Adaı Ábildınov,

Sh.Aımanov atyndaǵy «Qazaqfılm» AQ-nyń «Anımasıalyq kıno» bóliminiń jetekshisi, «Daryn» Memlekettik jastar syılyǵynyń laýreaty, rejıser, senarıst:

-Búgingi tańda elimizdegi anımasıa qaı baǵytta kele jatyr dep oılaısyz?

-Dál qazirgi ýaqytta, sońǵy eki jyldyń ishinde biz anımasıalyq fılmdi jasaý baǵytynda úlken jetistikterge jettik. 2017 jyly qazaq anımasıasyna 50 jyl tolýyna oraı, biz úlken syı jasadyq. Eki birdeı tolyqmetrajdy «Kúltegin» jáne «Muzbalaq» anımasıalyq fılmderin túsirdik. Onyń tusaýkeseri osy kúz ýaqytyna bolady dep josparlanyp otyr. Bul bizdiń shyǵarmashylyq top úshin úlken jetistik. Óıtkeni biz osy qos týyndynyń aıasynda úlken tehnıkalyq jetistikterge jetip, kadrlardy tolyqtyrdyq. Rejıssýra jáne dramatýrgıalyq jaǵynan da úlken tájirıbıe jınadyq desek bolady. Taǵy da aıta ketetin jaıt, jyl saıyn bir-eki tolyqmetrajdy fılm túsirýdi úrdiske aınaldyrmaqpyz.

-Festıvalde kórsetilgen anımasıalyq fılmder jaıly oıyńyz?

-Bıylǵy jyly alǵash ret «Baıqońyr» fılm festıvalinde qazylyq ettim. Sarapqa túsken týyndylardyn 98%-y derlik kórermen nazaryna usynýǵa turarlyq. Festıváldiń uıymdastyrylýy da, byltyrǵyǵa qaraǵanda aýqymynyń keńeıýi de, jastardyń kıno ónerine kásibı turǵyda bet burýy da kóńil qýantady.

-«Úzdik anımasıalyq fılm» jáne «Úzdik qoıýshy-sýretshi» júldesin ıelengen Ivan Ardashovtyń «Órkesh» fılmi týrasynda ne aıtasyz?

-Meni barlyq qyrynan: montaj, sýretshilik, dybys jáne maǵynasy boıynsha tańqaldyrǵan osy fılm boldy. Ásirese orys jigitiniń qazaqtyń ulttyq qundylyqtaryn, áke men bala arasyndaǵy berik qatynasyn sheber jetkizgendigi jeńiske ábden laıyq dep sanaımyn. Qasqyrdyń obrazy arqyly túpkiligin tereń etip túsindirgen bul fılm eren eńbektiń arqasynda qos birdeı marapatqa ıe boldy.

-Jeńimpaz Ivan Ardashovpen birigip jumys isteý josparda bar ma?

-Árıne, táýelsiz tulǵa bolǵandyqtan, árbir adam óz qalaýymen sheshim qabyldaýǵa quqyly. Degenmen, «Órkesh» anımasıalyq fılmin onan ári damytyp, birigip jumys jasaıyq degen usynys rejıser tarapynan bolyp jatsa, bizdiń qushaǵymyz árdaıym aıqara ashyq.

 -Anımasıalyq týyndylarda qozǵalatyn taqyryptardyń ózektiligi?

-Anımasıa arqyly ár túrli áleýmettik máselelerdi, tarıhı, ǵylymı, rýhanı qundylyqtardy, balalarǵa arnalǵan tárbıelik mańyzy zor dúnıelerdi kórsetýge bolady. Naqty osy «Baıqońyr» fılmfestıvali týraly aıtar bolsam, munda san alýan máseleler kóterilgendikten, taqyryptary da ár túrli. Degenmen, búldirshinderdiń súıikti oıynshyǵyna aınalatyndaı, kózge ottaı basylatyn keıipker shyǵarý úshin áli de úlken izdenis kerek. Anımator áriptester osy máseleni qolǵa alsa degen tilek bar.  

-Bul fılmderdiń tehnıkalyq túsirilimi qaı deńgeıde dep oılaısyz?

-Árıne, kásibı turǵydan qaraǵanda az-kem qatelikter bar. Óıtkeni sapaly anımasıalyq týyndy jasaý kóp qarjyny talap etedi. Múmkin bir sebebi osydan bolar. Sondyqtan, mamandar daıarlaıtyn oqý oryndary zamanaýı tehnıkalarmen qamtamasyz etilse degen tilegimiz bar.

Suhbattasqan T.Q.Júrgenov atyndaǵy  Qazaq Ulttyq Óner akademıasynyń  4 -kýrs stýdentti Marıa Pıltan