BUU-nyń IýNISEF balalar qory ázirlegen baǵdarlamaǵa qatysty Qyzylorda oblysynyń turǵyndary arasynda daý týdy. Bul joba negizinen mekteptegi sýısıtti toqtaýǵa baǵyttalǵanymen statısıka balalardyń óz-ózderine qol jumsaýy kóbeıgenin kórsetip otyr dep habarlaıdy Qamshy.kz aqparat agenttigi.

Bul máselege mektep psıhologi Lázzat Sháýenova kóńili toımaıtyndyǵyn aıta otyryp, pılottyq joba jemisin berse 2017 jyly Qyzylorda oblysy boıynsha 6 bala eken óz-ózine qol jumsaǵan, al endi 2018-de ol 13-ke kóterilipti. Bul sonda jemis berse nege sonshalyqty kóteriledi. Soǵan qaraǵanda men eshqandaı jemis berdi dep oılamaımyn degen pikir bildirdi. 

Ómirińizdi qıýǵa sońǵy ret áreket jasaǵanda qandaı ádisti qoldandyńyz?

Qyzylorda oblysynda 8-10 synyptarda oqıtyn oqýshylarǵa berilgen saýalnamada osyndaı suraqtar kezdesken. 

«Segizinshi synypta oqıtyn ulym úıge kelip, ákesinen saýalnama júrgizilgendigi jaıynda óz oıyn aıtty. Eń sońǵy suraq qana esimde qalyp tur, Men ólsem basqa adamdarǵa jaqsy bola ma degen suraqty nege osyndaı suraq qoıylǵan — dep ákesinen surady. IýNISEF-tiń dál osyndaı saýalnama júrgizgendigine ata-ana retinde biz qarsy bolyp otyrmyz  — deıdi ata-ana Meıramgúl SAPARBAEVA.

«Men ózim ana bolǵandyqtan, QR-nyń azamaty bolǵandyqtan balanyń psıhologıasyn buzatyn suraqtardy qoımaý kerek qoı dep oılaımyn. Aıtady ǵoı adamnyń mıynda bolsa ol tuqym deıdi, ony eger de tuqymdy ekse ol ári qaraı ósedi. Sondyqtan eshqandaı jaman oıdy salmaý kerek — deıdi taǵy bir ata-ana Sharbaný JARKENOVA

 Ata-ananyń sózimen maman da kelisedi.

«Óziń ashýlanǵan kezde óziniń ómirden bas keshken ýaqytyn boldy ma nemese qandaı joldy tańdar ediń basynan ótken kezde» degen sıaqty balaǵa aýyr tıetin suraqtar bar. Bilmeımin endi, bul ádistemeni IýNISEF pılottyq joba etip bizge engizdi ǵoı. Biraq qazaqtyń mentalıtetinde qanshalyqty bul múmkin, bizdiń balalar bul suraqtarǵa jaýap berýge daıyn emes shyǵar, bul endi syrttan kelgen dúnıe ǵoı túp nusqasy qazaqtan kelgen joq. Bizdiń balalar múmkin buǵan daıyn emes shyǵar. Endi balaǵa kádimgideı qıyndyq keltiredi», — deıdi Jańaqorǵan aýdany, Kelintóbe aýylynyń №192 mektebiniń psıholog mualimi Lázzat Sháýenova.

Jasóspirimder arasyndaǵy sýısıd máselesi kúrdeli ekendigin aıtqan oblystyq bilim basqarmasynyń basshysy  Maıra Bedelhanova jańa baǵdarlama jaıly suhbat berýden bas tartyp,  «Siz  kúte turyńyzshy. Men ishki máselege baılanysty jaýaptylarmen sóılesip keleıin. Qazir men ózińizben sóılesip alaıynshy. Shyǵa turyńyzdar»,- dep basyn ala qashqan.

Óz-ózine qol salýy múmkin degen oqýshylardy anyqtaımyz degen qyzylordalyq psıhologtar bıyl 4-shi jyl shet eldik baǵdarlamamen jumys jasap keledi. Tipten pılottyq jobany jyldyq josparǵa da engizip úlgeripti. Sol sebepti sýısıdti búkil álem aýyr indet dep tanyp jatqan zamanda jańa baǵdarlamany esh tekserýsiz oqý prosesine qosa salýdy muǵalimder de ata-analar da qate sheshim dep oılaıdy.

Saýalnamadaǵy suraqtar tym ashyq jáne qazaq mentalıtetine saı dep shaǵym aıtýda ata-analar.