Bizdiń polısıa qyzmetkerleri halyqqa qyzmet etedi me álde halyqqa qarsy jumys isteı me? Únemi bir zańsyzdyq oryn alsa, áıteýir qara halyqtyń zarlap, jylap jatqanyn, «ádildik joq» dep shyryldap júrgenin kóremiz. Qoldarynda eshqandaı bıligi, tanysy joq ashynǵan halyq qarǵys aıtqannan basqa amaly qalmaıdy. Osydan keıin bıliktegiler "bizge senińizder, bizdiń zań ádildikti jaqtaıdy", - dep aıǵaılaıdy. Halyq nege bılikke, zańǵa senbeıdi? Bılik qarapaıym halyq zańdyq turǵydan saýatsyz dep aqtalǵanymen, túrli zańsyzdyqtardy óz kózimen kórip júrgen qara halyq úıine ury tússe de "polısıa shaqyrǵanmen túk paıda joq, ýaqytymyz ben júıkemizdi ǵana qurtamyz", dep aıtady. Bizdiń zań qyzmetmetkerleri moıyndamasa da, anany-mynany aıtyp aqtalsa da, bul - shyndyq...

11 tamyzda SHQO Úrjar aýdanyna qarasty Alakól aımaǵynda bolǵan oqıǵany baıandaýǵa ruqsat etińizder. Áleýmettik jelide taraǵan tómendegi vıdeolarǵa qaraǵanda polısıa qyzmetkerleri Alakól demalys aımaǵynda demalýshylarǵa qyzmet kórsetip júrgen jumysshylardy jumys ornynan qýǵan. Jergilikti halyqtyń aıtýynsha, bul oblys ákimshiliginen kelgen arnaıy buıryq-mys. Eń soraqysy, polısıa qyzmetkerleri jergilikti turǵyndardy qýyp qana qoımaı, qoqan-loqqy kórsetip, uryp-soqqan kórinedi.

Bul jerde jergilikti turǵyndar arnaıy anyqtamasyz, zańsyz jumys isteýi de múmkin. Biraq polısıa qyzmetkerleriniń uryp-soqqany, qoqan-loqqy kórsetkeni óz qyzmetin asyra paıdalanǵandyq emes pe?! Polısıa qyzmetkerleriniń anasyndaı adamdy ıterip, julqylaýynyń ózi zańsyzdyq qoı. Joq, álde zań qyzmetkerlerine jol erejesin buzýǵa, adamdarǵa qoqan-loqqy jasap, uryp-soǵýǵa ruqsat berilgen be? 

Bizdiń eldiń polısıa qyzmetkerleri jansyz robot sekildi. Eshqandaı adamdyq, aıaýshylyq degendi bilmeıdi, tek qana ózderine berilgen tapsyrmany, buıryqty ǵana oryndaıdy. Bılik qarapaıym halyqty óltirińder dese de esh miz baqpastan óltire salady-aý osy. Qarapaıym halyqtyń artynda qorǵaýshysy, basqalar sekildi "Máke, Sákeleri" joq bolǵandyqtan halyqty qanaý da, olardyń bar múlkin tárkilel, jasap jatqan nápaqasynan aıyrý da ońaı. 

Óz elin, óz jerin mekendese de, ádildik izdep zarlap júrgen de, jumys izdep sarylyp júrgen de, páterden páterge kóship júrgen de ózimizdiń qazaq. Eń ókinishtisi de osy...