2020 jyldan beri Qazaqstanda 1,1 mln oqýshy ornyna arnalǵan 1 242 jańa mektep salyndy. Osy aýqymdy jumystyń nátıjesinde úsh aýysymdy mektepter sany 4 esege, apatty ǵımarattar sany 2,5 esege, al oqýshy ornynyń tapshylyǵy 4 esege qysqardy.
Mektep jelisin jańartýdaǵy eń iri qadam Qazaqstan Respýblıkasynyń Prezıdenti Qasym-Jomart Toqaevtyń bastamasymen iske qosylǵan «Keleshek mektepteri» ulttyq jobasy boldy. Úsh jyl ishinde, 2023 jyldan 2025 jylǵa deıin, elde jalpy syıymdylyǵy 460 myńnan astam oqýshyǵa arnalǵan 217 jańa formattaǵy mektep paıda boldy. Jańa ǵımarattar aýdany boıynsha burynǵy tıptik jobalardan 15–20%-ǵa keń, al tehnıkalyq jabdyqtalý deńgeıi olardan tórt ese joǵary. Árbir mektepte eńbekke baýlý sheberhanalary, mýzyka jáne horeografıa zaldary, STEM-zerthanalar, robototehnıka kabınetteri, kovorkıng-aımaqtar jáne sport zaldary jumys isteıdi. Joba 43 úsh aýysymdy jáne 8 apatty mekteptiń máselesin tolyqtaı sheshýge múmkindik berdi. Barlyq kezeńderde sapany júıeli baqylaýdy jobany úılestirýshi Y. Altynsarın atyndaǵy Ulttyq bilim akademıasy qamtamasyz etedi.
Jańa ǵımarattar salýmen qatar, qoldanystaǵy mektepterdi aýqymdy renovasıalaý júrgizilýde. Memleket basshysynyń tapsyrmasymen 1 300 mektepti biryńǵaı zamanaýı formatqa kóshirý baǵdarlamasy iske qosyldy. 2025 jyly osy baǵdarlama boıynsha 190 myń orynǵa arnalǵan 245 mektep jańartyldy. Jańartylǵan ǵımarattarda kitaphanalar, asqanalar men sport zaldary jóndelip, qaýipsizdik júıeleri retteldi.
Qosymsha qarjylandyrý kózi retinde Prezıdenttiń tapsyrmasymen qurylǵan Bilim berý ınfraqurylymyn qoldaý qory jumys isteıdi. Jemqorlardan tárkilengen qarajat esebinen 86 myń orynǵa arnalǵan 77 mekteptiń qurylysy aıaqtaldy. Olardyń basym bóligi demografıalyq júktemesi joǵary aımaqtarda ornalasqan: Almaty, Túrkistan, Qyzylorda, Jambyl oblystary men Astana qalasynda.
Memleket basshysy qoıǵan basym mindetterdiń biri qalalyq jáne aýyldyq mektepter arasyndaǵy bilim sapasy alshaqtyǵyn joıý bolyp tabylady. «Keleshek mektepteri» jobasy boıynsha salynǵan mektepterdiń árbir ekinshisi derlik aýyldyq jerde ornalasqan, barlyǵy 84 nysan. Renovasıa baǵdarlamasy qamtyǵan 1 300 ǵımarattyń 820-sy da aýyldarda ornalasqan. Jyl saıyn 1 000 oqý ornynda pándik kabınetter jańartyla otyryp, jóndeý júrgiziledi. Sonymen qatar, Oqý-aǵartý mınıstrligi shaǵyn jınaqty jáne aýyldyq mekemelerdegi bilim sapasyn arttyrý, kadrlyq qamtamasyz etý men qaýipsizdik máseleleri boıynsha strategıalyq sheshimder daıyndaýda.
