Qazaqstan musylmandary dinı basqarmasy 2018 jyly Qurban aıt merekesi tamyz aıynyń 21-i kúni bastalatynyn habarlaıdy.
Bıyl musylman kúntizbesi boıynsha zúl-hıdja aıynyń birinshi kúni tamyzdyń 12-ne bastaldy. Al, Arapa kúni 20 tamyzǵa sáıkes keledi. Arapa – qajylar Arafa jotasynda qulshylyq etetin kún. Qajylyqqa barmaǵan musylmandar úshin arapa kúni aýyz bekitý – mustahab (jaǵymdy) amal.
Ábý Qatadan jetken hadıste: «Arapa kúniniń orazasy ótken jáne keler jyldardyń kúnálaryna káfárat (keshirim) bolady...» delingen. 
Jaǵdaıy bar, ári jolaýshy emes musylmanǵa qurbandyq shalý – ýájip, musylmandyq mindet.
Qurbandyqqa túıe, sıyr jáne qoı (eshki de) shalynady. Bir qoshqar nemese qoı bir kisi atynan shalynady. Al qara mal nemese túıeni jeti kisi birigip, qurbandyqqa shalýǵa bolady. Qurbandyq malyn aıt namazynan keıin aıttyń úshinshi kúni kún batqanǵa deıin shalýǵa bolady.
Qurbandyq etin úshke bólip taratýǵa bolady. Bir bóligi ózine qalady, ekinshi bóligi aǵaıyn-týys, kórshilerge beriledi, úshinshi bóligi kómekke muqtaj kisilerge taratylady.