QR Energetıka mınıstrligi kópshilikti tolǵandyrǵan AES máselesine qatysty málimdeme jasady dep jazady Qamshy.kz aqparat agenttigi. Mınıstrlik aldyn ala daýryǵyp, negizsiz alańdaýǵa sebep joq ekenin aıtady. 

"Júrgizilgen baǵalaýǵa sáıkes elimizdiń elektr qýatynyń boljamdy balansynda 2030 jylǵa qaraı Qazaqstannyń Ońtústiginde 2,7 GVt-qa deıin bazalyq qýat tapshylyǵy kútilýde. Osyǵan oraı, elimizdiń ońtústiginde bý-gaz, gıdro jáne atom stansııalaryn salý sıaqty ártúrli otyn jáne energıa kózderin paıdalana otyryp, bazalyq jáne manevrlik generasıany engizý arqyly tapshylyqty jabý múmkindigin qarastyryp otyr. 

Salynýy múmkin AES-tiń ekonomıkalyq jáne tehnıkalyq parametrlerin naqtylaý jáne reaktorlyq tehnologıany tańdaý úshin Tehnıkalyq-ekonomıkalyq negizdemeniń Marketıńtik bólimi ázirlendi. Onda naryqta bar III+ reaktorlyq tehnologıalardy taldaý, sondaı-aq 5 eldiń reaktorlyq tehnologıalardy jetkizýshilerimen, sonyń ishinde Rosatom memlekettik kompanıasymen, aqparat almasý júrgiziledi.
Budan basqa, áleýetti ınvestorlar elimizdiń ońtústik óńirlerinde manevrli gaz generasıasyn, sondaı-aq Ertis ózeninde Shúlbi GES jáne İle ózeninde Qapshaǵaı GES kontrregýlátorlaryn salý máselesin qarastyrýda. Shymkent Jylý elektr ortalyǵy alańynda qýaty shamamen 450 MVt bolatyn jańa bý-gaz elektr stansıasyn salý jóninde usynys berildi.

Tek múmkindikter jáne usynylatyn jobalar tıanaqty zerttelgen soń ǵana elektr energıasyn óndirýge Qazaqstan úshin neǵurlym ońtaıly jáne qolaıly tehnologıalar aıqyndalatyn bolady. Eger qýat tapshylyǵyn joıý maqsatynda AES-ti tańdaǵan jaǵdaıda, Qazaqstan Respýblıkasynyń zańnamasyna sáıkes AES-ti salý týraly sheshimdi QR Úkimeti qoǵamdyq tyńdaýlar júrgizip, AES salynatyn aýmaqtardyń jergilikti ókildi organdardyń kelisimi boıynsha qabyldaıtyn bolady. Bul rette elimizdiń sharýashylyq mindetterin sheshý muqtajdyǵy, qajetti jaǵdaılardyń bolýy jáne qaýipsizdik qateriniń bolmaýy eskeriledi.

Osylaısha, aldyn ala daýryǵyp, tujyrymdar jasaýǵa jáne negizsiz alańdaýǵa sebep joq ekenin habarlaımyz", - delingen mınıstrliktiń habarlamasynda. 

Usynǵan: Ásel Bolatqyzy