Eki jyl buryn Chernobyl atom elektr stansıasynda bolǵanmyn. Bolǵanda qalaı? Tiri jan ruqsatsyz kirmeıtin terıtorıada eki kún júrip, jarylǵan tórtinshi reaktorǵa 400 metrge deıin jaqyndap, 900 mıkrozıvert radıasıa jınap qaıtqanbyz. Sonda bizdi alyp júrgen jolnusqaýshy qanymyz qatyp qalatyndaı nebir sumdyqty aıtty deısiń... Biraq, myna áńgimesi esimnen esh shyqpaıdy.

Chernobylde avarıa bolǵan sátte úlken basshylary qashyp ketedi. Tómendegi jumysshylar telefon soqqanda «Ózderiń birdeńe qylyńdarshy», — dep jaýapkershilikten taıqıdy. Sodan laýazymy boıynsha eń tómen adamdar qalady da, ózderi táýekelge bel býady. Radıasıa budan da kópke taramas úshin qaýipsizdik nusqaýlaryna qaramaı, ózderin ólimge qıady. Qarańǵyda ýly sýdy belden keship júrip, bir trýbany bir trýbadan ajyratady, órtti sóndiredi. Solardyń kóbisi tym kóp sáýlelenýden qaıtys boldy. Solardyń kóbisi óte qarapaıym jumysshylar edi degen edi jolnusqaýshy.

♦Bas prokýror ınspektorlarǵa shabýyl jasaý isin óz baqylaýyna aldy

"Qaraǵandy oblysynda kıikti qorǵaımyn" dep kisi qolynan qaza tapqan Erlan Nurǵalıev týraly estigende, osy epızod esime túsip ketti. Bul aǵamyz kezinde aýylda ýchastkelik polısıa bolyp jumys istepti. Tártipke qatal bolypty marqum. 13 qańtarda Erlan Nurǵalıev pen Pótr Nısyk kıikterdi jón-josyqsyz atyp jatqan brakonerlerdiń izine túsip beredi. Baqaıshaǵyna deıin qarýlanǵan jaýyz páleler atysady kádimgideı. Sóıtip, Erlan Nurǵalıev brakonerlerdiń qolynan qaza tabady. Denıs Ten qaıtys bolǵanda, qabyrǵamyz synardaı qaıǵyryp edik. Nege? Elimizdiń atyn álemge shyǵarar juldyz sóndi dep jylaǵanbyz. Al Erlan Nurǵalıevti qaıtys bolǵan soń tanyp jatyrmyz. Sebebi,  ol — «kishkentaı adam». Byltyr Qorǵaljyn qoryǵyna jýrnalıser barǵanda, fotoǵa osylaı túsirip alǵanyna da rahmet. Biraq, memlekettiń ishki turaqtylyǵy osyndaı adamdardyń eńbeginen turady.  Qalaı atasańyzdar da, óz erkińiz.

Bulardy atyp ketken jáne atyp ketýi múmkin adamdar erteń-aq shartty jazasyn alyp, qaıtadan kıik pen adam atyp júre berýi múmkin. Al bular mardymsyz aılyqqa kúndiz-túni qý janyn shúberekke túıip, jeldiń ótinde, jerdiń syzynda kıik qaraýyldap júrgeni. Medal da almaıdy, marapat ta buıyrmaıdy. Osyndaı janqıarlyqtyń arqasynda shyǵar, bizdegi kıik basynyń 215 myńǵa jetkeni. Marqumnyń jany jánnáttan bolsyn! «Halyq qaharmanyn» berse de, artyqtyq etpeıdi.

Órken Kenjebektiń feısbýk paraqshasynan alynǵan