Almatyda «Sanaly urpaq – jarqyn bolashaq» jemqorlyqqa qarsy jobasy aıasynda bilim berý salasyndaǵy jemqorlyq táýekelderiniń kartasy talqylandy. Joǵarǵy oqý oryndary, mektep, kolej ókilderi «SANALY URPAQ» jobalyq keńsesine jınalyp, memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty qalasy boıynsha departamentiniń, bilim basqarmasynyń jetekshilerimen bilim berý mekemelerindegi sybaılas jemqorlyq táýekelderin joıýdyń amal múmkindikterin qarastyrdy.

Sybaılas jemqorlyq táýekelderi kartasynyń jobasy ál-Farabı atyndaǵy QazUÝ janyndaǵy jemqorlyqqa qarsy tehnologıalar ǴZI tarapynan jasalǵan. Bul qujat mektepke deıingi oqý mekemelerinen bastap joǵary oqý oryndaryndaǵy basqarý, qarjy-sharýashylyq, bilim-ǵylym, áleýmettik-tárbıelik sıaqty bilim berý salalarynyń barlyq qyzmetin qamtyǵan. Jemqorlyq táýekelderi baǵalanatyn bolsa, onda sheteldik tájirıbege súıene otyryp jemqorlyqqa tosqaýyl qoıylatyn tıisti tehnologıalar men bilim berý mekemeleriniń resýrstaryn tıimdi paıdalaný boıynsha nusqaýlar jasaýǵa múmkindik týady.

«SANALY URPAQ» jobalyq keńsesiniń jetekshisi Qaıyrjan Toqyshev atap ótkendeı, «jemqorlyqqa qarsy tehnologıalar men jemqorlyq táýekelderi kartasynyń kezeńdik jáne júıelik jumysy bolashaqta bilim berý mekemeleriniń jemqorlyqqa qarsy jasaǵan qyzmetine qatysty barlyq deńgeıdegi reıtıńilik baǵa kórsetkishteri men naqty monıtorıń krıterılerin jasaýǵa septigin tıgizedi». Jemqorlyqqa qary jobalyq keńsesi óziniń reıtıńtik-monıtorıng qyzmetin sandyq formatyna shyǵarýdy josparlaýda. Onyń negizgi ajyramas bóligi áleýmettik saýalnanamalar bolyp tabylady jáne osy joly ótken otyrysta onyń ádis-tásilderi kópshilikke usynylyp tanystyryldy.

Joǵaryda atalǵan quraldardy engizý ár bilim mekemesindegi sybaılas jemqorlyqqa qarsy qyzmetti shynaıy baǵalaýǵa múmkindik beredi.

Olardyń barlyǵy jemqorlyqqa qarsy saıasattyń tıimdilik dárejesi boıynsha saralanatyn bolady. Reıtıń nátıjesi boıynsha Almaty qalasynyń kartasynda bilim salasyndaǵy eń az jáne eń kóp jemqorlyq táýekelder aımaǵyn anyqtaý uıǵarylýda. Atalmysh joba uıymdastyrýshylarynyń oıynsha,  sybaılas jemqorlyqqa qarsy reıtıń barlyq bilim mekemeleri úshin ózderiniń jemqorlyqqa qarsy saıasatyn júzege asyrýǵa degen pármendi yntalandyrý bolmaq. Jıyn barysynda ál-Farabı atyndaǵy QazUÝ-daǵy sybaılas jemqorlyqqa qarsy tehnologıanyń tájirıbesi talqylandy, munda 2011 jyldan beri «Jemqorlyqtan tys ýnıversıtet» jobas júzege asýda.

Jıyn barysynda ýnıversıtettiń nátıjege qol jetkizýge baǵyttalǵan basqarýdy iske asyrýdaǵy ındıkatıvtik josparlaýy, oqytýshylar qyzmetiniń reıtıńtik turǵydan baǵalanyp eńbektiń dıfferensıaldy tólenýi, biryńǵaı aqparattyq-saraptamalyq júıe men ýnıversıtettegi bıznes prosesterdiń sandyq tehnologıalaryn jasaý sıaqty jumystar jınalǵan qaýymnyń qyzyǵýshylyǵyn týdyrdy.