp otyrǵan jaǵdaıdy barlyq damyp jatqan naryqtaǵy turaqsyzdyq elementi dep sanaımyz. Búkil álemde barlyq damyp jatqan valútalar, ókinishke qaraı, dollarǵa qarsy álsirep jatyr. Qazaqstan da solardyń qatarynda. Biz ekonomıkasy ashyq elmiz, álemdik prosesterge yqpaldasqanbyz, sondyqtan álemniń qarjy naryqtaryndaǵy prosester Qazaqstanǵa da áserin tıgizedi", — dedi Aqyshev senat otyrysynda. 

Onyń aıtýynsha, qazir iri memleketter – Reseı, Túrkıa, Argentına jáne basqa elder valútasyn birtindep devalvasıalaýda. Bul úderis teńge baǵamyna da áserin tıgizdi. 

"Dese de biz teńgeniń qubylmalylyq dárejesi áldeqaıda tómen ekenin kórip turmyz", — dedi ulttyq bank basshysy.

"Baǵamǵa áser etetin makroekonomıkalyq jáne irgeli faktorlar, eń aldymen, bul ekporttyq taýarlardyń baǵasy, birinshiden, munaıǵa, óte joǵary bolyp otyr. Bul bizde tólem balansy turaqty ekenin kórsetedi. Qazir teńgeniń álsireýi eki nárseden bolyp otyr. Birinshisi – barlyq damyp jatqan naryqtyń álsireýi, ekinshisi – maýsymdyq faktor", — dedi Aqyshev. 

Ol maýsym aıynda sheteldik valútaǵa suranys únemi artatynyn atap ótti. Óıtkeni adamdardyń kóbi shetelge saıahattaıdy, tıisinshe sheteldik valúta satyp alady. 

"Bul olardyń quqyǵy, qalaǵanynsha satyp ala bersin degim keledi. Al qalǵan azamattarǵa valúta aıyrbastaý beketterine júgirmeýge keńes berer edim. Sebebi byltyr jazda da dál osyndaı jaǵdaı bolǵan. Sonda esterińizde bolsa, teńge baǵamy 340 teńgege deıin álsirep, keıin qaıta 320 teńgege deıin nyǵaıdy", — dedi Ulttyq bank tóraǵasy.