Júktilikti boldyrmaıtyn qytaılyq dárilerdiń kesirinen qazaqstandyq qyz-kelinshekter zardap shegip, aýrýhanaǵa túsip jatyr. Túsik jasatýǵa arnalǵan preparattarǵa tyıym bolmaǵandyqtan, názik jandar eshkimniń ruqsatynsyz qabyldap, aǵzasyn ýlaýda. Qaýipti taýardy kedennen bıologıalyq belsendi zattar retinde ótkizip, elimizde zańsyz saýdanyń kórigin qyzdyrǵandar zańmen de qýdalanbaıdy. Aspanasty elinen ákelingen dári-dármek kóbine Almatyǵa jetkiziledi eken. Al Astanadaǵy ahýal qandaı? Bul týraly Eýrazıa birinshi arnasy habarlaıdy.

«Úılenemin» dep qurǵaq ýádeni úıip-tógip, degenine jetken soń taıqyp shyǵatyn  er adamdar kóbeıgen bul kúnde. Astanalyq myna boıjetken sondaı jaýapkershilikten jurdaı jigitterdiń birine aldanǵan. Nekelespeı jatyp ot basyp, tyǵyryqqa tirlegen ol sonyń kúshteýimen qursaǵyna bitken baladan qytaı dárisin iship áp-sátte qutylypty.

«Oılamaǵan jerden aıaǵym aýyr bolyp qaldy. Jigitim abort jasa dep aıtty. Biraq keliskim kelgen joq. Qaıdan alǵanyn bilmeımin biraq belgisiz bir qytaıdyń dárisin alyp keldi. Sol dárilerdi endi amal joq qabyldadym» - deıdi qala turǵyny.

Jatyrdaǵy beıkúná sharananyń ómirin bir-aq sátte úzetin dári dárihanalarda da bar. Alaıda, reseptpen ǵana bosatylady. 

Qursaǵyndaǵy shaqalaq turmaq, ózin de aıamaıtyn burymdylar arasynda túsik jasaıtyn preparattarǵa suranys joǵary. Biraq, ony dárihanadan ala almaǵandar bazarlardy torýyldap tabady. 

Satýshynyń sózinshe, bul dáriler 2 aıdan asqan júktilikti joıady. Ony satyp alýshylar da az emes eken. Al, keıde qytaı preparaty gazettegi jarnamalar, kóshedegi habarlandyrýlar, tipti emshi-baqsylardan da tabylatyn kórinedi.

Qytaı dárisiniń bizge qalaı jetkizilip jatqany belgisiz. Alaıda, mamandar olardyń kedennen kontrabandalyq jolmen jasyryn ótkiziletinin aıtady. Statısıkaǵa júginsek, byltyr elimizde 30 myń túsik tirkelgen. Onyń 5%-yn ǵana dárigerler belgili sebepterge baılanysty aldyryp tastaýǵa keńes bergen. Al, kóshedegi belgisiz bireýdiń qolynan alynǵan preparatpen túsik jasaý asa qaýipti. Sebebi, onyń quramynda kemirgishterge arnalǵan ýly qospalar bar ári olardyń dozasy joǵary deıdi mamandar.

Búkilálemdik densaýlyq saqtaý uıymynyń dereginshe, dúnıejúzinde túsikten kóz jumǵandar 14 %-dy quraıdy. Onyń kóbisi 20-ǵa tolmaǵan boıjetkender. Al, túsik saldary jatyr jaraqatyna shaldyqtyrady. Elimizdegi bundaı naýqastardyń sany búginde 12500-ge jetken. Qaýipti qytaı dárisin kedennen kedergisiz ótkizip, talaıdyń taǵdyryna aıaýsyz balta shabatyndar jazasyz qala ma?