Ótken jyldyń 29 jeltoqsanynda Almatyda oryn alǵan jantúrshigerlik jol apaty jaıynda barsha halyq biledi. Úsh adamnyń ómirin jalmap, taǵy bireýin aýrýhana kereýetine tańyp qoıǵan bul qazaly oqıǵaǵa kináli dep tanylǵan dúngen azamaty Ilás Kar oqıǵa ornynan qashyp ketip, ertesine qolǵa túsken belgili. Bir aıdan asa júrgizilgen tergeý nátıjesinde onyń isi sotqa jóneltildi. Degenmen sot otyrysy qashan bolatyny áli belgisiz. Bul is QR İshki ister mınıstrliginiń jiti baqylaýyna alynǵan. Qylmysker ustaldy, isi sotqa ketti. Dese de, qaıǵyly oqıǵada qaza tapqan jandardyń týystary tergeý isiniń keıbir tustaryna kelispeı, shaǵymdaryn jetkizip otyr.

Qańtar aıynda Qamshy.kz redaksıasyna habarlasqan marqum Dınara Hamıtovanyń inisi Azamat Hamıtov saraptama qorytyndysynyń sonshalyqty uzaq ýaqyt júrgizilgenine kúmánmen qarap, kúdiktiniń qanynyń quramynda alkogóldiń tabylmaǵanyn aıtyp shaǵymdanǵan bolatyn. Al Almaty qalalyq İshki ister departamentiniń baspasóz hatshysy Saltanat Ázirbekova bul aqparattyń shyndyqqa saı kelmeıtinin jáne onyń mas kúıinde kólik aıdaǵany rastalǵanyn aıtqan.

Al búginde marqum Hamıtovanyń bólesi Ásel Esimjanqyzy óziniń jelidegi paraqshasynda saraptama qorytyndysy men tergeý jumysyna qatysty olqylyqtardy aıtyp, saraptama nátıjesi kórsetilgen qujatta «kináli júrgizýshiniń qanynyń quramynda alkogóldi zat bolmady» degen jerin naqty kórsetip dabyl qaǵýda.

«Almaty qalasynda bolǵan qazaly oqıǵaǵa kináli kim ekendigin dúıim jurt biledi. Brıfıńte polısıa qyzmetkerleri úsh adam qaza tapqan bul jol apatynyń İİM-niń jeke baqylaýyna alynǵanyn aıtqan bolatyn. Iá, qylmysker kóp uzamaı qolǵa tústi. Biraq, bir túsinbeıtinim – saraptama nátıjesinde onyń qanynyń quramynda alkogóldi zattyń bolmaýy. Demek saraptama qorytyndysy Gelendwagen júrgizýshisiniń mas kúıinde kólik basqarǵanyn joqqa shyǵaryp otyr ma?

Búginde Kar Ilástyń isi sotqa jiberildi, biraq marqum bolǵan jandardyń týystaryna berilgen qujattarda keıbir faktiler osy ýaqytqa deıin jarıalanǵan aqparattarǵa sáıkes kelmeıdi.

Birinshiden, joǵaryda aıtyp ótkenimdeı, saraptama qorytyndysy júrgizýshiniń qanynyń quramynan alkogóldi zattyń bolmaǵanyn kórsetip otyr.

Sondaı-aq, kináli azamat 30 jeltoqsan kúni ustalyp, saraptama jasaýǵa dál sol kúni qan alynǵan bolatyn. Biraq saraptamaǵa 2019 jyldyń 4 qańtarynda jiberilgen. Al nátıjesi 11 qańtarda belgili boldy. Demek, onyń qanynyń quramyn zertteý úshin 10 kúnnen asa ýaqyt ketken.

Ekinshiden, narkologıalyq saraptamany dereý jasaý úshin alǵashynda alynǵan qan jetkiliksiz bolypty. Sonda tergeýshiler mundaı ispen birinshi ret aınalysyp otyr ma? Tájirıbeli tergeýshi óziniń jumysyn umytyp qalyp, qandy az alyp qoıǵan ba? Álde, munyń bári tek resmılik úshin be?

Tergeý isinde bul oqıǵaǵa qatysty olqy tustar óte kóp. Degenmen, eń basty nazar aýdararlyq másele – apatty oqıǵaǵa kináli tarap barynsha jaýapkershilikten jaltarýdyń jolyn qarastyrýda», - dep jazady marqumnyń týysy.

Esterińizge sala ketsek, BAQ betterinde jarıalanǵan aqparattarda Kar Ilástyń apat bolǵan kúni Grand Opera klýbynan shyǵyp, mas kúıinde kólik aıdaǵany aıtylǵan bolatyn. "Jel turmasa, shóptiń basy qımyldamaıdy" degen taǵy bar... Marqum jandardyń týystary bekerden-beker dabyl qaǵyp jatpasa kerek.

Aıta keteıik, qaıǵyly oqıǵada aman qalǵan aktrısa Aızada Satybaldıeva jaqyn kúnderi aýrýhanadan shyǵyp, úıine oralady.