Bıylǵy ulttyq biryńǵaı testileý nátıjesinde Otyrar aýdanynyń bilim salasy úlken jetistikke qol jetkizip, 90,4 paıyzben oblysta alǵashqy orynǵa shyqty. Bul jóninde aýdan basshysy Aıtahanov Erlan Qýanyshuly aımaqtyń jas túlekteri jáne ustazdarymen ótken  kezdesýinde málimdedi.

Sondaı-aq, mekteptegi qorytyndy atestattaýdyń nátıjesi boıynsha aýdanda 49 oqýshy «Altyn belgi» ıegeri atanyp, ustazdar men ata-ananyń úmitin aqtap shyqqan.

«Búginde jastarymyzdyń sapaly bilim alýyna memleket tarapynan barynsha qolaıly jaǵdaı jasalynǵan. Ult Kóshbasshysy Nursultan Ábishuly Nazarbaevtyń salıqaly saıasatynyń arqasynda balalyq shaqtan bolashaqqa qadam basqan jastar elimizdegi jáne shet elderdegi beldi joǵary oqý oryndarynda bilim alyp, ǵylymmen sýsyndaýǵa múmkindik týyp otyr. 

Biz jyl saıyn aýdanymyzdan túlep shyqqan úzdikterge monıtorıń jasap, olardy «Altyn kadr» qoryna tartýǵa jumys jasap otyramyz. Egemen eldiń jalyndy jastary retinde bilim nárimen sýsyndap, alǵan bilimderińizdi týǵan jerlerińizdiń ósip-órkendeýine jumsaýlaryńyzǵa úlken múmkindik bar. Sondyqtan osy múmkindikti paıdalanyp óz mamandyqtarynyń úzdikteri bolýdy qalaıtyn jandardy týǵan jerge qyzmet etýge shaqyramyn.  Elimizdiń kemel keleshegi úshin Sizderdiń bolashaqqa basqan qadamdaryńyzǵa senim arta otyryp, aldaǵy isterińizge sáttilik tileımin», - dep jyly lebizin bildirgen aýdan ákimi Erlan Aıtahanov otyrarlyq túlekterdi bilim synyndaǵy úzdik jetistikterimen quttyqtady.

Túlektermen kezdesý, bolashaq jaıynda aýdan basshysymen oı bólisip, pikir almasý keleshek mamandardyń armanyna qanat baılatyp, týǵan jerdi túletip,  tarıhy men qadir-qasıetin qasterleýge zor mindetti arqalatqandaı. Kezdesýde týǵan jerdiń tarıhyn taný, rýhanı tanymyn arttyrý maqsatynda aýdan ákimi Erlan Qýanyshulynyń qoıǵan saýaldaryna oıly kózben, salmaqty jaýaptaryn joldaǵan shákirtter kópshilikke erekshe áser qaldyrdy. "Elimizdiń qaı túkpirinde júrsem de óz týǵan ólkeme eń qajetti salanyń mamany bolyp oralamyn"- dep, tórtkúl dúnıege málim Otyrardyń tarıhyn, ony ózgege nasıhattaý joldaryn tereń oımen jetkizgen Otyrar jalpy orta mektebiniń túlegi Aıdana Turdaly aýdan ákiminiń arnaıy syılyǵyna ıe boldy.
Bilim básekesinde   aýdan atyn asqaqtatqan jastarǵa aýdan ákimi arnaıy syı-sıapattar tabys etti.