Jambyl oblysyna qarasty Jýaly aýdanynyń turǵyny Áıgerim  (qyzdyń esimi ózgertildi — red.) 10 jyl boıy   seks-quldyqta bolǵan.  Ony quldyqta ustaǵan qoıshy úı sharýasyna paıdalanǵanymen qoımaı, zorlyq kórsetip, uryp-soqqan. Áıgerim birneshe ret qashýǵa tyrysqan. Alaıda qoıshy qaıda qashqanyn anyqtap, qaıtadan quldyqqa salady.Tipti polısıanyń ózi qylmyskerlerge kómekteskeni anyqtaldy dep habarlaıdy Qamshy.kz aqparat agenttigi  caravan.kz saıtynyń deregin negizge alyp.

14 aqpanda Áıgerimniń ápkesi polısıaǵa aryz jazǵannan keıin ǵana tergeý isi júrgizilgen. Qazirgi tańda Áıgerim Almaty qalasyndaǵy qaýipsiz jerde. 

27 jastaǵy Áıgerim qazir kez kelgen dybystan shoshynady. Ol "quldyqta ustaǵan jaýyzdar qaıta zorlaıdy" degen úreıden aryla qoımaǵan. Áli kúnge deıin ózin quldyqta ustaǵan  Nurqanat pen Zaranyń (esimderi ózgertilgen — red.) qaıta alyp ketýinen, olardyń dosy ishkilikke qumar Sáken degen kári shaldyń  uryp-soǵýynan qatty qorqyp qalǵan.  

Ony óz qamqorlyǵyna alǵan advokaty Aıman Omarovanyń aıtýynsha, Áıgerimniń saý tamtyǵy qalmaǵan. Búkil jeri kógergen. 

«Qoıshylar kelip ishe bastady, sosyn meni zorlady»

Áıgerim qazirgi Túrkistan oblysynda dúnıege kelgen. Onyń ata-anasy jáne ápkesi bolǵan. Ákesi dúnıeden ótken kezde Áıgerim áli esin bilmeıtin bala bolǵan. Al anasy qaıta kúıeýge shyqqan soń olar Jambyl oblysynyń Jýaly aýdany Nurkent aýylyna kóshedi. Qarshadaı qyz tipti mektepti  de aıaqtaı almapty. 

"17 jasymda meni kórshi erkek zorlady. Men bul týraly týysqandaryma aıtyp bergen edim. Keıin olardyń meniń otbasyma degen  kózqarasy kúrt ózgere bastady", - deıdi Áıgerim. 

Bul soraqylyqty estigen Áıgerimniń anasy de eshqandaı shara qoldanbaǵan. 

"Anam polısıaǵa aryz bergen joq. Nege ekenin bilmeımin. Ol «óziń kinálisiń» dep qana aıtty. Anamnyń ápkeleri der kezinde aryz bermegeni úshin anama urysqan edi", dep eske aldy ótkenin 27 jastaǵy Áıgerim. 

Osy jaǵdaıdan keıin onyń aıaǵy aýyrlap qalǵan. Mektep dırektory bolsa qujattardy alyp ketýin talap etken.  Keıin 10-synypqa ótkizbeı, oqýdan shyǵaryp jiberipti.

Júktiliktiń 6 aptasynda Áıgerimdi Tarazdaǵy aýrýhanalardyń birine aparyp, jasandy túsik jasaýǵa májbúrleıdi.

"Osy jaǵdaıdan keıin men anamnyń ápkesiniń úıinde turdym. Omyraýym, asqazanym aýyrdy. Men ne isteý kerektigin bilmedim. Al keıin ápkem meni qaıta úıime jiberdi. Úıime barǵan soń ógeı ákem úıge syıǵyzbaı qýyp jiberdi. Baratyn jerim bolmaǵandyqtan kóshede, maldarmen birge saraılarda, qurylys oryndarynda túneýge týra keldi", - dedi Áıgerim.

Solaı kóshede túnep júrgen kúnderdiń birinde onyń ómiri túbegeıli ózgeredi. Kóshede úsh jigit ustap alyp, Áıgerimniń aýzyna zorlap araq quıyp, shopannyń úıine aparady. Keıin shopan 17 jastaǵy qyzdy bir qoıǵa satyp alady.

Quldyqta ustaǵan Sáken degen shopannyń áıeli qaıtys bolǵan. Al balalary bolsa bólek turady. Áıgerim 10 jyl boıy malǵa qarap, tamaq ázirleýmen bolǵan. 

— Shopan seni urdy ma? 

— Uratyn. Ol birde "maǵan turmysqa shyq", - dedi. Al men onyń qyzymen jasty ekenimdi, oǵan turmysqa shyqpaıtynymdy aıttym. Osydan keıin ol meni «attyń quıryǵyna baılap súıreımin", - dep qorqytty. Sodan keıin shopannyń úıine kórshi aýyldyń shopandary qonaqqa keldi. Olar iship alyp, meni zorlady. Men olardan qatty qorqatynmyn. 

"Qashsań da báribir taýyp alamyn", - dep qorqytatyn"

Áıgerim qoıshynyń janynda 10 jyl boıy bolǵan. Qonaq bolmaǵan kezde tańǵy 7:00-de turyp, keshki 20:00-de jatatyn bolǵan. Áıgerim kóbinese makarondy azyq qylǵanyn, et bergen kúnniń ózinde óte az mólsherde bolǵanyn, sút, jemis sekildi taǵamdardy múlde kórmegendigin, gazet, jýrnaldy tipti adammen tildesýdi umytqanyn aıtady.

"Birneshe ret qashyp shyǵýǵa árekettenip kórdim. Biraq biraz ýaqyttan keıin Nurqasym men Zara meni qaıta shopannyń úıine ákelip tastady", - deıdi Áıgerim.

Birde Áıgerim týysqandarynyń úıine qashyp barady. Alaıda bul joly da joly bolmady. Sebebi týysqandary Áıgerimge satqyndyq jasaıdy. Olar Áıgerimdi izdegen adamdardan 5000 teńge alyp, Áıgerimdi qylmyskerlerdiń qolyna tapsyrady.

Biraz ýaqyttan keıin Áıgerim shopannyń úıinen taǵy da qashyp shyǵady. Bul joly ata-anasynan pana suraıdy. Alaıda budan da eshteńe shyqpady.

 "Bir kúni qashyp úıime keldim. Meni zorlaǵandar artymnan izdep keldi. Ata-anamdy araqqa mas qylyp, meni qaıta alyp ketti", - dep aıtty 10 jylyn quldyqta ótkizgen Áıgerim.

— Sen olarǵa úıińe qaıtqyń keletinin aıttyń ba?

— Aıttym, biraq olar meni jibergen joq. Qansha qashsam da báribir ustap alatyndyǵyn aıtty. Taýǵa da baryp jasyryndym. Qasqyrlardyń, shıbórilerdiń daýsynan qatty qoryqtym. Biraq olar meni báribir taýyp aldy.

— Saǵan kıim men kerekti zattardy kim berdi?

–Sáken berdi. Qystyq aıaq kıim múlde bolmaıtyn, tek rezeńke etikti ǵana kıetinmin. Qysta sýyq tıgizip aldym. Ol dári ákep berdi. Aýyrǵan kúnniń ózinde de jumys jasaıtynmyn, sebebi odan qatty qoryqtym.

— Seni araq ishýge qoıshy májbúrledi me?

–Men múlde araq iship kórgen emespin, ol jerde de ishken joqpyn. Bir kúni qoıshy maǵan uıaly telefon alyp berdi. "Men saǵan telefon alyp berdim, endi sen osy jerde jumys isteýge mindettisiń", - dedi.

Áıgerim telefondy alǵan boıda ápkesine qońyraý shalyp, oǵan bar mán-jaıdy túsindiredi. Shopannyń úıinen ketkisi keletindigin, qansha qashýǵa tyryssa da, olardyń qolyna qaıta ustalyp qala beretinin aıtyp, ápkesinen aqyl-keńes suraǵan.

Ápkesi oǵan ol jerden qashyp shyǵyp, tez arada kúıeýge shyǵý kerektigin aıtady. Biraq qashyp shyqqanymen Áıgerim qaıda barady? Úıinde araqqa salynǵan áke-sheshesi, eshkimge kerek emes.Tipti qujattary da bolmaǵan. Biraq ol qaıtadan qashyp ketip, ápkesiniń úıine barady. Ápkesi ony bir jigitpen tanystyrady jáne olar ary qaraı birge turady. Birde jigiti úıinde bolmaǵan kezde shopan bildirmeı úıge kirip, Áıgerimdi qaıta zorlyqpen alyp ketken.

Sóıtip Áıgerimniń quldyqtaǵy ómiri qaıta bastaldy. Áıgerimniń joǵalǵanyn estigen ápkesi birden polısıaǵa aryz jazyp, KTK telearnasynyń jýrnalısi Jazıra Berdalydan kómek suraıdy. Olar oqıǵa ornyn bárin vıdeoǵa túsirip,  Áıgerimdi qoıshynyń úıinen alyp ketedi.

Aıman Omarova 27 jastaǵy Áıgerimniń aýyr taǵdyry jaıynda  áleýmettik jelide oı bólisti. Onyń habarlaýy boıynsha,  Jambyl oblysy boıynsha polısıa bóliminiń qyzmetkeri laýazymyna mynadaı túsinikteme bergen:

2019 jyldyń 13-aqpanynda azamat B.M. Jýaly aýdanynyń polısıa bólimine 10 jyl boıy sińilisin zańsyz ustaǵan azamattarǵa qylmystyq jaýapkershilikke tartý týraly ótinish bildirdi. Atalmysh fakt boıynsha Jambyl oblysy JP-nyń Jýaly aýdany, Jambyl oblysy boıynsha tergeý amaldary júrgizildi. Tergeý barysynda jábirlenýshiden jaýap alynyp, qylmystyń kýágerleri anyqtaldy. Sondaı-aq tıisti saraptama jasaldy. Zardap shekken taraptyń barlyq dálelderi tekserildi. Ótinish berýshilerdiń pikirinshe, qylmys 10 jyl buryn bolǵan. Sondaı-aq jergilikti atqarýshy organdardyń is-áreketterine quqyqtyq baǵa beriletin bolady. Eger polısıa qyzmetkerleriniń zańsyz áreketteri anyqtalsa olarǵa qarsy tıisti sharalar qabyldanatyn bolady.

Aıman Omarova sharýa qojalyǵynyń ıelerin, zorlyq kórsetýshilerdi, barlyǵyn qamtyǵan adamdardy túgelimen tekserý qajet ekenin tilge tıek etti. Zańgerdiń aıtýynsha, Áıgerim jumys istegen úlken sharýa qojalyq Nurqasym men Zaraǵa tıesili emes. Ol 10 jyl boıy Áıgerimdi quldyqta ustaǵan sharýa qojalyqtyń ıesi joǵary laýazymdy qyzmetker bolýy múmkin ekenin aıtty. Sol sebepti polısıa qyzmetkerleri eshqandaı shara qoldanbaǵan. 

“Jumys istep, aqsha tapqym keledi”

— Áıgerim, bul suraqty qoıǵanym úshin aldyn ala keshirim suraımyn. Alaıda osynsha sumdyqtan keıin ómirden kúder úzbeýińe ne sebep boldy?

— Arman. Meniń basqalar sekildi bostandyqta, erkin ómir súrgim keldi. Eshkimniń mazaq qylyp, keleke etkenin qalamadym. 

Qazir Áıgerimmen psıhologtar jumys istep jatyr. Ol ózine qorlyq kórsetkenderdiń tıisti jazasyn alǵanyn qalaıdy. Sondaı-aq aldaǵy ýaqytta jumys istep aqsha tabýdy maqsat etip otyr.

Aıta ketsek, halyqaralyq kóshi-qon uıymynyń málimetterine súıensek, Qazaqstandaǵy adam saýdasynyń qurbanyna aınalǵan 122 adamǵa kómek kórsetildi (Qazaqstannan 36, Ózbekstannan 82, Reseıden 3, Ýkraınadan 1).

Aýdarǵan: Farıza Jomartqyzy