Búgin Astanada «Radisson» qonaq úıinde qazirgi bessaıystan Álem Kýbogi Fınalyna arnalǵan baspasóz-konferensıasy ótti, dep jazady Qamshy.kz aqparat agenttigi.

BAQ ókilderimen kezdesýge Qazirgi bessaıys Halyqaralyq Odaǵynyń Prezıdenti Klaýs Shorman, Qazaqstannyń qazirgi bessaıys Federasıasy prezıdenti, Qazirgi bessaıys Halyqaralyq Odaǵynyń vıse-prezıdenti  Berik Imashev, QR Mádenıet jáne sport mınıstri Arystanbek Muhamedıuly, qazirgi bessaıystan QR Ulttyq quramasynyń bas jattyqtyrýshysy Vadım Chýdnovskıı, sportshy Lesýn Aleksandr jáne qazaqstandyq bessaıysshy, Álem Kýbogi fınalynyń qola júldegeri, Azıa chempıony  Pavel Iláshenko. 

Óz sózinde, QR Mádenıet jáne sport mınıstri Arystanbek Muhamedıuly atalǵan sporttyń elimizde qarqyndy damyp kele jatqandyǵyn atap ótti.

«QR Mádenıet jáne sport mınıstrligi atynan barlyq qatysýshylar men jarystyń qonaqtaryna Qazaqstanǵa qosh keldińizder degim keledi.  Qazaqstan alǵash ret qazirgi bessaıystan Álem Kýbogi fınalyp qabyldap jatyr. Óz atymnan Halyqaralyq Odaqqa úlken alǵysymdy aıtqym keledi. Sońǵy ýaqytta bessaıys elimizde qarqyndy damyp keledi. Qazirgi ýaqytta Qazaqstan Respýblıkasy sportshylarynyń qorjynynda zamanaýı bessaıys boıynsha Azıa chempıonatynyń altyn medali, jastar arasyndaǵy Álem chempıonatynyń kúmis medali, UIPM Álem kýboginiń fınalynyń qola júldesi men Azıa chempıonatynyń kúmis medali bar. Men osy jarysta jańa esimder paıda bolady degen senimdemin. Barlyq sportshylarǵa sáttilik tileımin»,-dedi Arystanbek Muhamedıuly.

        Óz kezeginde, Zamanaýı bessaıystan Halyqaralyq Odaq prezıdenti Klaýs Shorman, zamanaýı bessaıystan Álem Kýbogi fınalyn ótkizetin memleketti tańdaýda qandaı negizderge súıengenderin aıtyp berdi. 

Ulttyq quramanyń bas bapkeri Vadım Chýdnovskıı qazaqstandyq sportshylardyń basty básekelesteri men Álem Kýbogine jalpy daıyndyq týraly aıtty.

Aıta keteıik, qazirgi bessaıystan Álem Kýboginiń fınaly maýsymnyń 21-24 aralyǵynda «Saryarqa» velotregi, «Barys Arena» sport kesheni, «Qazanat» atshabary bazalarynda ótedi. Shara Astana qalasynyń 20-jyldyǵyna arnalyp otyr. Fınalǵa álemniń eń úzdik sportshylarynyń tizimine engen 36 er jáne 36 áıel sportshy kele jatyr. 

        Qazaqstan tarıhynda zamanaýı bessaıystan el abyroıyn qorǵaǵan myqty sportshylar barshylyq. Atap aıtqanda, 1996 jyly Atlantada ótken Olımpıada oıyndarynda Aleksandr Parygın Qazaqstannyń qorjynyna altyn medal salyp bergen bolatyn.

Anyqtama úshin: Ózderińiz biletindeı, bessaıys — bul bes sporttyń jıyntyǵy: semserlesý, júzý, konkýr, lazerran  (atý jáne júgirý). Álem Kýboginde Qazaqstan namysyn Erler jáne áıelder Ulttyq quramalary qorǵaıtyn bolady.