Almaty qalasy Tilderdi damytý basqarmasy 2018 jyly 21 maýsym kúni Almaty qalasy, Alataý aýdany ákimi apparaty ǵımaratynda «Rýhanı jańǵyrý» baǵdarlamasy aıasynda memlekettik qyzmetshiler kúnine oraı memlekettik basqarý organdary men mekemelerinde jumys isteıtin mamandar arasynda «Memlekettik til - memlekettik qyzmette» qalalyq konkýrsyn  ótkizdi.

Konkýrsqa tómendegideı kezeńder boıynsha saıysqa tústi:

1. «Sálemdesý». Komanda ataýy men urany, top múshelerin tanystyrý;
2. «Kerek derek». Ár toptyń músheleri kezekpen 10 uıashyqtyń ishinen ózderi tańdap alǵan uıashyqtaǵy 3 suraqqa belgilengen ýaqytta jaýap beredi. Suraqtar memlekettik til saıasatyna, til týraly zańnama men memlekettik baǵdarlamalarǵa jáne t.b. qatysty málimetterdi qamtıdy
3. «Sóz marjany». Ár top kezekpen 10 uıashyqtyń ishinen ózderi tańdap alǵan uıashyqtaǵy 3 tapsyrmany oryndaıdy. Top músheleri til týraly bastalǵan qanatty sózderdiń, maqal-mátelderdiń ekinshi jartysyn jalǵastyryp, aıaqtaýy tıis.
4. «Kıeli meken». Ár toptyń músheleri kezekpen 10 uıashyqtyń ishinen ózderi tańdap alǵan uıashyqtaǵy Qazaqstandaǵy tanymal  jerdiń ekrandaǵy sýreti boıynsha onyń ataýyn anyqtap, ol týraly qysqasha áńgimelep berýleri tıis.
5. «Ana tilim – án-jyrym». Ár top kezekpen mýzykalyq teatrlandyrylǵan qoıylym (án aıtý, óleń oqý, kórinis) qoıý arqyly óz ónerlerin kórsetedi.

Qazylar alqasynyń quramynda Almaty qalasynyń Qoǵamdyq keńesiniń mádenıet, ishki saıasat, sport jáne din máseleleri jónindegi komısıasynyń tóraǵasy Shalabaev Qusman Kárimuly, Qazaq memlekettik qyzdar pedagogıkalyq ýnıversıteti qazaq tili biliminiń teorıasy men ádistemesi kafedrasynyń meńgerýshisi, fılologıa ǵylymdarynyń doktory, profesor Súleımenova Jarqynbıke Nýaıqyzy, QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty qalasy boıynsha departamentiniń bas mamany Orazov Saılaý Sartaıuly boldy.  Qazylar alqasynyń sheshimimen konkýrs jeńimpazdary anyqtaldy:

Bas júlde – Almaly aýdany

İ oryn – Alataý aýdany

İİ oryn – Jetisý aýdany

İİİ oryn – Naýryzbaı aýdany.