"Qazaq-qyrǵyz shekarasynan tabylǵan qyzdyń týystary izdestirilip jatyr" dep jazady Qamshy.kz aqparat agenttigi ktk.kz saıtynyń deregin negizge alyp. Tarazda aty-jóni ǵana belgili boıjetkenniń týystary izdestirilip jatyr. Qazir qazaq-qyrǵyz shekarasynan tabylǵan jas shamasy 22-degi qyz beıimdeý ortalyǵynda. Mundaǵy mamandar onyń qujattaryn rásimdeı almaı qınalýda. Sebebi turǵylyqty meken jaıyn bilmeıdi. Sondyqtan ortalyq qyzmetkerleri boıjetkendi tanyǵandarǵa habarlasýdy suraıdy.

Aty-jónin emis-emis esine túsirgen Altynaı Tursynovaǵa ejiktep sóıleýdiń ózi qıyn. Aqyl esinde aýytqýshylyǵy bar, árip tanymaıtyn, sanaýdy da bilmeıtin boıjetkenniń oqymaǵany baıqalady. Al jas shamasy 20-dan asatyn qyz ózin "úshtemin" deıdi.    

Altynaı Tursynova:

— Úıden ne úshin shyǵyp ediń?

— Anam araq iship, urǵasyn shyǵyp kettim.

— Ura ma seni?

— Ákeń ekeýi birge ishe me?

— Iá.

Qyzdyń áke-sheshesi, eki baýyry bar kórinedi. Onyń aıtýynsha, ishkilikke jaqyn ata-anasynan jıi jábir kórgendikten, qashyp qutylǵan. Sóıtip adasyp júrgen Altynaıdy shekara shebinen tártip saqshylary taýyp alypty. 

Botakóz Qalqabaeva, Taraz qalalyq ómirlik qıyn jaǵdaıda qalǵan adamdardy qaıta áleýmettendirýge arnalǵan ortalyq psıhology:

— Qyzda qorqynysh sezimi bar, emosıalyq jaǵynan turaqsyz. Boıynda qorqynysh sezimi qalyptasyp qalǵan. Tipti jaýap berýge qorqaqtaıdy. Ortalyqqa eki jeti buryn tapsyrylǵan myna qarıanyń da taǵdyry qıyn, - deıdi. 

Aqyl esiniń aýytqýy bar aqsaqal "ótken ǵasyrdyń 20-jyldary týylǵanmyn" deıdi. Biraq jasym 20-da dep otyr. Almatyda jaldanyp jumys jasadym degen ol Tarazda qaıdan júrgenin túsindire almady. Kúsh-qýaty áli sarqyla qoımaǵan Bahýddın ata teńgeni tuńǵysh kórip tańqaldyrdy.

— Mynaý qansha teńge?

— 10 myń

— Al mynaý she?

— 5 myń

— Mynaý on, mynaý bes myń deısiz be?

— Taptym men.

Altynaı men Bahýddın aqsaqal da turǵylyqty meken -jaıyn bilmeıdi. Sondyqtan ekeýdiń jeke basyn anyqtap, qujat rásimdeý qıyndyq týǵyzýda. Al ortalyq qyzmetkerleri bulardy tanyǵandar bolsa, habarlasýdy suraıdy. 

Usynǵan: Ásel Bolatqyzy