Álemde ártúrli qupıa syrǵa toly ádebı týyndylar men kartınalar barshylyq. Olardyń keıbiriniń boıyna búgip jatqan syry jantúrshigerlik oqıǵalarmen baılanysty bolsa, endi biri óz ıesine qarǵys ákeletin týyndylar retinde tanylǵan. Kópshilik mundaı kúshtiń baryna sense, keıbireýler jaı ǵana sáıkestik dep qaraıdy. Qamshy.kz aqparat agenttigi osyndaı mıstıkalyq oqıǵalarǵa negiz bolǵan, eshbir adamdy beı-jaı qaldyrmaıtyn ataqty týyndylardyń biri "Balanyń kóz jasy" kartınasy jaıynda derekter usynady.

"Balanyń kóz jasy" – ıtalándyq sýretshi Djovannı Bragolınnyń kartınasy. Ol sondaı-aq, Brýno Amadıo degen atpen de tanymal. Al onyń týyndysynyń óz "taǵdyry" bar. Kartınaǵa kóz salǵan adam oǵan  beı-jaı qaraı almaıdy.  Sebebi kartınadaǵy balanyń kózinen aqqan tamshy jas áli qurǵamaǵandaı áser qaldyrady. Bul kartınany áıgili etken – onyń negizinde jatqan shynaıy ári jantúrshigerlik oqıǵa. Teńdessiz týyndy jasaýdy armandaǵan Djovannı Bragolın balasynyń taǵdyryn qurban etýge deıin barǵan.

Al Brýno Amadıo Venesıa qalasynda dúnıege kelgen. Sýret salýǵa qulshynysy erte jasynan-aq baıqalǵan. Onyń kartınalary kúndelikti ómirdiń kórinisinen alynatyn, gúlder, balalar jáne shynaıy tarıhı oqıǵalar taqyrybyna negizdelgen. Alaıda, ony áıgili etken týyndyǵa halyq arasynda "Qarǵys atqan kartına" degen at qoıylǵan. "Sýret qandaı úıge tap bolsa, sol úıdiń órtenýine sebep bolady" degen nanym qalyptasqan.

Ótken ǵasyrdyń 80-jyldary "The Sun" basylymy oqyrmandardy keri baılanys ornatý maqsatynda redaksıaǵa ártúrli oqıǵalarmen bólisip, hat jazysýǵa shaqyrady.  4 qyrkúıek 1985 jyly gazet betinde órt sóndirý qyzmetinde jumys isteıtin Rona Pıter Halldyń basynan ótken oqıǵasyn jazǵan haty negizinde "Blazing Curse of the Crying Boy" degen taqyryppen maqala jaryq kóredi. Onda "Balanyń kóz jasy" kartınasynyń otqa janbaıtyndyǵy jaıly, ony satyp alǵan adamdarǵa qarǵys ákeletindigi týraly aıtylady. Basylym zertteý nátıjesinde bul kartınanynyń qaıta basylyp shyqqan 50 000 danasy satylymda ekenin anyqtaıdy. Maqala jaryq kórgen kúnniń ertesinde-aq, atalǵan kartınadan zardap shekkenderdiń jazǵan hattary redaksıaǵa aǵyla bastaıdy.  Báriniń mazmuny uqsas: kartınany satyp alǵan adamdardyń úıinde órt bolady. Bir tańqalarlyǵy, "Balanyń kóz jasy" kartınasyna ǵana ot tımeıdi eken. Tipti, oqıǵa ornyna jetken órt sóndirýshiler de bul aqparatty rastaǵan. Munan soń jýrnalıser  mıstıkaǵa toly mundaı týyndynyń astarynda qandaı shynaıy oqıǵa jatqandyǵyn anyqtaýǵa kirisedi.Sóıtse...

Sýretshi Djovannı Bragolın balalar emosıasyn barynsha kórsetetin shynaıy týyndy salýdy armandaıdy eken. Kezekti kartınasynyń keıipkerin alystan izdemegen ol óziniń 4-5 jas shamasyndaǵy ulynyń beınesin salýdy kózdeıdi. Ol durystap jylaı almaǵan balanyń shynaıy kóz jasyn kórsetýdiń qatygezdikke toly jolyn tańdaıdy. Sýretshi  balasynyń týǵannan ottan qatty qorqatyndyǵyn jaqsy biletin. Shyrpyny tutatyp, ol balanyń betine ádeıi jaqyndatyp záresin alady. Qatty qoryqqannan sábı eńirep qoıa beredi. Sýretshiniń kútkeni de osy edi. Qolyna qylqalamyn alyp, kartınany salýǵa kirisedi. Bala tynyshtalyp, jylaǵany basylǵan sátte, bar qıaly boıaýǵa ketken sheber qatygezdik áreketin taǵy qaıtalaıdy. Osylaısha, kartına bitkenge deıin bala kóz jasyn qurǵatpaǵan. Shoshyp jylaı bergennen balanyń júıkesine zıan kelip, ol psıhıkalyq aýrýǵa shaldyǵady. Ákesiniń áreketinen qatty qınalǵan sábı jylap turyp: "Óziń birge órtenip ket!" dep qarǵys aıtady. Bala kóp uzamaı kóz jumady. Alaıda, onyń qarǵysy da óz ıesin tabady. Týyndy úshin balasynyń ómirin qurban etken Djovannı Bragolınniń úıinen ot shyǵyp, ózi de birge órtenip kúlge aınalady. Órtti sóndirgennen keıin kúldiń arasynan esh jeri búlinbegen álgi kartına tabylady. Sýretshi qaıtys bolǵanǵa deıin jaqyn dosyna kartınany qandaı jaǵdaıda salǵanyn baıandap bergen eken. Qysqasy, sábıdiń kóz jasyna tunǵan kartınaǵa odan keıin de eshqandaı órt tımeıtin bolǵan. Tipti, kóshirmeleriniń ózinde de balanyń kóz jasy jibermeıtin qarǵys bar eken. Kartınaǵa kóz júgirtsek, perishteniń beınesinen qatygezdikke toly taǵdyryn oqyǵandaı bolasyń. Sonymen qatar, bul álemge meıirim men qaıyrymdylyqtyq da qanshalyqty kerek ekenin de túsinesiń...