"Ǵasyr ustazy" 13 myń, "Alash ustazy" 10, "Ult ustazy" 5 myń teńge. Áleýmettik jelide osyndaı jarnamalardan kóz súrinedi. Sandarǵa sensek, osynsha aıaýly ataqty satyp alǵan 2 myńǵa jýyq ustaz bar eken. Degenmen kez kelgen qazaqtan Ult ustazy kim dep surasańyz, múdirmesten Ahmet Baıtursynuly deıdi. Sebebi bundaı ataqty halyq ózi berdi. Al osyndaı qasterli ataqty medal etip, taǵyp júrgender kimder? Ony saýda salǵandardyń isi qanshalyqty zańdy? Bul týraly Qamshy.kz aqparat agenttigi Eýrazıa birinshi arnasynyń deregin negizge ala otyryp habarlaıdy.

Búginde elimizde medal saýdasy úırenshikti dúnıege aınalǵandaı. Oǵan tipti mán bermeıtinde boldyq. "Qazaqstannyń qurmetti azamaty", "Qaıratker áıel"  taǵysyn taǵy. Biraq bul jolǵysy kóptiń shamyna tıgeni sózsiz.  Ǵasyr ustazy  13 myń, Alash ustazy  10 myń teńge. Muny kórgen jeli qoldanýshylary osynsha aıaýly atty tıyn-tebenge satqan jekemenshik kompanıany jerden alyp jerge salýda.  

Aıatjan Ahmetjan, qoǵam belsindisi:  "Olar da ózderin aqtap alatyn joldar tabady. Sebebi gazetke maqala berýiń kerek, jýrnaldarǵa maqala berýiń kerek, úzdik shyǵarmashylyq konkýrsyna qatysýyń kerek. Endi ol jerde belgili bir deńgeıde ádiletti shyǵar ózderi úshin, ıá múǵalim oǵan eńbektenip, maqala jazatyn shyǵar. Biraq bir maqala men bir ashyq sabaqpen ǵasyr ustazyn anyqtap tastaıtyn bolsa, onda kóz maıymyzdy kúni- túni sarqyp, kitap jazyp, bala oqytyp ne istep júrmiz? Maqala jazyp jataıyq."

Sandarǵa sensek, tek búginniń ózinde elimiz boıynsha 600 Alash ustazy, 925 ult ustazy men 425 ǵasyr ustazy bar eken. Sonda arzan ataqqa kimder qumar?

Erbol İrgebaı, qoǵam belsendisi: "Birneshe jyl boıy jumys istep, zeınet jasyna jetip, biraq eshteńege ilinbedi. Sodan keıin «aı, osyny alaıyq" deıtin shyǵar keıbireýler endi shynynda da, zatynda. Ózi sol shenqumarlaý, ataqqumar adamdar bolady". Ordender  muǵalimderdiń konferensıalarynda, túrli áleýmettik jelidegi chattarda  usynylyp, ashyqtan-ashyq saýdalanady eken. Óıtkeni  zań boıynsha, mundaı marapatty satyp júrgen qoǵamdyq uıymdarǵa  jaza joq kórinedi.

Ahmetjan Beısenbekov, zańger: "Alash ustazy", "Ǵasyr ustazy" degen nagradalarǵa tyıym salynbaǵan. Sondyqtan da túrli qoǵamdyq uıymdar, belgili bir odaqtar, asosıasıalardyń osyndaı nagradalar taǵaıyndaýǵa múmkindigi bar"

Al 20 jyldan astam ustazdyq etip kele jatqan Dámesh Ómirbekqyzy muǵalimderdi memleket baǵalamaǵannan keıin, kásipkerler medal satýdy bızneske aınaldyrǵan degen pikirde. 

Dámesh Ómirbekqyzy, ustaz: "Bizdiń qazaqta bata bar "Atqan tańnyń araıyna bólende, eńbegińmen elen" deıdi. Eńbegimen elenip otyrsa, ol ondaı sharaǵa barmas edi, ondaı jolǵa túspes edi. Biraq ol túbinde durys emes. Ol endi ustazdyń qıyn jaǵdaıyn osal jaǵyn bilip, bıznesmenderdiń istep otyrǵan jaǵdaıy".

Al, Bilim jáne ǵylym mınıstiri Kúlásh Shámshıdınova  muǵalimderdiń ereń eńbegi úshin  memleket tarapynan beriletin 2 ǵana nagrada bar, deıdi. 

Kúlásh Shámshıdınova, QR Bilim jáne ǵylym mınıstri:  "Mınıstrlik tarapynan beriletin nagradalardy bilesizder, ol "bilim berý isiniń úzdigi" jáne "Altynsarın tósbelgisi". Basqa eshqandaı ataqtarǵa bizdiń qatysymyz joq". Al pedogog Saıat Ibraev qoǵamdyq uıymdar turmaq, memlekettiń ózi muǵalimderge beretin nagradalar qunyn áldeqashan joǵaltqanyn aıtady. Tipti esh paıdasy joq temir-tersekke aınalǵan dep ashynyp otyr. 

Saıat Ibraev, pedagog: "Muǵalimderdiń arasyndaǵy alynyp jatqan memlekettik medaldardyń quny joq. Oǵan aqsha tólenbeıdi. Mysaly pedagog Ybyraı Altynsarın atyndaǵy medal aldy ma, oǵan sizge jalaqyńyzǵa eshteńe qosylmaıdy".

Ornymen bergen ataq ta, syılyq ta adamnyń mereıin ósireri haq. Biraq biz tildesken jandardyń barlyǵy  onyń óz ólshemi bolý kerek degen pikirde. Sondyqtan bul másele zań aıasynda rettelýi kerek. Áıtpese, elimizde ataqsyz adam qalmaıtyn sekildi.

Usynǵan: Farıza Jomartqyzy