«Týǵan jer» arnaıy jobanyń aıasynda mektep oqýshylarynyń, jalpy azamattardyń elimizdiń qasıetti jerlerine saıahaty, qaltaly azamattardyń óz ólkelerin damytýǵa úles qosýy syndy ónegeli ister júzege asyp jatyr dep habarlaıdy Qamshy.kz aqparat agenttigi ruh.kz saıtyna silteme jasaı otyryp. «Týǵan jer» jobasynyń jaqyn arada jaryqqa shyqqan taǵy bir jańalyǵy – 5-7 synyptarǵa arnalǵan ózge formattaǵy «Ólketaný» oqýlyǵy. Atalǵan oqýlyqta tarıh, geografıa, ádebıet, mýzyka sıaqty pánder biriktirilip, oqýshynyń tanymyn keńeıtetin tamasha dúnıeler usynylǵan.

«Ólketaný» oqý quraly ár oblysqa jeke-jeke jaryq kórdi. Mysaly, Almaty oblysyna óz aldyna, Aqmola oblysyna óz aldyna, taǵysyn taǵy...

Biz búgin Aqmola oblysynyń qundylyqtarymen, baı murasymen, tarıhymen, ádebı-mádenı, mýzykalyq erekshelikterimen tanystyratyn «Ólketaný» oqýlyǵy týraly sóz qozǵamaqpyz.

Atalǵan aımaqtyń tamashalaryn tizgen oqý quraly Kókshetaý qalasynda tanystyryldy. Aqmola oblysynyń bilim basqarmasynyń basshysy Gamazovtyń aıtýynsha, aımaqtyń tarıhyn jáne ózge de qundylyqtaryn oqýshylarǵa tanystyryp, ulttyq rýhyn kóteretin, otansúıgishtikke baýlıtyn «Ólketaný» oqýlyǵyna 20 saǵat bólinbek. Alǵash ret mektep baǵdarlamasyna enip otyrǵan oqýlyqtyń birden mundaı joǵary kólemdegi saǵatqa ıe bolýy jaman kórsetkish emes. «Ólketaný» oqýlyǵy óziniń negizgi mindeti – aımaqtyń qundylyqtaryn, murasyn oqýshylarǵa tanystyrýmen qatar, bıologıa, geografıa, tarıh, ádebıet, mýzyka sekildi negizgi pánderdi tolyqtyryp, jetildirip otyrady.

Mańyzy joǵary, asa úlken talǵamda jazylyp, talaı súzgiden ótip, saraptalǵan oqý quralynyń avtorlyq quramyna ekologıa, týrızm jáne ólketanýshylar, joǵaryda atalǵan pánder boıynsha bilikti ustazdar kirdi. Atap ótsek: J.Mýsın atyndaǵy Kókshetaý joǵary pedagogıkalyq kolejiniń dırektory Nurtas Ahat, Aqmola oblystyq tarıhı-ólketaný murajaıynyń dırektorynyń orynbasary Alma Qunanbaeva, Sh.Ýálıhanov atyndaǵy Kókshetaý memlekettik ýnıversıtetiniń ustazy, pedagogıka ǵylymdarynyń kandıdaty Ivan Plachınta, «Keleshek-2030» baspa úıiniń redaktory Shaǵban Bektasov, oblys kóleminde jáne respýblıkaǵa tanymal ustaz jáne pýblısıs Alıa Ahetova.

«Ólketaný» oqýlyǵy 5-7 synyptarǵa arnalǵandyqtan, ol osy aralyqta óte mańyzdy pánderdi biriktiredi. Joǵaryda aıtylǵan pánderdiń eń qaımaqty, qajetti ári buryn-sońdy eshbir jerde jarálanbaǵan tyń derekteri jıanlǵan oqýlyqtyń mańyzynyń zor ekeni aıtpasa da belgili.

Oqýlyqtyń mazmuny jaıy Aqmola oblystyq tarıhı-ólketaný murajaıynyń dırektorynyń orynbasary Alma Qunanbaeva baıandama jasap, oqý quralynyń artyqshylyqtaryn tilge tıek etti. Onyń aıtýynsha, jańa urpaq óziniń tarıhyn tereń tanyp, óziniń túp-tamyrynyń dárejesin bilýi kerek jáne týǵan ólkesiniń ózine tán salt-dástúrlerin, qaǵıdalaryn, baı tarıhı muralaryn saqtaýdy úırenýi shart. Sonymen qatar, bul kitap arqyly ult bolashaǵy sanalatyn mektep oqýshylarynyń sanasyndaǵy otansúıgishtik, ulttyq rýh, azamattyq bolmys sekildi sezimder ulǵaıyp, oqýshyǵa jańa múmkindikter ashady.

Zamanaýı standarttarǵa saı, ult tarıhyndaǵy uly beles sanalǵan «Rýhanı jańǵyrý» baǵdarlamalyq maqalasynyń aıasynda jaryq kórgen «Ólketaný» oqýlyǵyn kópshilikke Sh.Ýálıhanov atyndaǵy Kókshetaý memlekettik ýnıversıtetiniń ustazy, pedagogıka ǵylymdarynyń kandıdaty tanystyrdy. Ol kitaptyń jalpy mazmuny jaıly jáne ılústrasıalyq bezendirilý deńgeıi jaıly sóz qozǵap, bul oqýlyqtardyń mektep oqýshysy úshin qanshalyqty paıdaly ekenine toqtaldy.

Oblysta «Ólketaný» sabaqtary 2018/2019 oqý jylynyń ekinshi jartyjyldyǵynan bastap, oqýshylardyń mektep baǵdarlamasyna engizilip, júrgizilmek.

Esterińizge sala keteıik, buǵan deıin Almaty oblysy týraly jaryq kórgen "Ólketaný" oqýlyǵynan shı shyǵyp, shý kóterilgen bolatyn. "AlmatyKitap baspasy" óz kezeginde bul eski jańartylmaǵan nusqa dep úıdeı báleden qutylǵan bolatyn.