Myrzantaı Jaqyp eldi ábden shýlatty. «Magıstratýranyń granttary ánshilerge ǵana berilip, talanttar tasada qalyp jatyr» dep pikir bildirip, aıdy aspanǵa shyǵardy. Profesordyń synyna úndemeı qalýdy namys kórgen Bespaev ta aǵynan jaryldy. Ónerdegi ustazy, ákesi Altynbek Qorazbaevty magıstrlik dısertasıanyń taqyryby etip tańdap alǵan ol ekonomıkanyń emes, óz salasy mádenıettaný ǵylymynyń magıstri atanǵanyn erekshe atap ótti. Tanymal aıtysker Serikzat Dúısenǵazınge redaksıa atynan habarlasqanymyzda ol da atalmysh máselege basa nazar aýdarý qajettigin aıtty. Osymen Bespaev tóńiregindegi daý aıaqtalǵandaı boldy. Sóıtsek, ósheıin dep turǵan qyzyl shoq qaıtadan mazdap shyǵa keldi. Meırambektiń «Altynbek Qorazbaevtyń qazaq mádenıetindegi orny» degen taqyrypty zertteýi qyzý talqyǵa salyndy. Qorazbaevtaný qazaq qoǵamyna qanshalyqty qajet degen suraq týyndady.
Jýrnalıs Zańǵar Kárimhan Feısbýk paraqshasynda bylaı dep jazady: «Nesi bar, janyna jaqyn taqyryp! Bala kezinen jaqsy biletin, jaqsy tanıtyn dúnıeni jazý kerek qoı jazǵan soń! Ǵylymǵa paıda ákelmeıdi dep oılaısyz ba? Qatelesesiz! Qazirgi qazaq qoǵamy qorazbaevtanýǵa muqtaj ǵoı. Anaý taný, mynaý tanýlarǵa qaraǵanda. «Bulaq kórseń, kózin ash» degendeı, óner jolyna, úlken ónerge qarshadaı Meırambekti ákelgenine ne turady?! «Aýyl sahnasynyń ozyq ánshisi» qalaısha «Qazaqstannyń halyq ártisi» atanýynyń syry kimge kerek bolmasyn?! Mysaly, maǵan qyzyq! Qalaı joǵary ataq alýǵa bolady, jetýdiń qandaı joldary bar, neni úırenip, neni meńgerý kerek degendeı, bul dıplom jumysy estrada salasyna qosylǵaly turǵan «úlken eńbek» emes pe? Al sizder baǵalaı almaı jatyrsyzdar! Eshbir sabaqqa qatyspasa da (qaıdan qatysady konsertter men gastróldik saparlarda júrse, arasynda qazaǵynyń toı-tomalaǵy bar), dıplomyn ózi jazyp shyqqan! Qaıta ýaqyt taýyp jazyp shyqqanyna raqmet aıtýymyz kerek! Abaı atamyz aıtqandaı «kógaldy qýyp gólaıttap, qyzyqpen júrip jazdy alsa» ne bolar edi?! Jáne ózi ashyq túrde qorǵaǵan eken! Meırambek Besbaevtyń dıplomy qutty bolsyn! «İshi tar», «kóre almaıtyn» adamdar sóıleı bermesin».
Bul jóninde kózqarastary ekige jarylyp, qyryq pyshaq bolyp jatqan el-jurtyna aqyn Aqberen Elgezek: «Meırambek ózin eshqashan ánshimin degen emes. Bıik ónerdi túısigimen tereń tanyǵan soń, ol óziń mýzykantpyn dep esepteıdi. Ol onyń berik pozısıasy. Bul - bir. Al, estrada maıdanynda qazaq ánine táýelsizdik alyp bergen birden bir mýzykant bolsa, ol taǵy da - Meırambek! «Mýzart» toby qurylyp, el bulardy jappaı tyńdaı bastaǵan kezden bastap, jurt Reseıden keletin ánshilerdiń konsertterine barýdy doǵardy. Sonyń bastaýynda kim turdy? Meırambek! Halyqty eski-jańa termelermen sýsyndatqan kim? Meırambek! Qazir jas ánshilerge aǵa bolyp, bas-kóz bolyp júrgen de osy mańdaıy jarqyraǵan naǵyz qazaq! Bala kezden «boztorǵaısha» shyryldap, qazaq ónerin aspandatqan oǵlanyńa bir japyraq dıplomyńdy qımadyń ba, aǵaıyn?! Sol dıplomdy qaltasyna salǵan qaı ónerliń Meırambekteı qazaqqa eńbek etti?! Óz týǵanymyzdy aıaqtan tartyp, yrdý-dyrdý bolamyz da jatamyz, áıteýir. Qoısańdarshy boldy, syrt kózden uıat emes pe?!», - dep úndeý tastady.
Endi qazaq qoǵamy qorazbaevtanýǵa muqtaj ba degen saýalǵa kelsek. Biz búgingi tańda motıvasıaǵa muqtajbyz. Jastarymyz kimge qarap boı túzerin bilmeı, adasyp júr. Bolar el bolsaq ta (bolmaıtyn deýge qımaımyn – avt.) bir-birimizdi batyr deýge aıanyp, julyp jep júrmiz. Sondyqtan qazaq qoǵamy qazaqtanýǵa qatty muqtaj ekenin erekshe atap ótkim keledi. Qazaqty taný Qorazbaevty tanýdan, Bespaevty baǵalaýdan, bir qazaq úshin qýanýdan, bir qazaq úshin muńaıýdan bastalady. Meırambekteı asyldy óner álemine alyp kelgen Altynbek Qorazbaevqa tiri kezinde maqtaý aıtpaı, ólgennen keıin sózben eskertkish turǵyzǵannan ne paıda?!
Jazıra Baıdaly
