Almaty oblysy polısıasy múgedek áıeldi qorlaǵan balany tapty. Iývenaldy polısıa vıdeodaǵy ekinshi balanyń da kim ekeni anyqtady, dep habarlaıdy inform.kz.

«Balalardyń biri 2008 jyly dúnıe kelgen. Úshinshi synypty bitirgen. Tárbıelenip otyrǵan otbasy tolyq emes. Onyń 3 jastaǵy qaryndasy jáne emshektegi bala bar. Ekinshi bala basqa aýdannyń turǵyny. Ata-anasyn ákimshilik jaýapkershilikke tartý ýaqyt enshisinde» deıdi Almaty oblysy İİD-niń baspasóz qyzmetiniń basshysy Sergeı Neznaev.

Balalardyń ata-anasyn 127 bap boıynsha ákimshilik jaýapkershilikke tartý máselesi qaralyp jatyr. Olarǵa 16 835 teńgeden 48 100 teńgege deıin aıyppul salý qarastyrylǵan.

Esterińizge sala keteıik, eki bala aıaldamada otyrǵan múgedek áıelge qorlyq kórsetken. Olardyń áreketi kameraǵa túsip qalǵan. Vıdeo Facebook áleýmettik jelisinde taralyp, jeli qoldanýshylary balalardy taýyp, ata-anasyn jaýapkershilikke tartýdy talap etken bolatyn.