Ótken jyldyń 29 jeltoqsanynda bolǵan apatty oqıǵa búkil eldi eseńgiretip ketkeni belgili. Qarasha halyq pen qaza tapqan jandardyń týystarynyń endigi tilegi kináli azamatqa laıyqty jaza taǵaıyndalýy. Muny el bolyp bári de talap etýde.
♦Jantúrshigerlik jol apatynda qaıtys bolǵan úshinshi adam kim?
Osy oqıǵanyń bir qurbany Dınara Hamıtovanyń týystarynan kináli taraptyń, tipti, keshirim de suramaǵany jaıynda jazǵan bolatynbyz. Qanshama kún ótse de, jaǵdaı ózgermegen. Uly Temirlan Hasenovke habarlasyp mán-jaıdy suraǵan edik, áli kúnge deıin kináli taraptan birde-biri onymen baılanysqa shyqpapty.
♦Marqum Dınaranyń inisi: «Bizden eshkim keshirim suramady...»
Al oqıǵa bolǵan kúni tańǵy saǵat 5-te marqum Sholpan Elgezekova, Dınara Hamıtova men tiri qalǵan Aızada Satybaldıeva qaıda jol tartqan edi?
«Apat bolǵan kúni Sholpan ápke, Aızada ápke jáne meniń anam úsheýi Sholpan Elgezekovanyń úıine bara jatqan. Olar jaqsy aralasatyn qurbylar edi», - deıdi Temirlan.
Dınara Hamıtova óziniń otbasymen qatar týystaryna da demeý bolǵan eken, olarǵa únemi qarjylaı kómek berip, qoldaý kórsetip otyrǵan.
Marqumnyń áleýmettik jelidegi sońǵy postynda «bul meniń balalarsyz qarsy alatyn alǵashqy jańa jyl bolmaq» degen sózder bar. Belgili bolǵandaı, Dınara Hamıtova jańa jyl merekesi qarsańynda Almatyda jalǵyz ózi bolǵan, al et-jaqyn týystary Kókshetaýda qarsy alýdy josparlap júrgen eken.
«Anam jańa jyldy otbasymen birge týǵan-týystarynyń arasynda qarsy alýdy qalaǵan edi, biraq sol ýaqytta qarjylaı máseleler týyndap, ol kele almady. Sondyqtan, anam bul merekeni qurbylarymen atap ótýdi josparlap júrgen», - dep aıtyp ótti marqumnyń uly.
Temirlan 6 jasqa tolǵanda ákesinen aıyrylǵanyn aıtyp berdi. Keıin anasy ekinshi ret turmysqa shyǵyp, qaryndasy dúnıege kelgen. Alaıda, kúıeýimen ajyrasyp ketken.
«Men 6 jasymda ákemnen aıyryldym, endi anam da joq. Anamnyń qaza tapqanyn birinshi estigende ózimniń jetim qalǵanymdy túsindim. Biraq men er adammyn, eresekpin. Al qaryndasyma obal boldy, ol áli kishkentaı, bul qazany ol qalaı kóteredi, bilmedim. Ol únemi anasynyń etegine jarmasyp júretin erke edi, tipti, ájetxanaǵa jalǵyz barmaıtyn, endi anasy kelmeske ketti. Qaryndasymnyń jaǵdaıyna qatty alańdaýlymyn», - dep kúıindi Temirlan.
Qapyda anasynan aıyrylǵan Temirlannyń endigi qalaýy – apatqa sebepker bolǵan qylmyskerdiń laıyqty jazasyn alýy.
«Almatyǵa anamnyń denesin alyp ketýge kelgende birden sotqa aryz jazyp kettik. Men ózimniń eń asyl baılyǵymnan aıyryldym. Ne istesek te, anam ortamyzǵa qaıtyp kelmeıdi. Degenmen men bul apatqa kináli qylmyskerdi zań aıasynda jazaǵa tartylýyn qalaımyn. Búgin úsh adamnyń ólimine sebep boldy, eger ony jaı ǵana jaýapqa tartyp, laıyqty jazasyn bermese, bolashaqta taǵy basqa adamnyń ólimine sebepker bolmaıtynyna, balalardy taǵy anasyz, analardy balasyz qaldyrmaıtynyna kim kepil?!» - deıdi Temirlan Hasenov.
Pikir qaldyrý