Jastyq shaq – adam ómiriniń kóktemi. Aqyndar jyrǵa qosatyndaı, qaıta aınalyp kelmeıtin ómir kezeńinde adamdy aldynan myń san taraý men tańdaý, úmit pen arman tosady. Bolashaqqa qurǵan josparlardyń bári tek qana qıal álemindegi qol jetpes saǵym bolyp qalyp qoımaı, shyn máninde júzege asýy úshin adam balasy ómir jelkeninen ustap, aǵystar men daýyldarǵa, kedergiler men tosqaýyldarǵa qaramastan, alǵa júrýge mindetti. Bul – jastyq shaqqa tán qasıet.

HHİ ǵasyr – jer betinde buǵan deıin bolmaǵan tyń serpilisterdiń, ǵalamdyq ǵajaptardyń, dúnıeni dúr silkindirgen qubylystardyń ǵasyry. Ámánda kez kelgen oqıǵanyń qozǵaýshy kúshi – JASTAR. Qazaq jastary –Sultanmahmutsha aıtqanda, jańa ǵasyrdaǵy halyqtyń tóbesindegi Kún, kóńilindegi Úmit,  sanasyndaǵy Sáýle.

Ár ulttyń jas býynyna qarap ózge halyqtar onyń damý deńgeıin, ilimi men ǵylymyn bajaılap, bolashaǵyna boljal jasaı alady.  Jigerli, jalyndy, erkin, bilimdi, júrekti JASTARY bar memleket erteńine nyq senimdi. HHİ ǵasyrdaǵy álemdik báseke ózgeshe minez kórsetip, ózinshe tulǵa bolýdy talap etedi. Al biz, qazaq jastary básekeniń bel ortasynda júrgendikten, óz boıymyzdan sol qasıetterdi izdep tabýǵa tıispiz.