Bıylǵy jyldyń 17 aqpanynda Atyraý oblysynyń Qurmanǵazy aýdanynda 1956 jyly 19 qazanda dúnıege kelip, ár jyldarda «Oral óńiri» gazetinde tilshi, qazaq tili men ádebıeti pániniń muǵalimi, Qazaq teleradıo komıtetine redaktor, «Qazaq ádebıeti» gazetinde, «Jalyn» álmanahynda bólim meńgerýshisi, Qyrǵyzstanda Qazaqstan elshiliginiń attashesi, Mańǵystaý oblystyq radıo-televıdenıe kompanıasynyń tóraǵasy, Atyraý oblystyq drama teatrynyń dırektory, QR Prezıdenti Ákimshiliginiń sektor meńgerýshisi, Astanadaǵy Ulttyq akademıalyq kitaphananyń bas dırektory laýazymdy qyzmetterin atqarǵan Qazaqstannyń eńbek sińirgen qaıratkeri hám «Sher», «Juldyzdar qulaǵan jer», «Jaıyq jyry», «Qarasha qazdar qaıtqanda", «Daýysyńdy estidim», «Otverjennyı mır» prozalyq jınaqtary jáne tańdamaly shyǵarmalarynyń 2 tomdyǵy; Qytaıdyń «Ulttar» baspasynan qytaı, qazaq tilinde 2 tomdyǵy, Reseıdiń "Hýdojestvennaıa lıteratýra" baspasynan orys tilinde bir tomdyǵy jáne qyrǵyz tilinde kitaptary; jekelegen shyǵarmalary túrik, arab, aǵylshyn tilderinde jaryq kórgen jáne «Beıbarys sultan», «Bas», «Nashaqor jaıly novela», «Nurjaýǵan-ǵumyr», «Syrym batyr», «Mustafa Shoqaı» pesalary respýblıkalyq jáne shetel teatrlarynda sahnalanǵan qazaqtyń belgili jazýshysy, daryndy dramatýrgi Rahymjan Otarbaevtyń ómirden ozǵanyna bir jyl tolady.

Qaqpan

«Basyma túnek úıin salasyńdar. Bu qazaqta es joq,

erteń ólgen soń, meni de «áýlıe» deıdi...»

Rahymjan Otarbaıdyń suqbatynan.

Aı, Raqym kókem-aı!

Til – zapyran,

ý edi.

(Qazaqtyń rýh-týy edi!)

Oıyńyz,

boıǵa taralyp,

Zapys tolǵan sana lyq.

Aq júrekti,

qara ǵyp.

Julyp ketti,

es jımaı,

Artyńnan ǵana qaradyq...

Aı, Raqym kókem-aı!

Sardary ediń,

sananyń.

(Ultyńdy artyq sanadyń!)

Otyna túsip,

ar-muńnyń,

Atyńdy alys shaldyrdyń.

«Túnek úıin saldyrdyń...»

Aǵzada,

az-kem shyndyqty,

Kimge senip qaldyrdyń?!.

Aı, Raqym kókem-aı!

Atanyń alǵyr jalǵasy,

(Ǵumyry ótken jar basy)

Sur-symbaty – syryqtaı,

Sulý sózi – quryqtaı.

Saqtaǵan este,

ulyqtaı,

Jeti múshe – jeti jar,

Qaǵıdatyn umytpaı.

Aı, Raqym kókem-aı!

Qaýǵasyn tartyp,

sý ishken.

(Shiritti me eken,

ý ishten...)

Ádildikti – jaqtaǵan,

Ǵadildikti – aqtaǵan.

«Qajeti joq, – dep.

– Taq maǵan!»

Lámine ylaı túsirmeı,

Til qaqpanyn,

«tappaǵan...»

Myńjan Baıjanın