Kolýmbıanyń astanasy Bogota qalasynda jantúrshigerlik jarylys bolyp, sonyń saldarynan 20-ǵa jýyq adam qaza taýyp, 60-tan asa turǵyn aýyr jaraqat aldy. Qazaly oqıǵa polısıa akademıasynda túlekterdi marapattaý rásimi kezinde oryn aldy dep jazady Qamshy.kz aqparat agenttigi Bbc.com saıtyna silteme jasap.

Jarylys jergilikti ýaqytpen tańǵy 9:30 shamasynda oryn alǵan. Sur tústi Nissan Patrol markaly kólik akademıanyń aýmaǵyna basa-kóktep kirip, qabyrǵaǵa baryp soǵylǵan eken.

57 jastaǵy kólik júrgizýshisi jarylys saldarynan oqıǵa ornynda qaza tapty. Derekterge sáıkes, bul ýaqytqa deıin  kúdikti eshqandaı qylmystyq jaýapkershilikke tartylmaǵan.

Atalmysh oqıǵaǵa baılanysty áli birde-bir terorıstik top  jaýapkershilikti óz moınyna almady. Oqıǵa ornyna kelip jetken prezıdent Ivan Dýke bul jaǵdaıdy «jantúrshigerlik lańkestik áreket» dep atady.

Jarylystyń saldarynan jaqyn mańda ornalasqan mekemelerdiń terezeleri synyp, shamamen 68 adam jaraqat alypty.

Bas prokýror Nestora Martınestiń aıtýynsha, jarylǵysh zattyń quramynda pentolıt bolǵan. Ony kolýmbıalyq búlikshiler buryn da qoldanǵan eken.

Aıta keteıik, 2016 jyldyń qarashasynda Kolýmbıa bıligi «Kolýmbıanyń qarýlanǵan búlikshiler tobymen» kelisimshart jasasqany belgili.

Kolýmbıada komýnıser partıasynyń qarýly kúshi 1964 jyly qurylǵan. Sol ýaqyttan beri bul elde azamattyq soǵys júrip jatyr.