Búgin tańǵy saǵat 07:00-de Almaty qalasynda 653 saılaý ýchaskesi ashylyp, jalpyulttyq referendýmǵa daýys berý bastaldy. Alǵashqy mınýttan-aq qalanyń barlyq aýdanyndaǵy ýchaskelerde turǵyndardyń belsendi qatysýy baıqaldy. Kóptegen almatylyq demalys kúni tańerteń erte kelip, daýys berýdi jón kórgen.

Saılaý ýchaskelerinde merekelik kóńil kúı qalyptasty. Qala turǵyndary úshin estelik sýretke túsýge arnalǵan taqyryptyq fotoaımaqtar uıymdastyrylyp, dástúr boıynsha alǵash daýys bergen azamattarǵa shaǵyn syılyqtar usynyldy.

Almatyda barlyq azamattyń daýys berýine qatysýyna qolaıly jaǵdaı jasaýǵa erekshe kóńil bólingen. Kórý qabileti buzylǵan azamattar úshin búletenderge arnalǵan Braıl qarpimen jazylǵan arnaıy trafaretter daıyndaldy, al daýys berý kabınalary erekshe qajettiligi bar adamdarǵa beıimdelgen. Sonymen qatar ýchaskelerde sıfrlyq qoldaý uıymdastyrylyp, onlaın sýrdoaýdarmashylar estý qabileti buzylǵan azamattarǵa qajetti aqparat alýǵa kómektesedi.

Múmkindigi shekteýli azamattardyń ýchaskelerge barýyn jeńildetý úshin «Invataksı» qyzmeti de iske qosyldy. Bul qyzmet turǵyndardyń saılaý ýchaskelerine kedergisiz jetýine múmkindik beredi. Al jasy úlken nemese densaýlyǵyna baılanysty ýchaskege kele almaıtyn azamattar úshin úıde daýys berý uıymdastyrylǵan. Saılaý komısıasynyń músheleri kóshpeli jáshiktermen turǵyndardyń mekenjaıyna baryp, árbir azamattyń referendýmǵa qatysýyna múmkindik jasap otyr.